മിസ്റ്ററി ത്രില്ലറുമായി ദിലീഷ് പോത്തനും രഞ്ജിത്ത് സജീവും, ഗോളം ഫസ്റ്റ്ലുക്ക്

രഞ്ജിത്ത് സജീവ്, ദിലീഷ് പോത്തൻ എന്നിവരെ പ്രധാന കഥാപാത്രങ്ങളാക്കി ഫ്രാഗ്രന്റ്‌  നേച്ചർ ഫിലിം ക്രിയേഷൻസിന്റെ ബാനറിൽ ആൻ, സജീവ് എന്നിവർ ചേർന്ന് നിർമിക്കുന്ന ഗോളത്തിന്റെ ഫസ്റ്റ്ലുക്ക് പോസ്റ്റർ പുറത്തിറങ്ങി. സസ്പെൻസ് മിസ്റ്ററി ത്രില്ലറായി ഒരുങ്ങുന്ന ഗോളം സംവിധാനം ചെയ്യുന്നത് പുതുമുഖ സംവിധായകനായ  സംജാദ് ആണ്.

മൈക്ക്, ഖൽബ് എന്നി ചിത്രങ്ങൾക്ക് ശേഷം രഞ്ജിത്ത് സജീവ്  കേന്ദ്രകഥാപാത്രത്തെ അവതരിപ്പിക്കുന്ന ഗോളത്തിൽ സിദ്ദിഖ്, അലൻസിയർ, ചിന്നുചാന്ദിനി, തുടങ്ങിയ പ്രധാനതാരങ്ങൾക്കൊപ്പം  പതിനേഴോളം പുതുമുഖ താരങ്ങളും അണിനിരക്കുന്നു.  പ്രവീൺ വിശ്വനാഥും  സംജാദും ചേർന്നാണ് തിരക്കഥ ഒരുക്കിയിരിക്കുന്നത്.

2023 ലെ   മികച്ച വസ്ത്രാലങ്കാരത്തിനുള്ള സംസ്ഥാന  ചലച്ചിത്ര പുരസ്‌കാരം(സൗദി വെള്ളക്ക, നെയ്മർ ) സ്വന്തമാക്കിയ  മഞ്ജുഷ രാധാകൃഷ്ണനാണ് ഗോളത്തിന്റെ വസ്ത്രാലങ്കാരം നിർവഹിക്കുന്നത്. സസ്പെൻസ് ത്രില്ലർ ഇരട്ടയുടെ ക്യാമറ കൈകാര്യം ചെയ്ത വിജയ് കൃഷ്ണൻ  ഛായാഗ്രാഹകനാവുമ്പോൾ നെയ്മർ, കിംഗ് ഓഫ് കൊത്ത തുടങ്ങിയ സിനിമകളുടെ  കലാസംവിധാനം ഒരുക്കിയ നിമിഷ്  താനൂർ  ചിത്രത്തിന്റെ കലാസംവിധാനം ഒരുക്കുന്നു.

ഉദയ് രാമചന്ദ്രൻ  എക്സിക്യൂട്ടീവ് പ്രൊഡ്യൂസർ ആയെത്തുന്ന ഗോളത്തിൽ  ആദ്യമായി എബി സാൽവിൻ തോമസ് സംഗീതവും പശ്ചാത്തല സംഗീതവും നിർവഹിക്കുന്നു. മേക്കപ്പ് -രഞ്ജിത്ത് മണാലിപറമ്പിൽ,  സ്റ്റീൽസ്-ജസ്റ്റിൻ വർഗീസ്, ശബ്ദമിശ്രണം വിഷ്ണു ഗോവിന്ദ്. ചിത്രം 2024  ജനുവരി തിയറ്ററുകളിൽ എത്തും. പി ആർ ഒ ദിനേശ് ശബരി.

Content Highlights: golam movie firstlook poster ranjith sajeev and dileesh pothen