കുറ്റാലം കൊട്ടാരം നവീകരണം പൂർത്തിയായി; സഞ്ചരികൾക്ക് ഇനി ഓൺലൈനായും ബുക്ക് ചെയ്യാം

കുറ്റാലം വെള്ളച്ചാട്ടത്തിനടുത്ത് കേരളത്തിന് ഉടമസ്ഥാവകാശമുള്ള കുറ്റാലം കൊട്ടാരത്തിന്റെ നവീകരണ ജോലികൾ പൂർത്തിയാക്കി സഞ്ചാരികൾക്കായി വാടകയ്ക്ക് നൽകിത്തുടങ്ങിയിരിക്കുകയാണ് സർക്കാർ. കുറ്റാലം കൊട്ടാരം ബുക്കിങ്  ഓൺലൈനാക്കാനും തീരുമാനമായിട്ടുണ്ട്. പൊതുമരാമത്ത് വകുപ്പിന് കീഴിലെ വിശ്രമ മന്ദിരങ്ങളിൽ കുറ്റാലം കൊട്ടാരത്തിന്റെ ബുക്കിങ് മാത്രം ഇതുവരെ ഓൺലൈനാക്കിയിരുന്നില്ല. ഇതുവഴി വലിയ വരുമാന ചോർച്ചയാണ് സർക്കാരിനുണ്ടാക്കിയിരുന്നത്. ഇതു സംബന്ധിച്ച മാതൃഭൂമി വാർത്തകളെ തുടർന്നാണ് ബുക്കിങ് ഓൺലൈനാക്കാൻ നടപടി തുടങ്ങിയത്.

രാജകൊട്ടാരം,ദളവാ കൊട്ടാരം,അമ്മച്ചിക്കൊട്ടാരം എന്നിങ്ങനെ ചെറുതും വലുതുമായ 11 കെട്ടിടങ്ങളുടെ നവീകരണ പ്രവർത്തനങ്ങൾക്ക് ശേഷമാണ് കൊട്ടാരം സഞ്ചാരികൾക്കായി തുറന്നുകൊടുത്തത്. തടികൊണ്ടുള്ള മേൽക്കൂരയുള്ള രാജ്ഭവൻ, ക്ലിഫ്ഹൗസ് എന്നിവയുടെ മാതൃകയിലാണ് കുറ്റാലം കൊട്ടാരത്തിന്റെയും അറ്റകുറ്റപ്പണി നടത്തിയത്.