നിരത്തൊഴിഞ്ഞ് വര്‍ഷങ്ങള്‍ പിന്നിട്ടിട്ടും ഇന്നും ഡിമാന്‍ഡ്‌ കുറഞ്ഞിട്ടില്ലാത്ത വാഹനമാണ് മാരുതി 800. മാരുതിയുടെ എന്‍ട്രി ലെവല്‍ വാഹനമായിരുന്ന 800-നെ വിശ്രമത്തിനയച്ചാണ് ആള്‍ട്ടോ 800 ഈ സ്ഥാനത്തേക്ക് എത്തിയത്. എന്നാല്‍, ഈ വാഹനത്തിനും താഴെയായി 800 സിസി എന്‍ജിനില്‍ മാരുതിയുടെ പുതിയ മോഡല്‍ എത്താനൊരുങ്ങുന്നതായി റിപ്പോര്‍ട്ട്.
മാരുതിയുടെ ഏറ്റവും പുതിയ മോഡലുകളായ എസ്-പ്രൊസോ, വാഗണ്‍ ആര്‍ മോഡലുകള്‍ക്ക് അടിസ്ഥാനമൊരുക്കുന്ന ഹാര്‍ട്ട്‌ടെക്ട്-കെ പ്ലാറ്റ്‌ഫോമിലായിരിക്കും പുതിയ എന്‍ട്രി ലെവല്‍ വാഹനവുമൊരുങ്ങുക. 47 ബിഎച്ച്പി പവറും 69 എന്‍എം ടോര്‍ക്കുമേകുന്ന ബിഎസ്-6 നിലവാരത്തിലുള്ള 800 സിസി എന്‍ജിനായിരിക്കും ഈ വാഹനത്തിന് കരുത്തേകുകയെന്നാണ് സൂചന.
രൂപത്തില്‍ നിരത്തൊഴിഞ്ഞ മാരുതിയുമായി സാമ്യമുണ്ടെങ്കിലും എതിരാളികളുമായി മത്സരിക്കുന്നതിനായി പുതുതലമുറ ഫീച്ചറുകള്‍ ഈ വാഹനത്തില്‍ ഇടംനേടും. സുരക്ഷ ഉറപ്പാക്കുന്നതിനായി ഡ്യുവല്‍ എയര്‍ബാഗും എബിഎസ്, ഇബിഡി, റിവേഴ് പാര്‍ക്കിങ്ങ് സെന്‍സര്‍, സീറ്റ് ബെല്‍റ്റ് റിമൈന്‍ഡര്‍, സ്പീഡ് അലേര്‍ട്ട് എന്നിവ സ്റ്റാന്റേഡായി ഈ വാഹനത്തില്‍ നല്‍കും.
നിലവില്‍ ആള്‍ട്ടോ 800-ന്റെ എതിരാളികളായ റെനോ ക്വിഡ്, ഡാറ്റ്‌സണ്‍ റെഡി-ഗോ, ഹ്യുണ്ടായി ഇയോണ്‍ തുടങ്ങിയ വാഹനങ്ങളായിരിക്കും മാരുതിയുടെ പുതിയോ മോഡലിന്റെയും എതിരാളി. ക്വിഡിനെയും റെഡി-ഗോയെയും പോലെ മാരുതിയുടെ എന്‍ട്രി ലെവല്‍ മോഡലിലും ഓട്ടോമാറ്റിക്, മാനുവല്‍ ട്രാന്‍സ്മിഷന്‍ ഓപ്ഷനുകള്‍ നല്‍കിയേക്കും.
അതേസമയം, ഇക്കാര്യത്തില്‍ മാരുതിയുടെ ഔദ്യോഗിക സ്ഥിരീകരണമുണ്ടായിട്ടില്ല. 2022-ന് ശേഷമായിരിക്കും ഈ വാഹനം നിര്‍മിക്കുകയെന്നാണ് വിവരം. അതേസമയം, മാരുതി സുസുക്കി ജിമ്‌നി, എക്‌സ്എല്‍-5, മാരുതി ഇലക്ട്രിക് മോഡല്‍ തുടങ്ങിയ വാഹനങ്ങളാണ് വൈകാതെ പുറത്തിറങ്ങാനുള്ളത്.
Source: India Car News
Content Highlights: Maruti Planning To Introduce New 800CC Entry Level Car
