പാസ്‌വേഡ് സൃഷ്ടിക്കാൻ AI-യുടെ സഹായം തേടരുത്; അപകടകരമെന്ന് സൈബർ സുരക്ഷാ വിദഗ്ധർ
എന്തിനും നിർമിതബുദ്ധി (എഐ) യുടെ സഹായം തേടുന്ന പ്രവണത വർധിച്ചുവരികയാണ്. പാസ്‌വേഡുകൾ സൃഷ്ടിക്കാനും പലരും എഐയുടെ സഹായം തേടിയേക്കാം. എന്നാൽ ഇത് അപകടകരമാണെന്ന് ചൂണ്ടിക്കാട്ടുകയാണ് എഐ സൈബർ സുരക്ഷാ സ്ഥാപനമായ ഇറെഗുലർ. ChatGPT, Claude, Gemini എന്നിവയുൾപ്പെടെയുള്ള പ്രമുഖ ചാറ്റ്‌ബോട്ടുകൾ പലപ്പോഴും എളുപ്പത്തിൽ ഊഹിക്കാവുന്ന പാസ്‌വേഡുകൾ നിർമ്മിക്കുന്നതായി തങ്ങൾ നടത്തിയ ഗവേഷണത്തിൽ കണ്ടെത്തിയതായി അവർ പറയുന്നു. ഇത്തരം ഊഹിക്കാവുന്ന പാറ്റേണുകൾ സുരക്ഷാ ഭീഷണി വർധിപ്പിക്കുന്ന സാഹചര്യത്തിൽ എഐ സഹായത്തോടെ സൃഷ്ടിച്ച പാസ്‌വേഡുകൾ ഉടൻ മാറ്റണമെന്ന് ഇറെഗുലർ സഹസ്ഥാപകൻ ഡാൻ ലഹാവ് സ്‌കൈ ന്യൂസിനോട് പറഞ്ഞു.
സൈബർ സുരക്ഷയിൽ ഊഹിക്കാവുന്ന പാറ്റേണുകൾ ഒരു വലിയ സുരക്ഷാ ഭീഷണിയാണെന്ന് ഇറെഗുലർ ചൂണ്ടിക്കാട്ടുന്നു. സൈബർ ക്രിമിനലുകൾക്ക് ഓട്ടോമേറ്റഡ് ടൂളുകൾ ഉപയോഗിച്ച് ഇത്തരം പാസ്‌വേഡുകൾ ഊഹിച്ചെടുക്കാൻ സാധിക്കും. ലാർജ് ലാംഗ്വേജ് മോഡലുകൾ (LLMs) പാസ്‌വേഡുകൾ ക്രമരഹിതമായി നിർമ്മിക്കുന്നില്ല. പകരം പരിശീലന ഡാറ്റയിൽ നിന്ന് പഠിച്ച പാറ്റേണുകളെ അടിസ്ഥാനമാക്കിയാണ് അവ ഔട്ട്പുട്ടുകൾ നിർമ്മിക്കുന്നത്. അവ സങ്കീർണമായി തോന്നാവുന്ന പാസ്‌വേഡുകൾ നിർമ്മിക്കുന്നു. എന്നാൽ അവ ആവർത്തിച്ചു വരുന്ന ഘടനകൾ പിന്തുടരാം.
ഇറെഗുലർ നടത്തിയ പരിശോധനയിൽ Claude ഉപയോഗിച്ച് നിർമിച്ച 50 പാസ്‌വേഡുകളിൽ 23 എണ്ണം മാത്രമായിരുന്നു സുരക്ഷിതമായവ. K9#mPx$vL2nQ8wR എന്ന ഒരു പാസ്‌വേഡ് 10 തവണ ആവർത്തിച്ച് സൃഷ്ടിക്കപ്പെട്ടു. മറ്റു പല പാസ്‌വേഡുകളിലും സമാനമായ പാറ്റേണുകൾ പിന്തുടർന്നു. OpenAI-യുടെ ChatGPTയും Google-ന്റെ Geminiയും കുറഞ്ഞ ആവർത്തനമാണ് കാണിച്ചതെങ്കിലും ഊഹിക്കാവുന്ന പാറ്റേണുകൾ പിന്തുടർന്നതായി കണ്ടെത്തി. ഗൂഗിളിന്റെ NanoBanana പോലും Post-it നോട്ടുകളിൽ പാസ്‌വേഡുകളുടെ ചിത്രങ്ങൾ നിർമ്മിക്കാൻ ആവശ്യപ്പെട്ടപ്പോൾ സമാനമായ പ്രശ്‌നങ്ങൾ പ്രകടിപ്പിച്ചു.
അതിനിടെ, ഓൺലൈൻ പാസ്‌വേഡ് ചെക്കറുകൾ ഇവയെ വളരെ ശക്തമെന്ന് വിലയിരുത്തുകയാണ് ചെയ്തത്. എന്നാൽ ഈ പാസ്‌വേഡുകൾ സമാനമായ പാറ്റേണുകൾ പിന്തുടരുന്നതിനാൽ അവ എളുപ്പത്തിൽ തകർക്കാൻ കഴിയുമെന്ന് ഇറെഗുലറിന്റെ ഗവേഷണം കണ്ടെത്തി. ഈ പ്രശ്‌നം വ്യക്തിഗത ഉപയോക്താക്കളെ മാത്രമല്ല ബാധിക്കുന്നത്. ഡെവലപ്പർമാർ കോഡ് എഴുതാൻ AI യെ കൂടുതൽ കൂടുതൽ ആശ്രയിക്കുന്നതിനാൽ, AI നിർമ്മിച്ച പാസ്‌വേഡുകൾ ആപ്പുകളിലും വെബ്‌സൈറ്റുകളിലും പ്രത്യക്ഷപ്പെടാം.
പകരം എന്തു ചെയ്യണം?
പാസ്‌വേഡുകൾ നിർമ്മിക്കാൻ AI ഉപയോഗിക്കുന്നത് ഒഴിവാക്കുക എന്നതാണ് പരിഹാരമെന്ന് വിദഗ്ധർ പറയുന്നു. പകരം വിശ്വസനീയമായ പാസ്‌വേഡ് മാനേജർ ഉപയോഗിക്കുക അല്ലെങ്കിൽ ഫേഷ്യൽ റെക്കഗ്നിഷൻ അല്ലെങ്കിൽ ഫിംഗർപ്രിന്റ് പോലുള്ള പാസ്‌കീകളിലേക്ക് മാറുക. ഗൂഗിളിന്റെ AI സംവിധാനങ്ങൾ പാസ്‌വേഡ് നിർമ്മാണത്തിനായി രൂപകൽപ്പന ചെയ്തിട്ടുള്ളവയല്ലെന്ന് കമ്പനി തന്നെ വ്യക്തമാക്കിയിട്ടുള്ളതാണ്.
Content Highlights: New research reveals leading AI tools like ChatGPT, Claude & Gemini generate predictable, weak passwords. Learn why and what to do instead to protect your accounts.