എഐയുടെ നേട്ടങ്ങൾക്കൊപ്പം ദോഷങ്ങളും അംഗീകരിക്കാൻ ലോകം തയാറാകണം- സാം ഓൾട്ട്മാൻ

ആർട്ടിഫിഷ്യൽ ഇന്റലിജൻസിന്റെ ഗുണങ്ങൾ അനുഭവിക്കുമ്പോൾ അതിന്റെ ദോഷവശങ്ങളും അംഗീകരിക്കാൻ ലോകം തയ്യാറാകണമെന്ന് ഓപ്പൺ എഐ മേധാവി സാം ഓൾട്ട്മാൻ പറഞ്ഞു. ഹാക്കിങ്, തട്ടിപ്പുകൾ തുടങ്ങിയ ചില അനിഷ്ട സംഭവങ്ങൾ എഐ മൂലം ഉണ്ടാകാൻ സാധ്യതയുണ്ടെന്നും എന്നാൽ, ഇവയെക്കാൾ വലിയ നേട്ടങ്ങൾ എഐ വാഗ്ദാനം ചെയ്യുന്നതുകൊണ്ട് സമൂഹം ഈ വെല്ലുവിളികൾ ഉൾക്കൊള്ളാൻ തയ്യാറാകണമെന്നും ഒരു അഭിമുഖത്തിൽ അദ്ദേഹം പറഞ്ഞു. എന്നാൽ എഐയെ കൊണ്ടുള്ള വലിയ നേട്ടങ്ങൾ എന്തെല്ലാമെന്ന് അദ്ദേഹം വിശദമാക്കിയില്ല. മുമ്പ് എൻവിഡിയ മേധാവി ജെൻസെൻ ഹുവാങും സമാനമായ അഭിപ്രായവുമായി രംഗത്തുവന്നിരുന്നു.

എഐയുടെ വലിയ നേട്ടങ്ങൾക്കുവേണ്ടി, അതിന്റെ ദോഷഫലങ്ങൾ അംഗീകരിക്കാനുള്ള സന്നദ്ധതയാണ് ഓപ്പൺഎഐയും ആന്ത്രോപിക്കും തമ്മിലുള്ള പ്രധാന വ്യത്യാസമെന്ന് പൊളിറ്റിക്കോയുടെ ഡീക്കോഡഡ് എന്ന പോഡ്കാസ്റ്റിൽ സംസാരിക്കവെ ഓൾട്ട്മാൻ പറഞ്ഞു.  ആർട്ടിഫിഷ്യൽ ഇന്റലിജൻസിന് നിയന്ത്രണങ്ങൾ വേണമെന്ന കാര്യത്തിൽ നേരത്തെ ആന്ത്രോപിക്കും ഓപ്പൺ എഐയും അടുത്തിടെ സമാനമായ നിലപാട് സ്വീകരിച്ചിരുന്നു.

എങ്കിലും അമിത നിയന്ത്രണങ്ങളോട് കമ്പനിക്ക് അനുകൂല നിലപാടല്ല. അമിത നിയന്ത്രണങ്ങൾ ഏർപ്പെടുത്തുന്ന സമീപനത്തിനും തീരെ നിയന്ത്രണമില്ലാത്ത അവസ്ഥയ്ക്കും ഇടയിലുള്ള ഒരു "പ്രാഗ്മാറ്റിക് സെൻട്രിസ്റ്റ്" നിലപാടാണ് ഓപ്പൺഎഐയുടേതെന്ന് അദ്ദേഹം പറയുന്നു. അമിത നിയന്ത്രണം ഏർപ്പെടുത്തുന്നത് വലിയ കമ്പനികൾക്കോ രാജ്യങ്ങൾക്കോ എഐയുടെ മേൽ കൂടുതൽ അധികാരം നൽകാൻ ഇടയാക്കുമെന്ന് ഓൾട്മാൻ മുന്നറിയിപ്പ് നൽകുന്നു.

സൈബർ സുരക്ഷാ പരാജയങ്ങളും കമ്പനിയിലെ പ്രതിസന്ധിയും

എഐ സുരക്ഷയെക്കുറിച്ചുള്ള ചർച്ചകൾ ശക്തമാകുന്നതിനിടെയാണ് ഓപ്പൺഎഐയുടെ സ്വന്തം എഐ ഏജന്റുകളുടെ സുരക്ഷാവീഴ്ചകൾ പുറത്തുവരുന്നത്. കമ്പനിയുടെ അറിവില്ലാതെ ഓപ്പൺഎഐയുടെ എഐ ഏജന്റുകൾ 'ഹഗ്ഗിംഗ് ഫെയ്സ്' (Hugging Face) എന്ന പ്ലാറ്റ്‌ഫോം ഹാക്ക് ചെയ്ത സംഭവം വലിയ വിവാദമായിരുന്നു. കൂടാതെ, ഓസ്‌ട്രേലിയൻ ഗവൺമെന്റിന്റെ ആരോഗ്യ വെബ്‌സൈറ്റിന് നേരെ എഐ ഏജന്റ് ആക്രമണം നടത്തിയപ്പോൾ ഓസ്ട്രേലിയൻ അധികൃതരെ യഥാസമയം വിവരമറിയിച്ചില്ല എന്ന വിമർശനവും കമ്പനി നേരിട്ടു.

ഓപ്പൺഎഐയുടെ സുരക്ഷാ സംസ്കാരം "തകരാറിലാണ്" എന്ന് പരസ്യമായി കുറ്റപ്പെടുത്തിക്കൊണ്ട് മുതിർന്ന സുരക്ഷാ ഗവേഷകനായ ഡേവിഡ് റോബിൻസൺ അടുത്തിടെ കമ്പനിയിൽനിന്ന് രാജിവെച്ചിരുന്നു. ഇത്തരം നിയന്ത്രണം വിട്ട എഐ ഏജന്റുകളെക്കുറിച്ച് കമ്പനിക്ക് ഇനിയും കൂടുതൽ കാര്യങ്ങൾ വെളിപ്പെടുത്താനുണ്ടെന്നും അതിന് സമയമെടുക്കുമെന്നും അഭിമുഖത്തിൽ ഓൾട്മാൻ പറഞ്ഞു.

മനുഷ്യന്റെ നിയന്ത്രണം മറികടക്കാനുള്ള സാധ്യത

മനുഷ്യർക്ക് എഐ സിസ്റ്റങ്ങളുടെ മേലുള്ള നിയന്ത്രണം പൂർണ്ണമായി നഷ്ടപ്പെടാനുള്ള സാധ്യതയെക്കുറിച്ച് അദ്ദേഹം സമ്മതിക്കുന്നുണ്ട്. ഇത്തരം കാര്യങ്ങൾ കണക്കിലെടുത്ത് ഭാവിയിലേക്ക് കടക്കുമ്പോൾ ജാഗ്രത പുലർത്തണമെന്നും ഓൾട്മാൻ പറഞ്ഞു.