'പുത്തന്‍തോപ്പ് അമ്മ'മാര്‍ പറയുന്നു സൂംബ സൂപ്പറാാാാാ......
തിരുവനന്തപുരം: പ്രായം കൊണ്ടവര്‍ മുട്ടുകുത്തിച്ചു സൂംബാഡാന്‍സിനെ. ശരീരം കൊണ്ടല്ലാ മനസുകൊണ്ടാണ് 'പുത്തന്‍തോപ്പിലെ അമ്മ' മാര്‍ സൂംബയ്ക്കായി ഓരോ ചുവടും വയ്ക്കുന്നത്. അന്യഭാഷാ ഗാനങ്ങള്‍ക്ക് പകരം മലയാളഗാനങ്ങളാണ് സൂംബയ്‌ക്കൊപ്പം ഇവര്‍ക്ക് പ്രിയം. പുത്തന്‍തോപ്പിലെ ജയ്ഹിന്ദ് വായനശാലയുടെ നേതൃത്വത്തിലാണ് വീട്ടമ്മമാരെ സൂംബാ ഡാന്‍സ് പരിശീലിപ്പിക്കുന്നത്.
പള്ളിത്തുറ ഗവ. ഹയര്‍സെക്കന്‍ഡറി സ്‌കൂളിലെ കായികാധ്യാപിക സ്റ്റെഫിന്‍ ജോണ്‍ ആണ് പരിശീലക. ജയ്ഹിന്ദ് വായനശാലയുടെ വനിതാവേദിയെ ശാക്തീകരിക്കുക എന്ന ലക്ഷ്യത്തോടെയാണ് മെയ് മാസത്തില്‍ സൂംബാ പരിശീലനം തുടങ്ങിയത്. തൊഴിലുറപ്പിനും മറ്റ് ജോലികള്‍ക്കും പോകുന്ന സാധാരണക്കാരായ സ്ത്രീകള്‍ സൂംബയില്‍ പങ്കെടുക്കുമോയെന്ന ആശങ്കയായിരുന്നു വായനശാലാ അധികൃതര്‍ക്ക്. എന്നാല്‍ 20 പേരില്‍ തുടങ്ങിയ ക്ലാസ് മൂന്നുമാസം പിന്നിട്ടപ്പോള്‍ അറുപതിനോടടുത്തു. പരിശീലനത്തിനെത്തുന്നവരിലേറെയും 45-ന് മുകളില്‍ പ്രായമുള്ളവര്‍. ശാരീരികമായി വലിയ ആയാസമുണ്ടാക്കാത്ത രീതിയില്‍ കൃത്യമായ ഇടവേളകള്‍ നല്‍കിയാണ് പരിശീലനം. ജീവിതത്തിലെ കൊച്ചു സന്തോഷങ്ങളെല്ലാം ഈ സമയത്താണ് അവര്‍ പങ്കുവയ്ക്കുന്നത്. ആഘോഷവേളകള്‍ക്കായി സൂംബ കഴിഞ്ഞുള്ള സമയം മാറ്റിവയ്ക്കും. ശാരീരികമായ ബുദ്ധിമുട്ടുകളൊന്നും പരിശീലന സമയത്ത് തോന്നാറേയില്ലെന്ന് അമ്മമാര്‍ പറയുന്നു. മലയാളത്തിലെ നിത്യഹരിതഗാനങ്ങളും അടിച്ചുപൊളി ഗാനങ്ങളുമാണ് സൂംബയ്ക്കായി തിരഞ്ഞെടുത്തിട്ടുള്ളത്. സ്വന്തം ഭാഷയിലെ ഇഷ്ടഗാനങ്ങളാകുമ്പോള്‍ ഊര്‍ജവും ആവേശവും ഏറെയെന്ന് പരിശീലക സ്റ്റെഫിന്‍ പറയുന്നു. വായനശാല പ്രസിഡന്റ് സ്റ്റീഫന്‍ ഡിസില്‍, സെക്രട്ടറി സേവ്യര്‍ എന്നിവര്‍ എല്ലാവിധ പിന്തുണയുമായി ഇവര്‍ക്കൊപ്പമുണ്ട്.