കേളി സിൽവർ വോളിബോൾ: ആദ്യദിനം ആവേശപ്പോരാട്ടം അറബ്‌കോ, സ്റ്റാർ റിയാദ്, മംഗളൂർ, ശക്കർഘർ വിജയികൾ
റിയാദ്: കേളി കലാസാംസ്കാരിക വേദിയുടെ സിൽവർ ജൂബിലി ആഘോഷങ്ങളുടെ ഭാഗമായി കേളി കേന്ദ്ര കമ്മിറ്റിയും സുലൈ ഏരിയ കമ്മിറ്റിയും സംയുക്തമായി സംഘടിപ്പിക്കുന്ന ‘കേളി സിൽവർ വോളിബോൾ ടൂർണമെന്റ് 2026’ന് സുലൈ അറബ്‌കോ ഗ്രൗണ്ടിൽ ആവേശകരമായ തുടക്കം. ആദ്യദിനം നടന്ന ഗ്രൂപ്പ് മത്സരങ്ങളിൽ അറബ്‌കോയും മംഗളൂർ സ്പോർട്സ് ക്ലബ്ബ് ജുബൈലും രണ്ട് മത്സരങ്ങളിൽ വീതം വിജയിച്ചപ്പോൾ, സ്റ്റാർ റിയാദും ശക്കർഘറും ഓരോ മത്സരങ്ങളിൽ വിജയം നേടി.
വൈകിട്ട് നടന്ന ഉദ്ഘാടന ചടങ്ങിൽ സിൽവർ ജൂബിലി ആക്ടിങ് ചെയർമാൻ നൗഫൽ സിദ്ദീഖ് അധ്യക്ഷനായി. പെർഫക്ട് പ്യൂരിറ്റി മാർക്കറ്റിങ് മാനേജർ സഹീർ അലി ടൂർണമെന്റ് ഉദ്ഘാടനം ചെയ്തു. കേളി രക്ഷാധികാരി സെക്രട്ടറി കെ.പി.എം. സാദിഖ്, രക്ഷാധികാരി കമ്മിറ്റി അംഗം സീബാ കൂവോട്, അറബ്‌കോ മാനേജിങ് ഡയറക്ടർ രാമചന്ദ്രൻ, അറബ്‌കോ മാനേജർ സാലിം അൽ അംരി, കേളി പ്രസിഡന്റ് ഗഫൂർ ആനമങ്ങാട്, ട്രഷറർ മധു ബാലുശ്ശേരി, കേളി സ്പോർട്സ് കൺവീനർ ഷമീം മേലേതിൽ എന്നിവർ ആശംസകൾ നേർന്നു. കേളി ആക്ടിങ് സെക്രട്ടറി ഷാജി റസാഖ് സ്വാഗതവും ജോയിന്റ് കൺവീനർ റഫീഖ് ചാലിയം നന്ദിയും പറഞ്ഞു.
ആദ്യ മത്സരത്തിൽ അറബ്‌കോ ലോജസ്റ്റിക് 25–20, 27–25 എന്ന സ്കോറിന് റിബൽസ് റിയാദിനെ പരാജയപ്പെടുത്തി. റിബൽസായിരുന്നു ആദ്യ സർവ് എടുത്തത്.
രണ്ടാം മത്സരത്തിൽ സ്റ്റാർ റിയാദ് 29–27, 24–26, 16–14 എന്ന ആവേശകരമായ സ്കോറിന് വോളി ഫ്രണ്ട്ൻസ് റിയാദിനെ കീഴടക്കി.
മൂന്നാം മത്സരത്തിൽ അറബ്‌കോയുടെ മികച്ച പ്രകടനം തുടർന്നു. 25–20, 25–12 എന്ന സ്കോറിന് ശക്കർഘറിനെ പരാജയപ്പെടുത്തി അറബ്‌കോ രണ്ടാം ജയം സ്വന്തമാക്കി.
നാലാം മത്സരത്തിൽ മംഗളൂർ സ്പോർട്സ് ക്ലബ് ജുബൈൽ 25–19, 28–26 എന്ന സ്കോറിന് സ്റ്റാർ റിയാദിനെ തോൽപ്പിച്ചു. അഞ്ചാം മത്സരത്തിൽ ശക്കർഘർ 25–13, 16–25, 15–12 എന്ന സ്കോറിന് റിബൽസ് റിയാദിനെ പരാജയപ്പെടുത്തി.
ആറാം മത്സരത്തിൽ മംഗളൂർ സ്പോർട്സ് ക്ലബ് ജുബൈൽ 25–18, 25–15 എന്ന സ്കോറിന് വോളി ഫ്രണ്ട്ൻസിനെ തോൽപ്പിച്ചു.
ഹനീഫ് മംഗലാപുരം, ദീപക് മംഗലാപുരം, ഗോപിനാഥ് കണ്ണൂർ എന്നിവരുടെ നേതൃത്വത്തോലുള്ള റഫറി പാനൽ മത്സരങ്ങൾ നിയന്ത്രിച്ചു.
ആദ്യദിനത്തിലെ മത്സരങ്ങൾക്ക് പിന്നാലെ സെമി ഫൈനൽ പോരാട്ടങ്ങൾക്ക് വേദിയൊരുങ്ങി. ആദ്യ സെമിയിൽ മംഗളൂർ സ്പോർട്സ് ക്ലബ് ജുബൈൽ ശക്കർഘറിനെയും രണ്ടാം സെമിയിൽ സ്റ്റാർ റിയാദ് അറബ്‌കോ ലോജസ്റ്റിക്കിനെയും നേരിടും. സെമി ഫൈനൽ മത്സരങ്ങൾക്ക് പിന്നാലെ ഫൈനലും നടക്കും.
റിയാദിലെ പ്രമുഖ ആറ് ടീമുകൾ മാറ്റുരയ്ക്കുന്ന ടൂർണമെന്റിൽ സൗദിയുട വിവിധ ഭാഗങ്ങളിൽ നിന്നും, സൗദിക്ക് പുറത്തു നിന്നും മികച്ച താരങ്ങളാണ് അണിനിരക്കുന്നത്. സിൽവർ ജൂബിലി ആഘോഷങ്ങൾക്ക് കായിക ആവേശം പകരുന്നതിനൊപ്പം പ്രവാസി സമൂഹത്തിലെ സൗഹൃദവും കൂട്ടായ്മയും ശക്തിപ്പെടുത്തുന്നതിനുള്ള വേദി കൂടിയായി ടൂർണമെന്റ് മാറുകയാണ്. റിയാദിലെ കായികപ്രേമികളുടെ സാന്നിധ്യം മത്സരങ്ങൾ ആവേശഭരിതമായി.
Content Highlights: The 'Keli Silver Volleyball Tournament 2026' organized by Keli Kala Samskarika Vedi kicked off at the Sulai Arabco Ground in Riyadh, featuring six top teams and setting the stage for action-packed semi-final and final matches.