'സ്പർശം 2026' സ്തനാർബുദ ബോധവൽക്കരണ പരിപാടി ശ്രദ്ധേയമായി

മനാമ:സ്തനാർബുദത്തെക്കുറിച്ചുള്ള അവബോധം വളർത്തുന്നതിനും സ്ത്രീകളുടെ ആരോഗ്യസംരക്ഷണത്തിന് പ്രചോദനം നൽകുന്നതിനുമായി ബി.കെ.എസ്. വനിതാവേദിയും കിംസ് ഹെൽത്തും സംയുക്തമായി സംഘടിപ്പിച്ച "സ്പർശം 2026" സ്തനാർബുദ ബോധവൽക്കരണ പരിപാടി വിജയകരമായി പൂർത്തിയായി.

"അറിവ് ഇന്ന് ആരോഗ്യകരമായ നാളെകൾക്കായി!" എന്ന സന്ദേശത്തോടെയാണ് പരിപാടി സംഘടിപ്പിച്ചത്. സ്ത്രീകളും പുരുഷന്മാരും അടക്കം നിരവധി പേർ സെമിനാറിൽ പങ്കെടുത്തു. സ്തനാർബുദം നേരത്തെ കണ്ടുപിടിക്കേണ്ടതിന്റെ പ്രാധാന്യത്തെക്കുറിച്ചും പ്രതിരോധ മാർഗ്ഗങ്ങളെക്കുറിച്ചും വിശദീകരിച്ച ബോധവൽക്കരണ സെമിനാറിന് റോയൽ ബഹ്റൈൻ ഹോസ്പിറ്റൽ സൽമാനിയയിലെ ജനറൽ സർജറി സ്പെഷ്യലിസ്റ്റ് ഡോ. നീതു രവി, ഉമ്മുൽ ഹസം കിംസ് ഹെൽത്ത് ഹോസ്പിറ്റലിലെ ഗൈനക്കോളജിസ്റ്റ് ഡോ. കൃഷ്ണ പ്രിയ ലീല എന്നിവർ നേതൃത്വം നൽകി. പങ്കെടുത്തവരുടെ സംശയങ്ങൾക്ക് ഡോക്ടർമാർ മറുപടി നൽകി.

രോഗനിർണ്ണയ വേളയിലും ചികിത്സാ ഘട്ടങ്ങളിലും കുടുംബത്തിലെ സ്ത്രീകൾക്ക് ആവശ്യമായ മാനസിക ധൈര്യവും ആത്മവിശ്വാസവും പകരേണ്ടത് പുരുഷന്മാരാണെന്ന തിരിച്ചറിവോടെ, ഇത്തരം നിർണ്ണായക പരിപാടികളിൽ പുരുഷന്മാരും സജീവമായി പങ്കെടുക്കേണ്ടതുണ്ടെന്ന് ചടങ്ങിൽ സംസാരിച്ചവർ വ്യക്തമാക്കി. സൗജന്യ രക്തപരിശോധന, ഗൈനക്കോളജി കൺസൾട്ടേഷൻ, രക്തസമ്മർദ്ദവും മറ്റ് പ്രധാന ആരോഗ്യ സൂചികകളും പരിശോധിക്കൽ എന്നിവ സെമിനാറിന്റെ ഭാഗമായി ഒരുക്കിയിരുന്നു. കൂടാതെ, എക്സ്ട്രീം ഫിറ്റ്നസ് ജിം പരിശീലകരുടെ നേതൃത്വത്തിൽ ഫിറ്റ്നസ് വിനോദ മത്സരങ്ങളും നടന്നു.

സമാജം പ്രസിഡന്റ് പി.വി. രാധാകൃഷ്ണപിള്ള, ജനറൽ സെക്രട്ടറി വർഗീസ് കാരക്കൽ, വൈസ് പ്രസിഡന്റ് ദേവദാസ് കുന്നത്ത്, കിംസ് ഹെൽത്ത് ഹോസ്പിറ്റൽ സി.ഒ.ഒ. ഡോ. മിഷാൽ റഹീം, മാർക്കറ്റിംഗ് കോഓർഡിനേറ്റർ സൂര്യനാരായണൻ, വനിതാവേദി സെക്രട്ടറി നിമ്മി റോഷൻ തുടങ്ങിയവർ ചടങ്ങിൽ സന്നിഹിതരായിരുന്നു. വനിതാവേദി പ്രസിഡന്റ് മോഹിനി തോമസ് സ്വാഗതവും കോഓർഡിനേറ്റർ ആതിര സുരേന്ദ്രൻ കൃതജ്ഞതയും രേഖപ്പെടുത്തി.

Content Highlights: Sparsham 2026 breast cancer awareness program organized jointly by BKS Vanithavedi and KIMSHEALTH in Manama., Led by medical experts Dr. Neetu Ravi and Dr. Krishna Priya Leela focusing on early detection and prevention., Provided free health check-ups including blood tests, gynecology consultations, and fitness activities.