ധിക സുരക്ഷ നല്‍കുന്ന കോംബി ബ്രേക്കിങ് സംവിധാനത്തോടെ (സിബിഎസ്) പുതിയ ഹോണ്ട നവി പുറത്തിറങ്ങി. 47,110 രൂപയാണ് വാഹനത്തിന്റെ എക്‌സ്‌ഷോറൂം വില. നോണ്‍ സിബിഎസ് മോഡലിനെക്കാള്‍ 1796 രൂപ കൂടുതലാണിത്. 2019 ഏപ്രില്‍ ഒന്ന് മുതല്‍ ഇന്ത്യയില്‍ 125 സിസിക്ക് താഴെ പുറത്തിറങ്ങുന്ന എല്ലാ ഇരുചക്ര വാഹനങ്ങള്‍ക്കും സിബിഎസ് നിര്‍ബന്ധമാണ്. ഇതിന് മുന്നോടിയായാണ് 2019 നവി സിബിഎസ് പുറത്തിറങ്ങിയത്. 

അടിയന്തര സാഹചര്യങ്ങളില്‍ റിയര്‍ ബ്രേക്ക് മാത്രം പിടിച്ചാലും മുന്‍ പിന്‍ ടയറുകളില്‍ ഫലപ്രദമായ ബ്രേക്കിംങ് ഉറപ്പുവരുത്താന്‍ കോംബി ബ്രേക്കിങ് സഹായിക്കും. ബ്രേക്കിങ് സംവിധാനത്തിനൊപ്പം മുന്‍ ഫെന്‍ഡറില്‍ സിബിഎസ് ബാഡ്ജിങ് നല്‍കിയതൊഴിച്ചാല്‍ രൂപത്തില്‍ മറ്റു മാറ്റങ്ങളൊന്നും പുതിയ നവിക്കില്ല. 

2016 ഫെബ്രുവരിയിലായിരുന്നു നവി വിപണിയിലെത്തിയത്. രൂപത്തിലും മറ്റു ചില മാറ്റങ്ങള്‍ വരുത്തി കഴിഞ്ഞ വര്‍ഷം നവിയുടെ പുതിയ പതിപ്പും കമ്പനി പുറത്തിറക്കിയിരുന്നു. ഈ മോഡലിന് സമാനമാണ് പുതിയ നവി. രൂപത്തില്‍ വളരെ ചെറിയൊരു സ്‌കൂട്ടറാണ് നവി. 1805 എംഎം നീളവും 748 എംഎം വീതിയും 1039 എംഎം ഉയരവുമാണ് നവിക്കുള്ളത്. ആകെ ഭാരം 100 കിലോഗ്രാം. 

8 എച്ച്പി പവറും 8.9 എന്‍എം ടോര്‍ക്കുമേകുന്ന 109.2 സിസി എയര്‍കൂള്‍ഡ് എന്‍ജിനാണ് വാഹനത്തിന് കരുത്തേകുന്നത്. മുന്നില്‍ അപ്പ്‌സൈഡ് ഡൈഡ് ടെലിസ്‌കോപ്പിക് സസ്‌പെന്‍ഷനും പിന്നില്‍ ഹൈഡ്രോളിക് മോണോഷോക്കുമാണ് സസ്‌പെന്‍ഷന്‍. റെഡ്, വൈറ്റ്, ബ്ലാക്ക്, ബ്രൗണ്‍, ഗ്രീന്‍, ഓറഞ്ച് എന്നീ ആറ് നിറങ്ങളിലാണ് പുതിയ ഹോണ്ട നവി ലഭ്യമാകുക. 

Content Highlights; 2019 Honda Navi CBS launched at Rs 47,110