332 പന്ത് നേരിട്ട് പാറ പോലെ ഉറച്ചുനിന്ന് സെദിഖുല്ല; ബംഗ്ലാദേശിനെതിരെ അഫ്ഗാനിസ്താന് ആവേശ സമനില

അബൂദാബി: ബംഗ്ലാദേശിനെതിരായ ടെസ്റ്റിൽ അഫ്ഗാനിസ്താന് ആവേശ സമനില. ജയിക്കാൻ 479 റൺസ് എന്ന വിജയലക്ഷ്യം പിന്തുടർന്ന അഫ്ഗാനിസ്താന്റെ മുമ്പിലുണ്ടായിരുന്ന ഏക പോംവഴി പിടിച്ചുനിന്ന് സമനില നേടുക എന്നത് മാത്രമായിരുന്നു. അവസാന ദിവസത്തെ കളി അവസാനിക്കുമ്പോൾ അഫ്ഗാനിസ്താൻ എട്ട് വിക്കറ്റ് നഷ്ടത്തിൽ 346 റൺസ് എന്ന നിലയിലായിരുന്നു.

സെദിഖുല്ല അതലിന്റെ ചെറുത്തുനിൽപ്പാണ് അഫ്ഗാനിസ്താനെ തോൽവിയിൽ നിന്ന് രക്ഷിച്ചത്. 332 പന്തുകളിൽ നിന്ന് 111 റൺസ് നേടി സെദിഖുല്ല അവസാനം വരെ ക്രീസിൽ തുടർന്നു. 124 പന്തിൽ നിന്ന് 51 റൺസ് എടുത്ത റഹ്‌മത് ഷായുമായുള്ള കൂട്ടുകെട്ടും, വാലറ്റത്തെ ബാറ്റർമാരുടെ മികച്ച പ്രതിരോധവും അഫ്ഗാനിസ്താനെ മത്സരത്തിൽ നിലനിർത്തി. യാമിൻ അഹമ്മദ്‌സായി നിർണായകമായൊരു ഇന്നിങ്‌സ് കാഴ്ചവച്ചു. 19 റൺസ് മാത്രമേ എടുത്തുള്ളൂവെങ്കിലും അദ്ദേഹം 85 പന്തുകൾ നേരിട്ടു. അതലിനൊപ്പം ചേർന്നുള്ള ഈ കൂട്ടുകെട്ട് ബംഗ്ലാദേശ് ബൗളർമാരെ പൂർണ്ണമായും തളർത്തി.

മത്സരത്തിന്റെ അവസാന മണിക്കൂർ ഏറെ സമ്മർദ്ദം നിറഞ്ഞതായിരുന്നു. അഫ്ഗാനിസ്താൻ 346/8 എന്ന നിലയിലായിരുന്നപ്പോൾ ജയിക്കാൻ ബംഗ്ലാദേശിന് രണ്ട് വിക്കറ്റുകൾ കൂടി മതിയായിരുന്നു. എങ്കിലും, മങ്ങിവരുന്ന വെളിച്ചത്തിൽ ധീരമായി പിടിച്ചുനിന്ന അഫ്ഗാന്റെ വാലറ്റക്കാർ മത്സരം സമനിലയിൽ എത്തിച്ചു.

നേരത്തെ ഒന്നാമിന്നിങ്‌സിൽ 106 റൺസ് ലീഡ് നേടിയിരുന്ന ബംഗ്ലാദേശ് രണ്ടാം ഇന്നിങ്‌സിൽ ഏഴ് വിക്കറ്റ് നഷ്ടത്തിൽ 372 റൺസ് എന്ന നിലയിൽ ഇന്നിങ്‌സ് ഡിക്ലയർ ചെയ്യുകയായിരുന്നു. ലിറ്റൺ ദാസ് 117 പന്തിൽ 102 റൺസ് നേടി. ക്യാപ്റ്റൻ നജ്മുൽ ഹൊസൈൻ ഷാന്റോ (82), മുഷ്ഫിഖുർ റഹീം (81) എന്നിവരും അദ്ദേഹത്തിന് മികച്ച പിന്തുണ നൽകി.

Content Highlights: Afghanistan secured a thrilling draw against Bangladesh in the Test match., Sediqullah Atal played a resilient knock, scoring 111 runs off 332 balls., Rahmat Shah and tail-enders provided crucial support to save the match., Bangladesh dominated earlier with centuries and fifties from Litton Das, Najmul Hossain Shanto, and Mushfiqur Rahim.