മിഡ്-സൈസ് മോട്ടോര്‍സൈക്കിള്‍ ശ്രേണിയില്‍ ഹോണ്ട ടൂവീലേഴ്‌സ് അടുത്തിടെ അവതരിപ്പിച്ച ഹൈനസ് സി.ബി.350 ബൈക്ക് സര്‍വീസിനായി തിരികെ വിളിക്കുന്നു. വാഹനത്തിന്റെ ഗിയര്‍ബോക്‌സില്‍ കണ്ടെത്തിയ തകരാറിന്റെ അടിസ്ഥാനത്തിലാണ് ഈ പ്രശ്‌നം പരിഹരിച്ച് നല്‍കുന്നതിനായി തിരികെ വിളിക്കുന്നതെന്നാണ് റിപ്പോര്‍ട്ട്.
നവംബര്‍ 25 മുതല്‍ ഡിസംബര്‍ 12 വരെയുള്ള കാലയളവില്‍ നിര്‍മിച്ചിട്ടുള്ള ബൈക്കുകളാണ് സര്‍വീസിനായി എത്തിക്കേണ്ടത്. എന്നാല്‍, എത്ര ബൈക്കുകളാണ് ഈ സമയത്തില്‍ നിര്‍മിച്ചിട്ടുള്ളതെന്ന് കമ്പനി വ്യക്തമാക്കിയിട്ടില്ല. അതേസമയം, ഈ തകരാര്‍ വാഹനത്തിന്റെ പ്രകടനത്തെ ബാധിക്കില്ലെന്നും നിര്‍മാതാക്കള്‍ അറിയിച്ചിട്ടുണ്ട്.
മാര്‍ച്ച് 23-ാം തിയതി മുതലാണ് ഹൈനസ് ബൈക്കുകള്‍ സര്‍വീസിനായി എത്തിക്കേണ്ടത്. രാജ്യത്തുടനീളമുള്ള ഹോണ്ടയുടെ ബിഗ്‌വിങ്ങ് ഡീലര്‍ഷിപ്പുകളില്‍ സര്‍വീസ് ക്യാമ്പ് ഒരുക്കുന്നുണ്ടെന്നാണ് ഹോണ്ട അറിയിച്ചിട്ടുള്ളത്. സൗജന്യമായായിരിക്കും ഗിയര്‍ബോക്‌സിലെ ഈ തകരാര്‍ പരിഹരിച്ച് നല്‍കുന്നതെന്നും ഹോണ്ട ഉറപ്പ് നല്‍കുന്നു.
ഡി.എല്‍.എക്സ്, ഡി.എല്‍.എക്സ് പ്രോ എന്നീ രണ്ട് വേരിയന്റുകളിലാണ് ഹൈനസ് സി.ബി 350 നിരത്തുകളില്‍ എത്തിയിട്ടുള്ളത്. റെട്രോ സ്‌റ്റൈലില്‍ ക്ലാസിക് ലുക്കിലാണ് ഹൈനസ് ഡിസൈന്‍ ചെയ്തിരിക്കുന്നത്. മിഡ്-സൈസ് ശ്രേണിയില്‍ ഹോണ്ടയുടെ ഈ ചുവടുവയ്പ്പിന് മികച്ച സ്വീകാര്യതായാണ് ലഭിച്ചിട്ടുള്ളത്.
കരുത്തേറിയ 350 സി.സി., എയര്‍ കൂള്‍ഡ് 4 സ്‌ട്രോക് ഒ.എച്ച്.സി. സിംഗിള്‍ സിലിന്‍ഡര്‍ എന്‍ജിനാണ് ഹെനസ് സി.ബി. 350-ക്ക് കരുത്തേകുന്നത്. പി.ജി.എം.-എഫ്1 സാങ്കേതികവിദ്യയാണ് ഈ എന്‍ജിന്റെ ഹൈലൈറ്റ്. ഈ എന്‍ജിന്‍ 20.8 ബിഎച്ച്പി പവറും 30 എന്‍എം ടോര്‍ക്കുമാണ് ഉത്പാദിപ്പിക്കുന്നത്.
Content Highlights; Honda HNess CB350 Recall For Service
