കോഴിക്കോട് : സൈബര്‍ മലയാളലോകത്ത് ഇതിനകം ശ്രദ്ധേയമായ ഓളം ഓണ്‍ലൈന്‍ നിഘണ്ടു ഓപ്പണ്‍ സോഴ്‌സിലേക്ക് മാറുന്നു. സ്വന്തന്ത്ര സോഫ്റ്റ്‌വേര്‍ രംഗത്ത് പ്രവര്‍ത്തിക്കുന്നവര്‍ക്ക് പ്രോത്സാഹനമേകുന്ന നീക്കമായി ഇത് വിലയിരുത്തപ്പെടുന്നു.

ഓപ്പണ്‍ സോഴ്‌സ് ആകുന്നു എന്നത് മാത്രമല്ല ഓളത്തിന്റെ ഇപ്പോഴത്തെ പ്രത്യേകത. ഇതുവരെ ഉപയോക്താക്കള്‍ക്ക് വാക്കുകളും വിശദീകരണവും സമര്‍പ്പിക്കാവുന്ന ഇംഗ്ലീഷ് - മലയാളം നിഘണ്ടു മാത്രമായിരുന്നു ഓളമെങ്കില്‍, ഇപ്പോള്‍ അതൊരു മലയാളം-മലയാളം നിഘണ്ടു കൂടിയായി മാറിയിരിക്കുന്നു.

83,000 ലേറെ പദങ്ങളും അവയുടെ ഒന്നര ലക്ഷത്തിനടുത്ത് വിശദീകരണവുമുള്ള മലയാളം-മലയാളം നിഘണ്ടു ശനിയാഴ്ച്ച (മെയ് 18) മുതല്‍ ഓളത്തിന്റെ ഭാഗമായതായി, ഈ ഓണ്‍ലൈന്‍ നിഘണ്ടു സ്ഥാപിച്ച ബി എന്‍ കൈലാഷ് നാഥ് അറിയിച്ചു.

മൂന്നുവര്‍ഷം മുമ്പ് ലണ്ടനിലെ മിഡില്‍സക്‌സ് സര്‍വകലാശാലയില്‍ നിര്‍മിത ബുദ്ധി (ആര്‍ട്ടിഫിഷ്യല്‍ ഇന്റലിജന്‍സ്) യില്‍ പി.എച്ച്.ഡി. ചെയ്യുന്ന വേളയിലാണ് കോഴിക്കോട് സ്വദേശിയായ കൈലാഷ് നാഥ് ഓളം ആരംഭിച്ചത്. ഇപ്പോള്‍ പ്രതിമാസം 80,000 സന്ദര്‍ശകരുള്ള, പത്തുലക്ഷത്തിലേറെ പേജ് വ്യൂ ലഭിക്കുന്ന സൈറ്റാണ് ഓളം (www.olam.in/).

ഉപയോക്താക്കള്‍ക്ക് പദങ്ങളും വിശദീകരണങ്ങളും സമര്‍പ്പിക്കാവുന്ന രീതിയിലാണ് ഓളം ആരംഭിച്ചത്. അത്തരത്തില്‍ ഇതിനകം 60,000 ത്തോളം പദങ്ങളും രണ്ടുലക്ഷത്തോളം വിശദീകരണങ്ങളും ചേര്‍ക്കാനായി. നിലവില്‍ പ്രതിമാസം ആയിരത്തോളം പദങ്ങളും വിശദീകരണങ്ങളും യൂസര്‍മാര്‍ ഓളത്തിന് സമര്‍പ്പിക്കാറുണ്ടെന്ന് കൈലാഷ് നാഥ് പറയുന്നു.

ദത്തുക് കെ.ജെ.ജോസഫ് എന്നയാള്‍ 1990 കളില്‍ കമ്പ്യൂട്ടറിലാക്കിയ ഡേറ്റയാണ്, ഓളത്തില്‍ പുതിയതായി കൂട്ടിച്ചേര്‍ക്കപ്പെട്ട മലയാളം - മലയാളം നിഘണ്ടുവിന്റെ അടിസ്ഥാനം. പഴയൊരു മലയാളം നിഘണ്ടുവില്‍നിന്ന് നൂറുകണക്കിന് പേജുകള്‍ കമ്പ്യൂട്ടറില്‍ ടൈപ്പ് ചെയ്‌തെടുക്കാന്‍ ജോസഫിന് കഴിഞ്ഞു. ആ ഡേറ്റയെ ഓളത്തിലാക്കാന്‍ രണ്ടുവര്‍ഷമായി കൈലാഷ് നാഥ് ശ്രമിച്ചു വരികയായിരുന്നു.

ഓളത്തിലെ ഇംഗ്ലീഷ്-മലയാളം നിഘണ്ടുവും, മലയാളം-മലയാളം നിഘണ്ടുവും താമസിയാതെ ഓപ്പണ്‍ സോഴ്‌സ് ആകുമെന്ന് തന്റെ ഫെയ്‌സ്ബുക്ക് പേജില്‍ കഴിഞ്ഞ ദിവസം കൈലാഷ് നാഥ് പ്രഖ്യാപിച്ചിരുന്നു. ദി ദത്തുക് കോര്‍പ്പസ് എന്ന പേരിലാകും മലയാളം-മലയാളം നിഘണ്ടു ഓപ്പണ്‍സോഴ്‌സില്‍ എത്തുകയെന്ന് കൈലാഷ് നാഥ് അറിയിച്ചു.