ഇന്ത്യന്‍ വാഹന നിര്‍മാതാക്കളായ ബജാജിന്റെ ബൈക്ക് നിരയില്‍ ഏറ്റവും കരുത്തനായിരുന്ന ഡോമിനാറിന്റെ കുഞ്ഞന്‍ വരുന്നു. 400 സിസിയില്‍ എത്തിയിരുന്ന ഡോമിനാറിന്റെ 250 സിസി പതിപ്പാണ് നിരത്തുകളിലെത്താനൊരുങ്ങിയിരിക്കുന്നത്. വരവിന് മുന്നോടിയായുള്ള പരീക്ഷണത്തിലാണ് ഈ വാഹനം.
മസ്‌കുലര്‍ ഭാവമായിരുന്നു ഡോമിനാര്‍ 400 ഉണ്ടായിരുന്നതെങ്കില്‍ 250 സിസി ഡോമിനാര്‍ ലുക്കിലും അല്‍പ്പം കുഞ്ഞനാണ്. മുന്‍ഗാമിയായ ഡോറിനാറിന്റെ ഡിസൈനില്‍ വീതി കുറഞ്ഞ ടയറുകളും വലിപ്പം കുറഞ്ഞ ഡിസ്‌ക് ബ്രേക്കും ചെയിന്‍ കവറുമാണ് ഈ ബൈക്കിലുള്ളത്.
ഹാലജന്‍ ഹെഡ്ലാമ്പുകളും ഇരട്ട പാനലില്‍ നിര്‍മിച്ച ബാക്ക് എല്‍ഇഡി ലൈറ്റും, ഡിജിറ്റല്‍ ഇന്‍സ്ട്രുമെന്റ് ക്ലെസ്റ്ററും, സ്‌പോര്‍ട്ടി ഭാവം നല്‍കുന്ന ട്വിന്‍ എക്‌സ്‌ഹോസ്റ്റ് പൈപ്പുകളും, വലിയ പെട്രോള്‍ ടാങ്കും ഡോമിനാര്‍ 400-ല്‍ നിന്ന് പറിച്ചുനട്ടവയാണ്.
സുഖപ്രദമായ യാത്ര ഒരുക്കുന്നതിനായി പിന്നില്‍ പുതിയ മോണോഷോക്ക് സസ്പെന്‍ഷനാണ് ഈ ബൈക്കില്‍ ഒരുക്കുന്നത്. മുന്നില്‍ സാധാരണ സാധാരണ ടെലിസ്‌കോപിക് സസ്പെന്ഷന് പകരം അപ്സൈഡ് ഡൗണ്‍ സസ്പെന്ഷന് സ്ഥാനം പിടിക്കും.
കെടിഎം ഡ്യുക്ക് 250-ല്‍ നല്‍കിയിട്ടുള്ള എന്‍ജിനായിരിക്കും ഈ ബൈക്കിലും നല്‍കുക. കെടിഎം ഡ്യൂക്ക് 200, ഹോണ്ട സിബിആര്‍ 250, റോയല്‍ എന്‍ഫീല്‍ഡ് ക്ലാസിക് 350, മഹീന്ദ്ര മോജോ ബൈക്കുകളാകും നിരത്തില്‍ ഡോമിനാര്‍ 250-യുടെ മുഖ്യ എതിരാളികള്‍.
വിലയുടെ കാര്യത്തില്‍ ഡോമിനാര്‍ 400-നും പള്‍സര്‍ ആര്‍എസ് 200-നും ഇടയിലായിരിക്കും ഡോമിനാര്‍ 250-യുടെ സ്ഥാനം. ഡോമിനാര്‍ 400-ന് 1.9 ലക്ഷം രൂപയാണ് ഇന്ത്യയിലെ എക്‌സ്‌ഷോറൂം വില.
Content Highlights: Bajaj Dominar 250 Spied On Test Run
