ഇന്ത്യയില്‍ ഇലക്ട്രിക് വാഹനങ്ങള്‍ കൂടുതല്‍ കരുത്താര്‍ജിക്കുകയാണ്. അതുകൊണ്ട് തന്നെ കൂടുതല്‍ വാഹന നിര്‍മാതാക്കള്‍ ഇ-വാഹനങ്ങള്‍ നിര്‍മിക്കാന്‍ സന്നദ്ധത അറിയിച്ചിട്ടുണ്ട്. ഏറ്റവും ഒടുവില്‍ ഇറ്റാലിയന്‍ ക്ലാസിക് സ്‌കൂട്ടര്‍ നിര്‍മാതാക്കളായ വെസ്പയും ഇന്ത്യക്കായി ഇലക്ട്രിക് സ്‌കൂട്ടര്‍ നിര്‍മിക്കുമെന്ന് പ്രഖ്യാപിച്ചിരിക്കുകയാണ്.
വെസ്പയുടെ ഇലക്ട്രിക് സ്‌കൂട്ടറുകള്‍ യൂറോപ്യന്‍ രാജ്യങ്ങളില്‍ മുമ്പുതന്നെ എത്തിയിട്ടുണ്ട്. എന്നാല്‍, ഈ സ്‌കൂട്ടറുകളായിരിക്കില്ല, ഇന്ത്യയിലെ റോഡുകളെയും ചാര്‍ജിങ്ങ് സംവിധാനങ്ങളെയും പരിഗണിച്ചുള്ള മോഡലായിരിക്കും ഇന്ത്യക്കായി നിര്‍മിക്കുകയെന്ന് പിയാജിയോ ഇന്ത്യ സി.ഇ.ഒയും മാനേജിങ്ങ് ഡയറക്ടറുമായ ഡിയാഗോ ഗ്രാഫി അറിയിച്ചിട്ടുള്ളത്.
വെസ്പ ഇലക്ട്രിക്ക എന്ന മോഡലാണ് യൂറോപ്യന്‍ വിപണിയിലുള്ളത്. പരമ്പരാഗത രൂപത്തില്‍ മോഡണ്‍ ഫീച്ചേഴ്സ് ഉള്‍ക്കൊണ്ടാണ് ഈ ഇലക്ട്രിക് സ്‌കൂട്ടര്‍ എത്തിയിട്ടുള്ളത്. നാല് കിലോവാട്ട് പവറും 200 എന്‍.എം ടോര്‍ക്കുമേകുന്ന ഇലക്ട്രിക് മോട്ടോറാണ് ഈ സ്‌കൂട്ടറിലുള്ളത്. നാല് മണിക്കൂറിനുള്ളില്‍ ബാറ്ററി പൂര്‍ണമായും ചാര്‍ജ് ചെയ്യാന്‍ കഴിയുമെന്നാണ് വെസ്പ അവകാശപ്പെടുന്നത്.
കണക്ടഡ് സ്‌കൂട്ടറായാണ് യൂറോപ്യന്‍ നിരത്തുകളില്‍ ഇലക്ട്രിക്ക എത്തിയിട്ടുള്ളത്. വെസ്പ കണക്ടിവിറ്റി ആപ്പിന്റെ സഹായത്തോടെയാണ് കണക്ടിവിറ്റി സംവിധാനത്തിന്റെ പ്രവര്‍ത്തനം. ഇതിനുപുറമെ, സ്മാര്‍ട്ട് ഫോണ്‍ കണക്റ്റിവിറ്റിയുള്ള 4.3 ഇഞ്ച് മള്‍ട്ടിമീഡിയ സിസ്റ്റവും ഈ ഇലക്ട്രിക് സ്‌കൂട്ടറില്‍ നല്‍കിയിട്ടുണ്ട്.
ബ്ലൂ ബോഡി ലൈനിനൊപ്പം പൂര്‍ണമായും സില്‍വര്‍ നിറത്തിലാണ് ഇലക്ട്രിക്ക ഒരുങ്ങിയിട്ടുള്ളത്. എല്‍ഇഡി ഹെഡ്ലൈറ്റ്, യുഎസ്ബി സോക്കറ്റ്, 12 ഇഞ്ച് ഫ്രണ്ട് വീല്‍-11 ഇഞ്ച് റിയര്‍ വീല്‍, സീറ്റിനടിയില്‍ മികച്ച സ്റ്റോറേജ് സ്പേസ് എന്നിവയാണ് മറ്റു സവിശേഷതകള്‍. എക്കോ, പവര്‍ എന്നീ രണ്ട് ഡ്രൈവിങ് മോഡുകളില്‍ സ്‌കൂട്ടറിനുണ്ട്.
ഇന്ത്യയിലെത്തുന്ന ഇ-സ്‌കൂട്ടര്‍ പ്രീമിയം ശ്രേണിയിലായിരിക്കും എത്തുകയെന്നാണ് നിര്‍മാതാക്കള്‍ അറിയിച്ചിട്ടുള്ളത്. എന്നാല്‍, 2022-ഓടെ മാത്രമേ വെപ്‌സയുടെ ഇലക്ട്രിക് സ്‌കൂട്ടര്‍ നിരത്തുകളില്‍ എത്തുകയുള്ളൂവെന്നും റിപ്പോര്‍ട്ടുണ്ട്.
Content Highlights: Vespa Will Launch Electric Scooters In India
