കന്നുകാലികളുടെ 'ബ്യൂട്ടീഷ്യന്‍', കൊമ്പ് ചെത്തിമിനുക്കി ഭംഗിയാക്കാന്‍ 150 രൂപ
വാണിയംകുളം: കന്നുകാലി ചന്തയില്‍ എത്തുന്ന കാലികളെ സുന്ദരന്‍മാരാക്കാനുണ്ട് ഒരു 'ബ്യൂട്ടീഷ്യന്‍'. ആറ് പതിറ്റാണ്ടിലേറെയായി ഈ പണി ചെയ്യുന്ന തമിഴ്‌നാട് ഒട്ടന്‍ചത്രം സ്വദേശി കറുപ്പുസ്വാമി (78)യാണ് ഈ ബ്യുട്ടീഷ്യന്‍. പെരുന്നാള്‍ ചന്തയോടുബന്ധിച്ച് വാണിയംകുളം ചന്തയില്‍ കന്നുകാലികളുടെ ഈ 'ബ്യുട്ടീഷ്യന്‍' തിരക്കോട് തിരക്കിലായിരുന്നു. മകന്‍ ചെല്ല ദുരൈയും പെരിയദുരൈയും അച്ഛനോടൊപ്പമുണ്ട്. ചന്തയില്‍ വില്‍പ്പനക്കായി എത്തുന്ന കാളകളുടെ കൊമ്പ് മുറിച്ച് ചെത്തിമിനുക്കി ഭംഗിയാക്കുകയാണ് ഇവര്‍ ചെയ്യുന്നത്. ഇങ്ങനെ ഭംഗിയാക്കി നിര്‍ത്തിയാലാണ് കൂടുതല്‍ ആകര്‍ഷണവും വിലയും ലഭിക്കുകയെന്ന് കച്ചവടക്കാര്‍ പറഞ്ഞു. സാധാരണയായി കൂടുതലും കാളകളുടെ കൊമ്പാണ് വൃത്തിയാക്കാന്‍ വരിക.
ഓരോ കാളകളുടെയും പ്രായത്തിനുസരിച്ചാണ് കൊമ്പുകള്‍ മുറിക്കുക. തുടര്‍ന്ന് കത്തി കൊണ്ട് ചെത്തിമിനുക്കി കൊമ്പ് ഭംഗിയാക്കും. ഒരു കാളയെ കൊമ്പ് മുറിച്ച് ഭംഗി വരുത്താന്‍ 150 രൂപയാണ് ഈടാക്കുന്നത്. അരമണിക്കൂറിലേറെ സമയം വേണം ഇങ്ങനെ കൊമ്പൊരുക്കാന്‍.