ആഡംബരത്തിനൊപ്പം ആധുനിക സൗകര്യങ്ങള്‍ ഉള്‍ക്കൊള്ളിച്ച് വാഹനങ്ങളില്‍ വിസ്മയം തീര്‍ക്കുന്നവരാണ് ജര്‍മന്‍ നിര്‍മാതാക്കളായ ബി.എം.ഡബ്യു. നിലവില്‍ പെര്‍ഫോമെന്‍സ് ബൈക്കുകള്‍ക്കൊപ്പം ഭാവി സ്‌കൂട്ടറുകളിലും വിപ്ലവകരമായ മാറ്റത്തിനുള്ള ഒരുക്കത്തിലാണ് ബി.എം.ഡബ്യു മോട്ടോറാഡ്. വിഷന്‍ സീറോ എമിഷന്‍ പദ്ധതിയുടെ ഭാഗമായി തീര്‍ത്തും വേറിട്ട രൂപത്തില്‍ കണ്‍സെപ്റ്റ് ലിങ്ക് എന്ന ഇലക്ട്രിക് സ്‌കൂട്ടര്‍ ഇറ്റലിയില്‍ കഴിഞ്ഞ ദിവസം ഔദ്യോഗികമായി അവതരിപ്പിച്ചിരിക്കുകയാണ് ബിഎംഡബ്യു മോട്ടോറാഡ്.
പതിവ് സ്‌കൂട്ടറുകളില്‍ നിന്ന് യാതൊരു സാമ്യവുമില്ലാതെ അത്യാധുനിക ഫീച്ചേര്‍സ് ഉള്‍ക്കൊള്ളിച്ചാണ് കണ്‍സെപ്റ്റ് ലിങ്ക് അവതരിപ്പിച്ചത്. കമ്പനി കഴിഞ്ഞ വര്‍ഷം അവതരിപ്പിച്ച വിഷന്‍ നെക്‌സ്റ്റ് 100 മോഡലില്‍ നിന്ന് പ്രചോദനം ഉള്‍ക്കൊണ്ടാണ് പുതിയ സ്‌കൂട്ടറിന്റെ നിര്‍മാണം. സ്മാര്‍ട്ട് ഫോണുകള്‍ക്ക് സമാനമാണ് ഇന്‍സ്ട്രുമെന്റ് ക്ലസ്റ്ററിന് പകരമുള്ള ടച്ച് സ്‌ക്രീന്‍ ഡിസ്‌പ്ലേ. സ്പീഡ്, നാവിഗേഷന്‍, ബാറ്ററി സ്റ്റാറ്റസ്, മ്യൂസിക് തുടങ്ങി ഒട്ടനവധി സൗകര്യങ്ങള്‍ ഇതിലുണ്ട്. ഇന്റേണല്‍ എഞ്ചിന്റെ അഭാവത്തില്‍ ധാരാളം സ്റ്റോറേജ് സ്‌പേസ് സീറ്റിനടിയില്‍ ലഭിക്കും.
സുരക്ഷാ സംവിധാനങ്ങളിലും കണ്‍സെപ്റ്റ് ലിങ്ക് കേമനായിരിക്കും. നീളമേറിയ ബാറ്ററി പാക്ക് റിയല്‍ വീലിലേക്കെത്തിക്കുന്ന കരുത്തിലാണ് സ്‌കൂട്ടര്‍ കുതിക്കുക. എന്നാല്‍ ബാറ്ററി ശേഷി സംബന്ധിച്ച മെക്കാനിക്കല്‍ ഫീച്ചേര്‍സ് കമ്പനി പുറത്തുവിട്ടിട്ടില്ല. ഭാരം താരതമ്യേന കുറഞ്ഞ വാഹനത്തില്‍ സീറ്റിന്റെ നീളം ആവശ്യാനുസരണം റൈഡര്‍ക്ക് സെറ്റ് ചെയ്ത് വയ്ക്കാം. കാറുകളിലേതിന് സമാനമായി റിവേഴ്‌സ് ഗിയറും ഇവനുണ്ട്. പ്രൊഡക്ഷന്‍ മോഡല്‍ എപ്പോള്‍ പുറത്തിറക്കുമെന്ന് ബിഎംഡബ്യു മോട്ടോറാഡ് വ്യക്തമാക്കിയിട്ടില്ല.
