ഫ്രഞ്ച് വാഹന നിര്‍മാതാക്കളായ റെനോ ഇന്ത്യന്‍ നിരത്തുകള്‍ക്കായി ഒരുക്കുന്ന കോംപാക്ട് എസ്.യു.വി.മോഡല്‍ കൈഗര്‍ ഏതാനും ദിവസങ്ങള്‍ക്കുള്ളില്‍ അവതരിപ്പിക്കും. കൈഗറിന്റെ വരവ് വാഹനപ്രേമികളെ ഓര്‍മിപ്പിക്കുന്നതിനായി പുതിയ ടീസര്‍ പുറത്തുവിട്ടിരിക്കുകയാണ് റെനോ. ജനുവരി 28-നാണ് ഈ വാഹനത്തിന്റെ പ്രൊഡക്ഷന്‍ പതിപ്പ് പ്രദര്‍ശിപ്പിക്കുന്നത്.
വാഹനത്തിന്റെ മുഖഭാവം വെളിപ്പെടുത്തുന്ന ടീസറാണ് ഇപ്പോള്‍ പുറത്തുവന്നിരിക്കുന്നത്. പ്രൊജക്ഷന്‍ ഹെഡ്‌ലാമ്പും, എല്‍.ഇ.ഡി.ഡി.ആര്‍.എല്ലും ഇതിലെ ഹൈലൈറ്റാണ്. കണ്‍സെപ്റ്റ് മോഡലിന്റെ ഡിസൈനിനോട് 80 ശതമാനം സാമ്യമുള്ള ഡിസൈനിലായിരിക്കും പ്രൊഡക്ഷന്‍ പതിപ്പ് നിരത്തുകളില്‍ എത്തുകയെന്നാണ് റെനോ മുമ്പുതന്നെ ഉറപ്പുനല്‍കിയിരുന്നു.
റെനോയുടെ എം.പി.വി മോഡലായ ട്രൈബറിന് അടിസ്ഥാനമൊരുക്കുന്ന സി.എം.എഫ്-എ പ്ലസ് പ്ലാറ്റ്ഫോമിലാണ് കൈഗറും ഒരുങ്ങിയിട്ടുള്ളത്. സ്‌പോര്‍ട്ടി ഭാവത്തിലാണ് കണ്‍സെപ്റ്റ് മോഡല്‍ ഒരുങ്ങിയിരിക്കുന്നത്. നേര്‍ത്ത ഹെഡ്ലാമ്പ്, എല്‍.ഇ.ഡി ഡി.ആര്‍.എല്‍, എല്‍.ഇ.ഡിയിലുള്ള ഇന്‍ഡിക്കേറ്റര്‍, റൂഫ് റെയില്‍, സി ഷേപ്പ് ടെയില്‍ലാമ്പ്, സ്‌റ്റൈലിഷ് ബംമ്പര്‍ എന്നിവയാണ് കൈഗറിനെ സ്‌പോര്‍ട്ടിയാക്കുന്നത്.
റെനോയുടെ എം.പി.വി.മോഡലായ ട്രൈബറിന് സമാനമായ ഇന്റീരിയറായിരിക്കും കൈഗറിലും നല്‍കുക. ഡ്യുവല്‍ ടോണ്‍ നിറങ്ങളില്‍ പുതുതായി ഡിസൈന്‍ ചെയ്ത സെന്റര്‍ കണ്‍സോളും ഡാഷ്ബോഡും ഇതില്‍ ഒരുങ്ങും. സ്‌പേസാണ് ഇതിലെ ഹൈലൈറ്റ്. ഫ്‌ളോട്ടിങ്ങ് ഇന്‍ഫോടെയ്ന്‍മെന്റ് സിസ്റ്റവും ഇതില്‍ പുതുമ നല്‍കുന്നുണ്ട്. ഡിജിറ്റല്‍ ഇന്‍സ്ട്രുമെന്റ് ക്ലെസ്റ്റര്‍, കൂള്‍ഡ് ഗ്ലോബോക്‌സ് എന്നിവ ഇന്റീരിയറിനെ ഫീച്ചര്‍ റിച്ചാക്കും.
അടുത്തിടെ നിരത്തുകളില്‍ എത്തിയ കോംപാക്ട് എസ്.യു.വിയായ നിസാന്‍ മാഗ്നൈറ്റിലെ എന്‍ജിനായിരിക്കും കൈഗറിനും കരുത്തേകുക. 1.0 ലിറ്റര്‍ നാച്വിറലി ആസ്പിരേറ്റഡ്, 1.0 ലിറ്റര്‍ ടര്‍ബോ പെട്രോള്‍ എന്‍ജിനുകളായിരിക്കും ഇതില്‍ നല്‍കുക. സാധാരണ പെട്രോള്‍ എന്‍ജിനൊപ്പം മാനുവല്‍, എ.എം.ടി ഗിയര്‍ബോക്സുകളും ടര്‍ബോ എന്‍ജിന്‍ മോഡലില്‍ മാനുവല്‍, സി.വി.ടി ഗിയര്‍ബോക്സുമായിരിക്കും ട്രാന്‍സ്മിഷന്‍ ഒരുക്കുക.
Content Highlights: Renault Released Teaser Of Kiger Compact SUV Ahead Of Launch
