ന്ത്യയിലെ ഹാച്ച്ബാക്ക് ശ്രേണിക്കൊപ്പം കരുത്താര്‍ജിക്കുന്ന മറ്റൊരു സെഗ്മെന്റാണ് കോംപാക്ട് എസ്‌യുവി. കഴിഞ്ഞ ഏതാനും വര്‍ഷങ്ങള്‍ക്കുള്ളില്‍ നിരവധി വാഹനങ്ങളാണ് ഈ ശ്രേണിയില്‍ എത്തിയിട്ടുള്ളത്. ഈ കൂട്ടത്തിലേക്ക് കരുത്തോടെ എത്താനൊരുങ്ങുകയാണ് ഹോണ്ടയും. 

എസ്‌യുവി ശ്രേണിയിലേക്ക് കൂടുതല്‍ വാഹനം എത്തിക്കുമെന്നാണ് ഹോണ്ട അറിയിച്ചിട്ടുള്ളത്. ഇന്ത്യയിലെ കരുത്തരായ ഹ്യുണ്ടായി ക്രെറ്റ, നിസാന്‍ കിക്‌സ് എന്നീ വാഹനങ്ങളുമായി കൊമ്പുകോര്‍ക്കാന്‍ ആഗോള നിരത്തിലെ ഹോണ്ടയുടെ താരമായ എച്ച്ആര്‍-വിയെ ഇന്ത്യയിലെത്തിച്ചേക്കുമെന്നാണ് സൂചന.

ഡബ്ല്യുആര്‍-വിക്ക് മുകളില്‍ ഒരു എസ്‌യുവി എത്തിക്കുമെന്ന് ഹോണ്ട മുമ്പ് അറിയിച്ചിരുന്നു. അതുകൊണ്ടുതന്നെ ഈ വാഹനം എച്ച്ആര്‍-വി ആയിരിക്കുമെന്നാണ് അഭ്യൂഹങ്ങള്‍. ജാസിന്റെ പ്ലാറ്റ്‌ഫോമില്‍ ഒരുങ്ങുന്ന ഈ വാഹനം ഏറെ സ്‌റ്റൈലിഷും കരുത്തനുമാണ്. 

ഡബ്ല്യുആര്‍-വിയോട് നേരിയ സാമ്യമുള്ള വാഹനമാണ് എച്ച്ആര്‍വി. വലിയ ഗ്രില്‍, എല്‍ഇഡി ഹെഡ്ലാമ്പ്, മികച്ച ഡിസൈന്‍ നല്‍കിയിട്ടുള്ള ബംമ്പര്‍ എന്നിവയാണ് ഈ വാഹനത്തിന് അഴക് നല്‍കുന്നത്. 17 ഇഞ്ച് അലോയി വീലാണ് ഈ എച്ച്ആര്‍-വിയിലുള്ളത്.

Honda HR-V

ബെയ്ജ്-ബ്ലാക്ക് ഡ്യുവല്‍ ടോണ്‍ ഇന്റീരിയറാണ് എച്ച്ആര്‍-വിയുടേത്. 8.0 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, 5 സ്പീക്കര്‍ ഓഡിയോ സിസ്റ്റം, റിവേഴ്സിങ് ക്യാമറ, പനോരമിക് സണ്‍റൂഫ്, മടക്കിവയ്ക്കാവുന്ന റിയര്‍ സീറ്റ് എന്നിവയടങ്ങുന്നതാണ് എച്ച്ആര്‍-വിയുടെ ഇന്റീരിയര്‍.

ആറ് എയര്‍ബാഗ്, ആന്റി ലോക്ക് ബ്രേക്കിങ് സിസ്റ്റം, ഇലക്ട്രോണിക് ബ്രേക്ക് ഡിസ്ട്രിബ്യൂഷന്‍, ബ്രേക്ക് അസിസ്റ്റ് എന്നിവയാണ് ആഗോള നിരത്തുകളിലെ എച്ച്ആര്‍-വിയില്‍ സുരക്ഷയൊരുക്കുന്നത്.  

1.5 ലിറ്റര്‍ പെട്രോള്‍, 1.6 ലിറ്റര്‍ ഡീസല്‍ എന്‍ജിനുകളിലാണ് എച്ച്ആര്‍വി എത്തുന്നത്. പെട്രോള്‍ എന്‍ജിന്‍ 120 എച്ച്പി പവറും 145 എന്‍എം ടോര്‍ക്കുമേകും. ഡീസല്‍ എന്‍ജിന്‍ 118 ബിഎച്ച്പി കരുത്തും 300 എന്‍എം ടോര്‍ക്കുമേകും 6 സ്പീഡ് മാനുവല്‍/സിവിടിയാണ് ട്രാന്‍സ്മിഷന്‍.

Content Highlights: Honda To Launch HR-V And More SUVs In India