ന്ത്യന്‍ വാഹനനിര്‍മാതാക്കളായ മഹീന്ദ്രയുടെ നാസിക്കിലെ പ്ലാന്റില്‍ നിര്‍മിക്കുന്ന വാഹനങ്ങളുടെ എണ്ണം 25 ലക്ഷത്തിലെത്തി. മഹീന്ദ്രയുടെ എസ്‌യുവി മോഡലായ സ്‌കോര്‍പിയോയുടെ നിര്‍മാണം പൂര്‍ത്തിയാക്കിയതോടെയാണ് 25 ലക്ഷം എന്ന നാഴികക്കല്ല് താണ്ടിയിരിക്കുന്നത്. 

1981-ലാണ് മഹീന്ദ്രയുടെ നാസിക്കിലെ പ്ലാന്റ് പ്രവര്‍ത്തനം ആരംഭിക്കുന്നത്. എഫ്‌ജെ മിനി ബസാണ് ഈ പ്ലാന്റില്‍ ആദ്യമായി നിര്‍മിക്കുന്ന വാഹനം. ആദ്യ കാലങ്ങളില്‍ പ്രതിദിനം എട്ട് വാഹനങ്ങള്‍ നിര്‍മിച്ചിരുന്ന സ്ഥാനത്ത് ഇപ്പോള്‍ ദിവസാന 700 വാഹനങ്ങളാണ് ഇവിടെ നിര്‍മിക്കുന്നത്. 

പ്രതിവര്‍ഷം 2,10,000 യൂണിറ്റ് ഉത്പാദന ശേഷിയുള്ള നാസിക്കിലെ ഈ പ്ലാന്റ് 147 ഏക്കര്‍ സ്ഥലത്താണ് വ്യാപിച്ച് കിടക്കുന്നത്. സ്‌കോര്‍പിയോ, മരാസോ, എക്‌സ്‌യുവി 300, ബൊലേറൊ, ഇ-വെറിറ്റോ, ഥാര്‍, സ്‌പോര്‍പിയോ എസ്‌സി/ഡിസി തുടങ്ങിയ മോഡലുകളെല്ലാം ഈ പ്ലാന്റിലാണ് നിര്‍മിക്കുന്നത്.

മഹീന്ദ്ര ഇന്ത്യയില്‍ നിര്‍മിക്കുന്ന വാഹനങ്ങള്‍ 34-ല്‍ അധികം രാജ്യങ്ങളിലേക്ക് കയറ്റുമതി ചെയ്യുന്നുണ്ട്. ഇതില്‍ ഈ പ്ലാന്റില്‍ നിര്‍മിക്കുന്ന വാഹനങ്ങളും ഉള്‍പ്പെടുന്നുണ്ട്. ഈ പ്ലാന്റില്‍ നിന്ന് മഹീന്ദ്രയുടെ ഇലക്ട്രിക് വാഹനങ്ങളും നിര്‍മിക്കുന്നുണ്ടെന്നാണ് റിപ്പോര്‍ട്ട്.

നാസിക്കിലെ പ്ലാന്റിലെ ഒരോ ജീവനക്കാരന്റെയും അധ്വാനത്തിന്റെ ഫലമാണ് ഈ നേട്ടം. ഇത് ഓട്ടോ മൊബൈല്‍ മേഖലയിലെ മഹീന്ദ്രയുടെ കുതിപ്പിന് വീണ്ടും കരുത്ത് പകരുമെന്നും മഹീന്ദ്ര ഓട്ടോമോട്ടീവ് ഡിവിഷന്‍ മേധാവി വിജയ് കല്‍റാ അഭിപ്രായപ്പെട്ടു.

Content Highlights: Mahindra Makes 25 Lakh Unit Vehicle In Nashik Plant