മഹീന്ദ്രയുടെ എക്‌സ്‌യുവി 500 സ്വന്തമാക്കണമെന്ന് ആഗ്രഹിക്കാത്തവരുണ്ടാവില്ല. ഈ വാഹനത്തിന്റെ സൗന്ദര്യവും തലയെടുപ്പും എല്ലാ വാഹനപ്രേമികളെയും ഏറെ ആകര്‍ഷിച്ചിട്ടുള്ളവയാണ്. എന്നാല്‍, ഈ വാഹനം സ്വന്തമാക്കാനാഗ്രഹിക്കുന്നവര്‍ക്ക് ആകര്‍ഷകമായ ഓഫര്‍ ഒരുക്കുകയാണ് മഹീന്ദ്ര.
അടുത്തിടെ എക്‌സ്‌യുവി-500 മുഖം മിനുക്കിയെത്തിയിരുന്നു. സ്വഭാവികമായും ഇതിന് മുമ്പ് കമ്പനി പുറത്തിറക്കിയ മോഡല്‍ വിപണിയില്‍ നിന്ന് തഴയപ്പെടുകയായിരുന്നു. ഈ പഴയ മോഡല്‍ വാഹനങ്ങളാണ് ഒരു ലക്ഷം രൂപ വരെ ആനുകൂല്യം നല്‍കി വില്‍ക്കാന്‍ കമ്പനി ഒരുങ്ങുന്നത്.
എക്‌സ്‌യുവി 500-ന്റെ ടോപ്പ് എന്‍ഡ് വേരിയന്റായ ഡബ്ല്യു-10 ന്റെ ഓട്ടോമാറ്റിക്, മാനുവല്‍ മോഡലുകള്‍ക്ക് കമ്പനി ഒരു ലക്ഷം രൂപ വരെയാണ് വില ഇളവ് പ്രഖ്യാപിച്ചിരിക്കുന്നത്. സണ്‍ റൂഫ്, റിവേഴ്‌സ് പാര്‍ക്കിങ് ക്യാമറ, ബ്ലാക്ക് തീം ഇന്റീരിയര്‍ എന്നിവ ഈ മോഡലിലെ മാത്രം പ്രത്യേകതയാണ്.
എക്‌സ്‌യുവി-500-ന്റെ ഡബ്ല്യു4, ഡബ്ല്യു6, ഡബ്ല്യു8, ഡബ്ല്യു9 വേരിയന്റുകള്‍ക്ക് 91,000 രൂപയുടെയും ആനുകൂല്യങ്ങള്‍ പ്രഖ്യാപിച്ചിട്ടുണ്ട്. എക്‌സ്‌യുവി 500 ഡബ്ല്യു 6 ഓട്ടോമാറ്റിക് മോഡലിന് ഡിസ്‌കൗണ്ട് കുറച്ച് 17.5 ലക്ഷം രൂപയ്ക്ക് നിരത്തിലെത്തിക്കാന്‍ സാധിക്കും.
എക്‌സ്‌യുവിക്ക് പുറമെ, സ്‌കോര്‍പിയോ, കെയുവി100, എന്നീ വാഹനങ്ങള്‍ക്കും ആനുകൂല്യങ്ങള്‍ പ്രഖ്യാപിച്ചിട്ടുണ്ട്. 20,000 മുതല്‍ 40,000 വരെ വില കുറവാണ് പ്രഖ്യാപിച്ചിരിക്കുന്നത്. സ്‌കോര്‍പിയോയുടെ ടോപ്പ് എന്‍ഡ് വേരിയന്റായ എസ്-11 ന് 20,000 രൂപയുടെ വിലകുറവ് പ്രഖ്യാപിച്ചിട്ടുണ്ട്.
Content Highlights: Heavy Discounts On Mahindra SUVs
Subscribe
Subscribe
