മാരുതി പുറത്തുവിട്ട ടീസർ ചിത്രം | Photo: Nexa Experience
മാരുതിയുടെ പ്രീമിയം ഹാച്ച്ബാക്ക് മോഡലായ ബൊലേനൊ ഏഴാം വയസിന്റെ നിറവിലാണ്. 2015-ല്‍ നിരത്തുകളില്‍ എത്തിയ ഈ വാഹനം കഴിഞ്ഞ ആറ് വര്‍ഷങ്ങളിലും മികച്ച സ്വീകാര്യത നേടിയാണ് കുതിച്ചിരുന്നത്. 2019-ല്‍ ചെറുതായി മുഖംമിനുക്കിയ ഈ വാഹനം 2022-ല്‍ ഒരു തലമുറ മാറ്റത്തിനുള്ള തയാറെടുപ്പിലാണ്. ഡിസൈനിലും ഫീച്ചറുകളിലും ന്യൂജനറേഷന്‍ ആകുന്ന ബൊലേനൊ 2022 ഫെബ്രുവരി 23-ന് അവതരിപ്പിക്കുമെന്നാണ് റിപ്പോര്‍ട്ടുകള്‍. ബുക്കിങ്ങ് ഇതിനോടകം സ്വീകരിച്ച് തുടങ്ങിയിട്ടുണ്ട്.
പുതിയ ബൊലേനൊയുടെ ഏക്സ്റ്റീരിയറിന്റെ ഡിസൈനും ഇന്റീരിയറിലെ ഫീച്ചറുകളെയും സംബന്ധിച്ച സൂചനകള്‍ നല്‍കുന്ന ടീസറുകള്‍ മാരുതി പുറത്തുവിട്ടിരുന്നു. ഏറ്റവും പുതിയ റിപ്പോര്‍ട്ടുകള്‍ അനുസരിച്ച് പുതുതായി 11 ഫീച്ചറുകളാണ് ഈ വാഹനത്തില്‍ നല്‍കുന്നത്. യാത്രക്കാര്‍ക്ക് സുരക്ഷയൊരുക്കുന്നതിനും കൂടുതല്‍ കംഫര്‍ട്ടബിള്‍ ആക്കുന്നതിനുമാണ് കൂടുതല്‍ പ്രധാന്യം നല്‍കിയിരിക്കുന്നത്. എന്നാല്‍, ന്യൂജെന്‍ ആകുന്നതിനായി കണക്ടിവിറ്റി സംവിധാനങ്ങളിലും മാരുതി കൈവെച്ചിട്ടുണ്ട്.
ബൊലേനോ ഉള്‍പ്പെട്ടിട്ടുള്ള പ്രീമിയം ഹാച്ച്ബാക്ക് ശ്രേണിയില്‍ തന്നെ ആദ്യമായി നല്‍കുന്ന രണ്ട് ഫീച്ചറുകളാണ് അകത്തളത്തില്‍ ഒരുങ്ങുന്നത്. 360 ഡിഗ്രി ക്യാമറ, ഹെഡ്അപ്പ് ഡിസ്പ്ലേ എന്നിവയാണ് സെഗ്മെന്റ് ഫസ്റ്റ് ഫീച്ചറുകള്‍. ക്ലൈമറ്റ് കണ്‍ട്രോള്‍, സ്പീഡ്, ടൈം, നിലവിലെ ഇന്ധനക്ഷമത എന്നിവയാണ് ഈ ഹെഡ്അപ്പ് ഡിസ്പ്ലേയില്‍ തെളിയുന്നത്. 9.0 ഇഞ്ച് വലിപ്പമുള്ള ഫ്രീ സ്റ്റാന്റിങ്ങ് സ്മാര്‍ട്ട്പ്ലേ പ്രോ പ്ലസ് ഇന്‍ഫോടെയ്ന്‍മെന്റ് സിസ്റ്റമാണ് ഇതിലെ കണക്ടിവിറ്റി ഫീച്ചറിന് അടിസ്ഥാനം.
വയര്‍ലെസ് ആപ്പിള്‍കാര്‍ പ്ലേ, ആന്‍ഡ്രോയിഡ് ഓട്ടോ, കണക്ടഡ് കാര്‍ ടെക്നോളജി, വയര്‍ലെസ് ചാര്‍ജിങ്ങ്, അലക്സ വോയിസ് കമാന്റ്, പുതിയ ഫ്ളാറ്റ് ബോട്ടം സ്റ്റിയറിങ്ങ് വീല്‍ എന്നിവയും ഈ വാഹനത്തില്‍ പുതുമ ഒരുക്കുന്നവയാണ്. കാര്യക്ഷമമായ സുരക്ഷയും പുതിയ ബൊലേനോ ആനുകൂല്യം ചെയ്യുന്നുണ്ട്. ക്രൂയിസ് കണ്‍ട്രോള്‍, ഉയര്‍ന്ന വകഭേദത്തില്‍ ആറ് എയര്‍ബാഗുകള്‍, ഇലക്ട്രോണിക്സ് സ്റ്റെബിലിറ്റി പ്രോഗ്രാം തുടങ്ങിയ സുരക്ഷ സംവിധാനങ്ങളും ഇതില്‍ നല്‍കുന്നുണ്ട്.
എക്സ്റ്റീരിയറിലെ ഡിസൈന്‍ മാറ്റത്തിന്റെ സൂചന നല്‍കിയാണ് ടീസറുകള്‍ പുറത്തുവിട്ടിട്ടുള്ളത്. പുതിയ ഡിസൈനില്‍ കൂടുതല്‍ വലിപ്പത്തിലുള്ള ഗ്രില്ലാണ് ബൊലേനോയില്‍ പുതുമയുള്ള മുഖമൊരുക്കുന്നത്. ആകര്‍ഷകമായ ഡിസൈനില്‍ എല്‍.ഇ.ഡിയില്‍ ഒരുങ്ങിയിട്ടുള്ള ഹെഡ്ലാമ്പും ഡി.ആര്‍.എല്ലും മുഖസൗന്ദര്യത്തിന് മാറ്റുകൂട്ടും. പുതിയ അലോയി വീലുകള്‍, രൂപമാറ്റം വരുത്തിയിട്ടുള്ള ടെയ്ല്‍ഗേറ്റ്, മികച്ച ഡിസൈനില്‍ നല്‍കുന്ന എല്‍.ഇ.ഡി. ടെയ്ല്‍ലാമ്പ് എന്നിവയാണ് പുറംമോടിയിലെ പുതുമകള്‍.
മെക്കാനിക്കലായ മാറ്റം ട്രാന്‍സ്മിഷനിലാണ്. ബൊലേനോയുടെ ഓട്ടോമാറ്റിക് പതിപ്പില്‍ നല്‍കിയിരുന്ന സി.വി.ടി. ട്രാന്‍സ്മിഷന്‍ ഈ വാഹനത്തിന്റെ മറ്റൊരു ആകര്‍ഷണമായിരുന്നു. പുതിയ പതിപ്പില്‍ എ.എം.ടിയായിരിക്കും ഓട്ടോമാറ്റിക്കില്‍ നല്‍കുകയെന്നാണ് വിവരം. എന്‍ജിനില്‍ മാറ്റം വരുത്തുന്നില്ലെന്നാണ് വിവരം. 83 ബി.എച്ച്.പി. പവര്‍ ഉത്പാദിപ്പിക്കുന്ന 1.2 ലിറ്റര്‍ പെട്രോള്‍, മൈല്‍ഡ് ഹൈബ്രിഡ് സാങ്കേതികവിദ്യയുടെ അകമ്പടിയുള്ള 1.2 ലിറ്റര്‍ ഡ്യുവല്‍ജെറ്റ് പെട്രോള്‍ എന്നിവയാണ് എന്‍ജിന്‍.
Content Highlights: Maruti Suzuki Baleno Facelift Model Launch Soon, 11 new features and AMT Gearbox
Also Watch
RELATED STORIES
.jpg?$p=763558a&f=1x1&w=100&q=0.8)
IN CASE YOU MISSED IT
.jpg?$p=03702f3&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..