മെയ്ക്ക് ഇന്‍ ഇന്ത്യയുടെ ഭാഗമായി കൊറിയന്‍ വാഹന നിര്‍മാതാക്കളായ കിയാ മോട്ടോര്‍സ് ആന്ധ്രാപ്രദേശില്‍ നിര്‍മാണ ശാല ആരംഭിക്കാനുള്ള പ്രാരംഭഘട്ട പ്രവര്‍ത്തനത്തിലാണ്. രണ്ടു വര്‍ഷത്തിനുള്ളില്‍ ആദ്യ മോഡല്‍ പുറത്തിറങ്ങാനാണ് സാധ്യത. ഇതിനു മുന്നോടിയായി വരാനിരിക്കുന്ന 2018 ഡല്‍ഹി ഓട്ടോ എക്‌സ്‌പോയില്‍ ഇന്ത്യ സ്‌പെക്ക് മോഡലുകള്‍ കമ്പനി ഔദ്യോഗികമായി അവതരിപ്പിച്ചേക്കും. ഒരു കോംപാക്ട് എസ്.യു.വിയും മിഡ്-സൈസ്ഡ് സെഡാനുമാണ് ആദ്യഘട്ടത്തില്‍ അവതരിപ്പിക്കുകയെന്ന് നേരത്തെ കിയ മോട്ടോര്‍സ് ഔദ്യോഗികമായി വ്യക്തമാക്കിയിരുന്നു. ഇതില്‍ സെഡാന്‍ ശ്രേണിയില്‍ അവതരിക്കുക ആഗോള വിപണിയിലെ ബെസ്റ്റ് സെല്ലിങ് റിയോ ആകാനാണ് സാധ്യത.
കഴിഞ്ഞ ജനീവ മോട്ടോര്‍ ഷോയില്‍ പുതുതലമുറ റിയോ പതിപ്പ് കിയ മോട്ടോര്‍സ് അവതരിപ്പിച്ചത്. ഹ്യുണ്ടായി ഐ20 പ്ലാറ്റ്‌ഫോമിലാണ് റിയോ സെഡാന്റെ നിര്‍മാണം. ഹോണ്ട സിറ്റി, മാരുതി സുസുക്കി സിയാസ് എന്നിവയാകും ഇന്ത്യന്‍ വിപണയില്‍ റിയോയുടെ എതിരാളികള്‍. 1.6 ലിറ്റര്‍ GDI പെട്രോള്‍ എഞ്ചിനാണ് ആഗോള വിപണിയില്‍ നാലാം തലമുറ റിയോയെ നയിക്കുക. 128 ബിഎച്ച്പി കരുത്തും 161 എന്‍എം ടോര്‍ക്കുമേകും ഈ എഞ്ചിന്‍. തുടക്കത്തില്‍ 40 ശതമാനത്തോളം പ്രാദേശികമായാണ് നിര്‍മാണം നടക്കുക. ഇതിനൊപ്പം ഉപകമ്പനിയായ ഹ്യുണ്ടായിയുടെ മെക്കാനിക്കല്‍ അസിസ്റ്റന്‍സ് കിയ മോഡലുകളുടെ വില അധികം ഉയരാതെ പിടിച്ചുനിര്‍ത്തും. ഏകദേശം 8-11 ലക്ഷത്തിനുള്ളിലാകും റിയോ സെഡാന്റെ വിപണി വില.
ഫോര്‍ സിലിണ്ടര്‍ ഫ്യുവല്‍ ഇഞ്ചക്റ്റട് എഞ്ചിന്‍ കൂടുതല്‍ ഇന്ധനക്ഷമതയും നല്‍കും. മാനുവല്‍, ഓട്ടോമാറ്റിക്ക് ട്രാന്‍സ്മിഷനില്‍ റിയോ ലഭ്യമാകും. ഇന്ത്യ സ്‌പെക്കിന്റെ കൃത്യമായ മെക്കാനിക്കല്‍ ഫീച്ചേര്‍സ് കമ്പനി വ്യക്തമാക്കിയിട്ടില്ല. ഹ്യുണ്ടായി വെര്‍ണയ്ക്ക് സാമനമായി 1.6 ലിറ്റര്‍ എഞ്ചിനൊപ്പം 1.4 ലിറ്റര്‍ എഞ്ചിനും ഇങ്ങോട്ടെത്താനാണ് സാധ്യത. ടൈഗര്‍ നോസ് ഗ്രില്‍ പതിവ് സെഡാന്‍ മുഖങ്ങളില്‍നിന്ന് റിയോയെ വേറിട്ടുനിര്‍ത്തും. സ്റ്റാന്റേര്‍ഡ് വെഹിക്കില്‍ സ്‌റ്റെബിലിറ്റി മാനേജ്‌മെന്റ്, ആറ് എയര്‍ബാഗ് എന്നിവ വാഹനത്തിലുണ്ടാകും. 4370 എംഎം നീളവും 1720 എംഎം വീതിയും 1455 എംഎം ഉയരവും 2570 വീല്‍ബേസും 165 എംഎം ഗ്രൗണ്ട് ക്ലിയറന്‍സുമായി വാഹനത്തിനുള്ളത്. 2020 മുതല്‍ ഇന്ത്യയില്‍ പ്രതിവര്‍ഷം മൂന്ന് ലക്ഷം കാറുകള്‍ ഉത്പാദിപ്പിക്കുകയാണ് കിയ മോട്ടോര്‍സിന്റെ ലക്ഷ്യം.
