വാഹനാപകടം തടയാനും 6ജി; ആശയമവതരിപ്പിച്ച് നോക്കിയ

ന്യൂഡൽഹി: അതിവേഗം കുതിക്കുന്ന വാഹനങ്ങളുടെ കൂട്ടിയിടി ഒഴിവാക്കാൻ മൊബൈൽ സാങ്കേതികവിദ്യയ്ക്കാവുമോ? ലോകം 6 ജി കണക്ടിവിറ്റിയിലേക്ക് മാറുന്നതോടെ അതും സാധിക്കുമെന്ന് കാണിക്കുകയാണ് നോക്കിയ.

മനുഷ്യരുടെ ആറ് ഇന്ദ്രിയങ്ങൾപോലെ പ്രവർത്തിക്കാൻശേഷിയുള്ള 6 ജി റേഡിയോ ഉപകരണമാണ് നോക്കിയ അവതരിപ്പിച്ചത്. ട്രാൻസ്മിറ്ററും റിസീവറും ചേർന്ന ഉപകരണത്തിലൂടെ നെറ്റ്‌വർക്കിനെ സെൻസറുകളാക്കിമാറ്റുന്ന പ്രവർത്തനമാണ് റേഡിയോ ചെയ്യുന്നത്.

വസ്തുക്കളുടെ അകലവും സ്ഥാനവും വേഗവും തിരിച്ചറിയാൻ മാത്രമല്ല, ഉടനടി നടപടിയെടുക്കാനും ഈ ഉപകരണം ഉപയോഗിക്കാനാകുമെന്ന് നോക്കിയയുടെ ബെംഗളൂരുവിലെ ഗവേഷണവിഭാഗം ഡയറക്ടർ പൊന്നി കൃഷ്ണമൂർത്തി ‘മാതൃഭൂമി’യോട് പറഞ്ഞു. വാഹനങ്ങളിൽക്കൂടി ഭാവിയിൽ 6 ജി സാങ്കേതികവിദ്യയുപയോഗിക്കുന്ന ഉപകരണങ്ങൾ വരുന്നതോടെ കൂട്ടിയിടിയും മറ്റും മുൻകൂട്ടിയറിഞ്ഞ് ഓട്ടോമാറ്റിക്കായി ബ്രേക്ക് ചെയ്യാനും സാധിക്കും.

അപകടങ്ങളും മറ്റും സെക്കൻഡിന്റെ നൂറിലൊരംശം സമയംകൊണ്ട് തിരിച്ചറിഞ്ഞ് നടപടിയെടുക്കാൻ സഹായിക്കുന്നതാണ് റേഡിയോയെന്ന് നോക്കിയയുടെ 6 ജി ഗവേഷണത്തിൽ പ്രധാന പങ്കുവഹിക്കുന്ന എം. അരശുവും പറഞ്ഞു.

Content Highlights: 6g technology to prevent vehicle collision