സ്വകാര്യബസ്സുകൾക്ക് 50% നികുതി ഇളവ്, ടൂറിസ്റ്റ് ബസ്സുകളുടെ ത്രൈമാസ നികുതിയിലും വമ്പൻ കിഴിവ്
പൊതുഗതാഗത മേഖലയെ സംരക്ഷിക്കുന്നതിനായി സ്വകാര്യമേഖലയിൽ പ്രവർത്തിക്കുന്ന സ്റ്റേജ് കാര്യേജ് ബസ്സുകൾക്ക് നിലവിലെ ത്രൈമാസ നികുതിയിൽ അമ്പത് ശതമാനം ഇളവ് അനുവദിച്ച് സംസ്ഥാന സർക്കാർ. വി.ഡി സതീശൻ സർക്കാരിന്റെ ആദ്യ ബജറ്റ് അവതരണത്തിലാണ് പ്രഖ്യാപനം. കേരളത്തിലേക്ക് രജിസ്‌ട്രേഷനായി കൂടുതൽ വാഹനങ്ങൾ എത്തുന്നതിനും അന്തർസംസ്ഥാന യാത്രാസൗകര്യങ്ങൾ വർധിപ്പിക്കുന്നതിനുമായി ഓൾ ഇന്ത്യ ടൂറിസ്റ്റ് ബസ്സുകളുടെയും ത്രൈമാസ നികുതി കുറയ്ക്കും. നിലവിലെ നികുതിയായ സീറ്റ് ഒന്നിന് 2000 രൂപ എന്ന നിരക്ക് 900 രൂപയായും സ്ലീപ്പർ സീറ്റ് ഒന്നിന് 3000 രൂപ എന്നത് 1500 രൂപയായും ഇളവ് ചെയ്തു. ട്രെയിലർ വാഹനങ്ങളുടെ നികുതി സ്ലാബുകൾ ഏകീകരിക്കുമെന്നും ഇലക്ട്രിക് വാഹനങ്ങളുടെ വിലയനുസരിച്ച് റോഡ് നികുതിയിൽ 10% മുതൽ 15% വരെ മാറ്റങ്ങൾ വരുത്തുമെന്നും ബജറ്റ് അവതരണത്തിനിടെ മുഖ്യമന്ത്രി അറിയിച്ചു
കേരളത്തിലേക്ക് കൂടുതൽ ട്രെയിലർ വാഹനങ്ങളുടെ രജിസ്‌ട്രേഷനുകൾ ആകർഷിക്കുന്നതിനായി ട്രെയിലർ വാഹനങ്ങളുടെ ത്രൈമാസ നികുതി സ്ലാബുകൾ ഏകീകരിക്കും. 20 ടണ്ണിന് മുകളിൽ ഭാരമുള്ള ട്രെയിലർ വാഹനങ്ങളുടെ അധിക നികുതി ചുമത്തിയിരുന്ന സ്ലാബ് ഒഴിവാക്കി 15 ടണ്ണിനു മുകളിൽ ഭാരമുള്ള വാഹനങ്ങളുടെ നികുതി നിരക്കിലേക്ക് കുറച്ചു.