മുഖം മിനുക്കലിനായി പോയ മഹീന്ദ്രയുടെ എക്‌സ്.യു.വി.500 എന്ന എസ്.യു.വി. മുഖം മിനുക്കിയതിനൊപ്പം പേരും മാറിയാണ് എത്തുന്നതെന്ന് അടുത്തിടെ മഹീന്ദ്ര സൂചിപ്പിച്ചിരുന്നു. എക്‌സ്.യു.വി.700-എന്ന പേരിലായിരിക്കും ഈ വാഹനമെത്തുകയെന്നാണ് മഹീന്ദ്ര പുറത്തുവിട്ട ടീസറില്‍ സൂചിപ്പിക്കുന്നത്. എന്നാല്‍, ഏറ്റവും പുതിയ റിപ്പോര്‍ട്ട് അനുസരിച്ച് 11 വേരിയന്റുകളില്‍ ഈ വാഹനം എത്തുമെന്നാണ് വിവരം.

പെട്രോള്‍-ഡീസല്‍ എന്‍ജിനുകള്‍, ഓട്ടോമാറ്റിക്-മാനുവല്‍ ട്രാന്‍സ്മിഷന്‍, ഫോര്‍ വീല്‍ ഡ്രൈവ്-ടൂ വീല്‍ ഡ്രൈവ് സംവിധാനം തുടങ്ങിയവയുടെ അടിസ്ഥാനത്തിലായിരിക്കും 11 വേരിയന്റുകള്‍ നല്‍കുക. എക്‌സ്.യു.വി.500 പുതിയ പേര് സ്വീകരിക്കുന്നതോടെ ഈ പേരില്‍ മഹീന്ദ്രയുടെ അഞ്ച് സീറ്റര്‍ എസ്.യു.വിയെ നിരത്തുകളില്‍ പ്രതീക്ഷിക്കാമെന്നും റിപ്പോര്‍ട്ടുകളുണ്ട്. 

W601 എന്ന കോഡ് നാമത്തിലാണ് മഹീന്ദ്ര എക്സ്.യു.വി.700 വികസിപ്പിക്കുന്നത്. മഹീന്ദ്രയുടെ ഏറ്റവും മികച്ച ഡിസൈനിലും ഫീച്ചറുകളിലും സുരക്ഷ സംവിധാനത്തിലുമായിരിക്കും ഈ വാഹനം ഒരുങ്ങുകയെന്നാണ് നിര്‍മാതാക്കള്‍ പുറത്തുവിട്ട വീഡിയോയില്‍ പറയുന്നത്. 200-ല്‍ അധികം ഡിസൈനുകളില്‍ നിന്ന് തിരഞ്ഞെടുത്ത ഏറ്റവും മികച്ച ഡിസൈനാണ് എക്സ്.യു.വി.700-നായി പരിഗണിച്ചിട്ടുള്ളത്. 

മഹീന്ദ്രയുടെ ഗ്ലോബല്‍ പ്ലാറ്റ്ഫോമിനെ അടിസ്ഥാനമാക്കി ഒരുങ്ങുന്ന ഈ എസ്.യു.വിയിക്ക് ലോകോത്തര നിലവാരമാണ് മഹീന്ദ്ര നല്‍കുന്ന ഉറപ്പ്. നവീന സാങ്കേതികവിദ്യയില്‍ അധിഷ്ഠിതമായതും സെഗ്മെന്റിലെ തന്നെ ആദ്യത്തേതുമായി നിരവധി ഫീച്ചറുകളാണ് ഈ വാഹനത്തില്‍ മഹീന്ദ്ര ഒരുക്കുന്നത്. വലിപ്പത്തില്‍ എക്സ്.യു.വി.500-നെക്കാള്‍ വലിയതായിരിക്കും വരാനിരിക്കുന്ന മോഡല്‍. 

പെട്രോള്‍ ഡീസല്‍ എന്‍ജിനുകളില്‍ എത്തുന്ന ഈ വാഹനത്തില്‍ മഹീന്ദ്ര ഥാറിന് കരുത്തേകുന്ന 2.0 ലിറ്റര്‍ എംസ്റ്റാലിന്‍ ടി-ജി.ഡി.ഐ. പെട്രോള്‍ എന്‍ജിനും 2.2 ലിറ്റര്‍ എംഹോക്ക് ഡീസല്‍ എന്‍ജിനിലുമായിരിക്കും നല്‍കുക. ഇതിനൊപ്പം ഓട്ടോമാറ്റിക്, മാനുവല്‍ ഗിയര്‍ബോക്സുകളും ഇതില്‍ ട്രാന്‍സ്മിഷന്‍ ഒരുക്കും. അഡ്വാന്‍സ്ഡ് ഡ്രൈവര്‍ അസിസ്റ്റന്‍സ് സിസ്റ്റം ഉള്‍പ്പെടെ ഇതില്‍ സുരക്ഷയൊരുക്കും.

Source: Team BHP

Content Highlights: Mahindra XUV700 Will Come In 11 Variants