പ്രതീകാത്മക ചിത്രം | Photo: Audi India
ലോകത്തുടനീളമുള്ള വാഹന വിപണിയില്‍ വിപ്ലവകരമായ ഒരു മാറ്റത്തിനാണ് ഈ പതിറ്റാണ്ട് സാക്ഷ്യം വഹിക്കുന്നത്. പരമ്പരാഗത ഇന്ധനങ്ങളിലുള്ള വാഹനങ്ങള്‍ക്ക് പകരം നിര്‍മാതാക്കളില്‍ ഭൂരിഭാഗവും ഇലക്ട്രിക് കരുത്തിലുള്ള വാഹനത്തിന്റെ നിര്‍മാണത്തിലേക്ക് മാറുകയാണ്. വോള്‍വോ, ലാന്‍ഡ് റോവര്‍ തുടങ്ങിയ വാഹനങ്ങളുടെ ഇലക്ട്രിക് പ്രഖ്യാപനത്തിന് പിന്നാലെ പൂര്‍ണമായും ഇലക്ട്രിക്കിലേക്ക് മാറാനൊരുങ്ങുകയാണ് ജര്‍മന്‍ വാഹന നിര്‍മാതാക്കളായ ഔഡി
2026-ഓടെ പൂര്‍ണമായും ഇലക്ട്രിക്ക് കരുത്തിലേക്ക് മാറുമെന്നാണ് ഔഡി അറിയിച്ചിരിക്കുന്നതെന്നാണ് റിപ്പോര്‍ട്ട്. അടുത്ത അഞ്ച് വര്‍ഷത്തിനുള്ളില്‍ പരമ്പരാഗത ഇന്ധനങ്ങളിലുള്ള വാഹനങ്ങളുടെ നിര്‍മാണം അവസാനിപ്പിച്ചേക്കുമെന്നാണ് വിവരം. 2026-ന് ശേഷം പെട്രോള്‍-ഡീസല്‍ എന്‍ജിനുകളിലുള്ള പുതിയ മോഡലുകള്‍ ഔഡി അവതരിപ്പിക്കില്ല. ഈ വാഹനങ്ങള്‍ക്ക് പുറമെ, ഹൈബ്രിഡ് വാഹനങ്ങളുടെ ഉത്പാദനവും അവസാനിപ്പിച്ചായിരിക്കും ഇലക്ട്രിക് പ്രവേശനം.
വാഹനങ്ങള്‍ പൂര്‍ണമായും ഇലക്ട്രിക് കരുത്തിലേക്ക് മാറുന്നത് സംബന്ധിച്ച് ഔഡി സി.ഇ.ഒ. മര്‍കസ് ഡ്യൂസ്മാന്‍ സ്ഥിരീകരിച്ചതായി ജര്‍മന്‍ വാര്‍ത്ത മാധ്യമങ്ങള്‍ റിപ്പോര്‍ട്ട് ചെയ്തിരുന്നു. മലിനീകരണ നിയന്ത്രണ മാനദണ്ഡമായ യൂറോ-7 എമിഷന്‍ മാനദണ്ഡത്തിലേക്ക് മാറുന്നതിന് അനുസൃതമായായിരിക്കും ഔഡി പൂര്‍ണമായും വൈദ്യുതീകരണത്തിലേക്ക് പോകുന്നതെന്നും ജര്‍മന്‍ മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. 2025-ലാണ് യൂറോ-7 പ്രാബല്യത്തില്‍ വരുന്നത്.
ഫോക്‌സ്‌വാഗണ്‍ ഗ്രൂപ്പിന്റെ ഇലക്ട്രിഫിക്കേഷന്‍ പദ്ധതിയുടെ ഭാഗമായി 2025-ഓടെ 20 ഇലക്ട്രിക് വാഹനങ്ങള്‍ പുറത്തിറക്കുമെന്ന് മുമ്പ് ഔഡി പ്രഖ്യാപിച്ചിരുന്നു. ഇതിനോടകം തന്നെ ഇലക്ട്രിക് വാഹന നിര്‍മാണത്തിലേക്ക് ഔഡി ചുവടുവെച്ച് കഴിഞ്ഞു. ഇ-ട്രോണ്‍, ഇ-ട്രോണ്‍ ജി.ടി, ആര്‍.എസ്. ഇ-ട്രോണ്‍ ജി.ടി. എന്നീ ഇലക്ട്രിക് വാഹനങ്ങളാണ് നിലവില്‍ ഔഡി വിപണിയില്‍ എത്തിച്ചിട്ടുള്ളത്. ക്യൂ4 ഇ-ട്രോണ്‍ ക്രോസ്ഓവര്‍, എ6 ഇ-ട്രോണ്‍ വാഹനങ്ങളാണ് വൈകാതെ വരവിനൊരുങ്ങുന്നവ.
Source: Sueddeutsche Zeitung
Content Highlights: German Luxury Car Maker Audi Announce Full Electric By 2026
Also Watch
RELATED STORIES
IN CASE YOU MISSED IT
.jpg?$p=bcd4eac&q=0.8&f=16x11&w=104)
.jpg?$p=989750f&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..