സമ്മാനമായി നൽകിയ കാറുകൾ | Photo: Facebook/Ideas 2IT
ജീവനക്കാര്‍ക്ക് ഒരു കോടി രൂപ വില വരുന്ന വാഹനങ്ങൾ നല്‍കിയ ഐ.ടി. കമ്പനി ഉടമ കഴിഞ്ഞ ദിവസം ജനങ്ങളുടെ കൈയടി നേടിയിരുന്നു. അദ്ദേഹം അഞ്ച് ജീവനക്കാര്‍ക്കാണ് ആഡംബര വാഹനം സമ്മാനിച്ചതെങ്കില്‍ തന്റെ കമ്പനിയിലെ 100 ജീവനക്കാര്‍ക്ക് മാരുതിയുടെ പല മോഡൽ കാറുകൾ സമ്മാനമായി നല്‍കിയിരിക്കുകയാണ് ചെന്നൈ ആസ്ഥാനമായി പ്രവര്‍ത്തിക്കുന്ന ഐഡിയാസ് ടു ഐ.ടി. എന്ന ഐ.ടി. കമ്പനി. കമ്പനിയിലെ ഏറ്റവും സമര്‍ഥരായ ജീവനക്കാരെയാണ് ഈ സമ്മാനം തേടിയെത്തിയടത്.
ബലേനോ, ഇഗ്നീസ്, സ്വിഫ്റ്റ്, സിയാസ്, വിത്താര ബ്രെസ, എര്‍ട്ടിഗ, എക്‌സ്.എല്‍.6 തുടങ്ങി മാരുതിയുടെ വാഹന നിരയിലെ എല്ലാ വാഹനങ്ങളും അദ്ദേഹം തന്റെ ജീവനക്കാര്‍ക്ക് സമ്മാനിച്ചിട്ടുണ്ട്. വാഹനങ്ങള്‍ക്ക് പുറമെ, സ്വര്‍ണനാണയം, ആപ്പിള്‍ ഐഫോണ്‍ തുടങ്ങിയ സമ്മാനങ്ങളും ജീവനക്കാരെ തേടി എത്തിയിട്ടുണ്ട്. പാരിതോഷികം നല്‍കുന്നതിനായി 15 കോടി രൂപയാണ് കമ്പനിയുടെ മേധാവി ചെലവിട്ടതെന്നാണ് റിപ്പോര്‍ട്ടുകള്‍. എന്നാല്‍, ഈ സമ്മാനങ്ങള്‍ ഒരു തുടക്കം മാത്രമാണെന്നാണ് കമ്പനി മേധാവി അറിയിച്ചിരിക്കുന്നത്.
ഐഡിയാസ് ടു ഐ.ടി. കമ്പനിയുടെ സ്ഥാപകനും ചെയര്‍മാനുമായ മുരളി വിവേകാനന്ദനും അദ്ദേഹത്തിന്റെ ഭാര്യയും കമ്പനി സി.ഇ.ഒയുമായ ഗായത്രിയും ചേര്‍ന്നാണ് ജീവനക്കാര്‍ക്കുള്ള സമ്മാനം വിതരണം ചെയ്തത്. കഴിഞ്ഞ നാല് വര്‍ഷത്തിനിടയില്‍ കമ്പനിയുടെ വാര്‍ഷിക വരുമാനത്തില്‍ 56 ശതമാനത്തിന്റെ വര്‍ധനവുണ്ടായെന്നും ജീവനക്കാരുടെ അധ്വാനത്തിലൂടെയാണ് ഈ വളര്‍ച്ച കൈവരിച്ചതെന്നുമാണ് കമ്പനി അറിയിച്ചത്. ജീവനക്കാര്‍ വഴി ലഭിച്ച ലാഭത്തിന്റെ ഒരു വിഹിതമാണ് അവര്‍ക്ക് നല്‍കിയതെന്നും കമ്പനി അധികൃതര്‍ അറിയിച്ചു.
സ്വന്തം തൊഴിലിടത്തില്‍ നിന്ന് സമ്മാനങ്ങള്‍ ലഭിക്കുന്നത് ഏറെ സന്തോഷവും അഭിമാനവുമുള്ള കാര്യമായാണ് കാണുന്നത്. മുമ്പും കമ്പനിയില്‍ നിന്ന് സ്വര്‍ണ നാണയങ്ങളും ഐഫോണും ഉള്‍പ്പെടെയുള്ള സമ്മാനങ്ങള്‍ ജീവനക്കാരെ തേടി എത്തിയിട്ടുണ്ട്. ഇപ്പോള്‍ ലഭിച്ചിട്ടുള്ള ഈ കാറുകള്‍ വിലമതിക്കാനാവാത്ത സമ്മാനമായാണ് കാണുന്നതെന്ന് ജീവനക്കാര്‍ അഭിപ്രായപ്പെട്ടു. ഫെയ്‌സ്ബുക്ക്, മൈക്രോസോഫ്റ്റ് തുടങ്ങിയ കമ്പനികളുമായി ചേര്‍ന്ന് പ്രവര്‍ത്തിക്കുന്ന സ്ഥാപനമാണ് ഐഡിയാസ് ടു ഐ.ടി.
കഴിഞ്ഞ ദിവസമാണ് ചെന്നൈയിലെ തന്നെ മറ്റൊരു ഐ.ടി. സ്ഥാപനമായ കിസ്ഫ്‌ളോ പത്താം വാര്‍ഷികാഘോഷങ്ങളുടെ ഭാഗമായി കമ്പനിയിലെ മുതിര്‍ന്ന അഞ്ച് ജീവനക്കാര്‍ക്ക് ബി.എം.ഡബ്ല്യു 3 സീരീസ് ആഡംബര വാഹനങ്ങള്‍ സമ്മാനിച്ചത്. കമ്പനിയുടെ തുടക്കം മുതല്‍ സ്ഥാപനത്തിന്റെ വളര്‍ച്ചയ്ക്കായി അധ്വാനിച്ച ജീവനക്കാരെ ആദരിക്കുന്നതിന്റെ ഭാഗമായാണ് ഈ ആഡംബര വാഹനങ്ങള്‍ സമ്മാനിച്ചത്. 80 ലക്ഷം രൂപ മുതല്‍ ഒരു കോടി രൂപ വരെ വിലയുള്ള വാഹനങ്ങളാണ് കിസ്ഫ്‌ളോ സമ്മാനമായി നല്‍കിയത്.
Content Highlights: Ideas 2IT company gifts 100 Maruti Cars To their employees, 100 Maruti Vehicles
Also Watch
RELATED STORIES
IN CASE YOU MISSED IT
.jpg?$p=cf32acb&f=1x1&w=100&q=0.8)
.jpg?$p=343adfb&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..