പ്രീ ഓർഡറിൽ വൻ ഡിമാന്റ്; ഐഫോൺ ഡ്യുവോ കിട്ടാൻ ഇനി 2027 വരെ കാത്തിരിക്കേണ്ടിവരുമോ?
ആപ്പിളിന്റെ ആദ്യ ഫോൾഡബിൾ സ്മാർട്ട്ഫോണായ ഐഫോൺ ഡ്യുവോയ്ക്ക് (iPhone Duo) മികച്ച പ്രതികരണം. പ്രീ-ഓർഡർ ആരംഭിച്ച് ഒരു മണിക്കൂറിനുള്ളിൽ തന്നെ ഫോണിന്റെ ഡെലിവറി തീയതികൾ അടുത്ത വർഷത്തേക്ക് നീണ്ടു. നിലവിൽ എല്ലാ സ്റ്റോറേജ് വേരിയന്റുകളുടെയും ഡെലിവറി 2027 ജനുവരി അവസാനത്തോടെ മാത്രമേ ലഭ്യമാകൂ എന്നാണ് ആപ്പിളിന്റെ വെബ്സൈറ്റിൽ കാണിക്കുന്നത്. അതേസമയം, ഫോണിനായുള്ള പ്രീ-ഓർഡറുകൾ ഓൺലൈനായി സ്വീകരിക്കുന്നത് കമ്പനി തുടരുന്നുണ്ട്.
ആദ്യ ഫോൾഡബിൾ ഐഫോണിന് മികച്ച പ്രതികരണമാണ് ലഭിക്കുന്നതെന്നും ഉപഭോക്താക്കൾക്ക് എത്രയും വേഗം ഫോൺ എത്തിക്കാനുള്ള ശ്രമങ്ങൾ തുടരുകയാണെന്നും ഓൺലൈൻ ഓർഡറുകൾ സ്വീകരിക്കുന്നത് തുടരുമെന്നും ബ്ലൂംബെർഗിന്റെ മാർക്ക് ഗുർമാനോട് പ്രതികരിച്ച ആപ്പിൾ അറിയിച്ചു.
അതേസമയം, ആപ്പിൾ സ്റ്റോറുകളിൽ നേരിട്ടെത്തി ഉപയോക്താക്കൾക്ക് ഐഫോൺ ഡ്യുവോ പരിചയപ്പെടാനും അനുഭവിച്ചറിയാനും കമ്പനി അവസരമൊരുക്കുന്നുണ്ട്. ഒക്ടോബർ 23-ന് ഐഫോൺ ഡ്യുവോയുടെ സ്റ്റോർ വിൽപ്പന ആരംഭിക്കാനാണ് ആപ്പിളിന്റെ പദ്ധതി. ഓൺലൈൻ ഓർഡറുകൾക്ക് ഡെലിവറി വൈകുമെങ്കിലും നേരിട്ട് സ്റ്റോറുകളിലെത്തി ഫോൺ വാങ്ങാൻ ആഗ്രഹിക്കുന്നവർക്കായി കമ്പനി പരിമിതമായ സ്റ്റോക്ക് മാറ്റിവെക്കാറുണ്ട്. അതിനാൽ, ഓൺലൈൻ ബുക്കിങ്ങിൽ ദീർഘമായ കാത്തിരിപ്പ് നേരിടുന്നവർക്ക് ആപ്പിൾ സ്റ്റോറുകളിൽനിന്ന് നേരത്തെ ഫോൺ ലഭിക്കാനുള്ള സാധ്യതയുണ്ട്.
എന്നാൽ, സ്റ്റോറുകളിൽ എത്ര യൂണിറ്റുകൾ ലഭ്യമാകുമെന്ന കാര്യത്തിൽ ഔദ്യോഗിക സ്ഥിരീകരണം നൽകിയിട്ടില്ല. ഐഫോൺ ഡ്യുവോ ഒക്ടോബർ 23-ന് തന്നെ ഡെലിവറി ലഭിക്കുന്ന രീതിയിൽ ബുക്ക് ചെയ്യാൻ കഴിഞ്ഞതായി ചില ഉപയോക്താക്കൾ ‘എക്സി’ൽ പങ്കുവെച്ചിട്ടുണ്ട്. അതിനാൽ ചില ഉപഭോക്താക്കൾക്ക് നിശ്ചിത ലോഞ്ച് തീയതിയിൽതന്നെ ഫോൺ ലഭിച്ചേക്കാം.
ഇന്ത്യയിൽ ഐഫോൺ ഡ്യുവോയുടെ വിലയും നിറങ്ങളും
സെപ്റ്റംബറിലാണ് ആപ്പിൾ ഐഫോൺ ഡ്യുവോ അവതരിപ്പിച്ചത്. സാംസങ് ഈ വർഷം അവതരിപ്പിച്ച ഫോൾഡബിൾ ഫോണുകളുടേതിന് സമാനമായ രീതിയിൽ, പാസ്പോർട്ടിനോട് സാമ്യമുള്ള വീതിയേറിയതും നീളം കുറഞ്ഞതുമായ രൂപകൽപ്പനയാണ് ഫോണിന്റെ പ്രത്യേകത.
ഇന്ത്യയിൽ ഐഫോൺ ഡ്യുവോയുടെ വിവിധ സ്റ്റോറേജ് വേരിയന്റുകളുടെ വില ഇങ്ങനെയാണ്:
256 ജിബി: 2,99,900 രൂപ
512 ജിബി: 3,24,900 രൂപ
1 ടിബി: 3,74,900 രൂപ
2 ടിബി: 4,49,900 രൂപ
സ്റ്റാർ വൈറ്റ് (Star White), നൈറ്റ് സ്കൈ (Night Sky) എന്നീ നിറങ്ങളിലാണ് ഫോൺ ലഭ്യമാകുക.
Content Highlights: Apple’s first foldable smartphone, the iPhone Duo, has witnessed strong pre-order demand, pushing online delivery estimates to late January 2027. Check the phone’s India price, storage variants and available colours.