ലോകത്തെ ഏറ്റവും വലിയ ഫിക്സ്ഡ് വയര്‍ലെസ് ആക്സസ് സേവനദാതാവാകാന്‍ ജിയോ: റിപ്പോര്‍ട്ട്

മുംബൈ: റിലയന്‍സ് ജിയോ, ഉപയോക്താക്കളുടെ എണ്ണത്തിന്റെ അടിസ്ഥാനത്തില്‍ ലോകത്തിലെ ഏറ്റവും വലിയ ഫിക്‌സഡ് വയര്‍ലെസ് ആക്‌സസ് (FWA) സേവനദാതാവാകാന്‍ ഒരുങ്ങുകയാണ്. ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) ഡാറ്റയെ അടിസ്ഥാനമാക്കി ഐസിഐസിഐ സെക്യൂരിറ്റീസിലെ വിദഗ്ധര്‍ തയ്യാറാക്കിയ റിപ്പോര്‍ട്ടാണ് ഈ വിലയിരുത്തലിന് പിന്നില്‍. അമേരിക്കയിലെ ടി-മൊബൈലിനെ മറികടക്കാനാണ് ജിയോയുടെ ലക്ഷ്യം.

ട്രായിയുടെ ഏറ്റവും പുതിയ കണക്കുകള്‍ പ്രകാരം, 2025 മേയ് മാസത്തില്‍ ജിയോയുടെ 5G FWA ഉപയോക്താക്കളുടെ എണ്ണം 68.8 ലക്ഷമായി ഉയര്‍ന്നു. അതേസമയം, 2025 മാര്‍ച്ചില്‍ ടി-മൊബൈലിന്റെ ഉപയോക്താക്കള്‍ 68.5 ലക്ഷമായിരുന്നു. ജിയോ ഏകദേശം 10 ലക്ഷം FWA ഉപയോക്താക്കളെ ഫൈബര്‍ ടു ഹോം (FTTH) വിഭാഗത്തിലേക്ക് മാറ്റിയതിനാല്‍, മേയ് മാസത്തില്‍ അവരുടെ FWA ഉപയോക്താക്കളുടെ എണ്ണം 59 ലക്ഷമായി. എന്നിരുന്നാലും, അതേ മാസം ജിയോ 7.4 ലക്ഷം പുതിയ ഉപയോക്താക്കളെ കൂട്ടിച്ചേര്‍ത്തു.

ഐസിഐസിഐ സെക്യൂരിറ്റീസിലെ വിശകലന വിദഗ്ധരായ സഞ്‌ജേഷ് ജെയ്ന്‍, മോഹിത് മിശ്ര, അപരാജിത ചക്രബര്‍ത്തി എന്നിവര്‍ തയ്യാറാക്കിയ റിപ്പോര്‍ട്ടില്‍, വ്യവസായത്തിലെ മൊത്തം FWA ഉപയോക്താക്കളുടെ എണ്ണം (UBR ഒഴികെ) 74 ലക്ഷമാണെന്നും, ജിയോയുടെ UBR പുനര്‍വിന്യാസത്തിന് ശേഷം അവരുടെ ഉപയോക്താക്കളുടെ എണ്ണം 59 ലക്ഷമാണെന്നും വ്യക്തമാക്കുന്നു. 'UBR ഉള്‍പ്പെടെ ജിയോയുടെ FWA ഉപയോക്താക്കള്‍ 68.8 ലക്ഷമാണ്. ഇത് ടി-മൊബൈലിന്റെ 68.5 ലക്ഷം ഉപയോക്താക്കളെ മറികടക്കുന്നു. 2025 ജൂണ്‍ അവസാനത്തോടെ ജിയോ ലോകത്തിലെ ഏറ്റവും വലിയ FWA സേവനദാതാവാകുമെന്നതില്‍ യാതൊരു സംശയവുമില്ല,' റിപ്പോര്‍ട്ട് വ്യക്തമാക്കുന്നു.

ഇന്ത്യയിലെ ബ്രോഡ്ബാന്‍ഡ് വിപണിയില്‍ 50.72% വിഹിതം ജിയോയ്ക്കാണ്, ഇത് ഈ മേഖലയില്‍ അവരുടെ ആധിപത്യം ഉറപ്പിക്കുന്നു. 2025 മേയ് കണക്കുകള്‍ പ്രകാരം, ജിയോയുടെ വയര്‍ഡ് ബ്രോഡ്ബാന്‍ഡ് ഉപയോക്താക്കള്‍ 1.35 കോടിയും, വയര്‍ലെസ് ബ്രോഡ്ബാന്‍ഡ് ഉപയോക്താക്കള്‍ 48.09 കോടിയുമാണ്.
 

Content Highlights: Reliance Jio surpasses T-Mobile to become the world`s largest Fixed Wireless Access (FWA) provider