ഈസ അൽ കബീറിനെക്കുറിച്ചുള്ള പ്രദർശനം ഉദ്ഘാടനം ചെയ്ത് ഉപപ്രധാനമന്ത്രി

മനാമ: ബഹ്റൈൻ നാഷണൽ മ്യൂസിയത്തിൽ 'ബഹ്റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസ്' സംഘടിപ്പിച്ച, ബഹ്റൈന്റെയും അനുബന്ധ പ്രദേശങ്ങളുടെയും ഭരണാധികാരിയായിരുന്ന മഹാനായ ഈസ അൽ കബീറിനെക്കുറിച്ചുള്ള പ്രദർശനം, ബഹ്റൈൻ രാജാവ് ഹമദ് ബിൻ ഈസ അൽ ഖലീഫയുടെ പ്രതിനിധിയായി ഉപപ്രധാനമന്ത്രി ശൈഖ് ഖാലിദ് ബിൻ അബ്ദുള്ള അൽ ഖലീഫ ഉദ്ഘാടനം ചെയ്തു. ഉദ്ഘാടന ചടങ്ങിൽ മന്ത്രിമാരും മുതിർന്ന ഉദ്യോഗസ്ഥരും ക്ഷണിക്കപ്പെട്ട അതിഥികളും പങ്കെടുത്തു. ഈ പ്രദർശനത്തിന് രാജാവ് നൽകിയ പിന്തുണ, ബഹ്റൈന്റെ സമ്പന്നമായ ചരിത്രം രേഖപ്പെടുത്തുന്നതിനും, ആധുനിക രാഷ്ട്രത്തിന് അടിത്തറ പാകിയ നേതാക്കളെ അനുസ്മരിക്കുന്നതിനും, അവരുടെ പൈതൃകം വർത്തമാന, ഭാവി തലമുറകൾക്കായി സംരക്ഷിക്കുന്നതിനുമുള്ള അദ്ദേഹത്തിന്റെ പ്രതിബദ്ധതയെയാണ് പ്രതിഫലിപ്പിക്കുന്നതെന്ന് ശൈഖ് ഖാലിദ് ബിൻ അബ്ദുള്ള പറഞ്ഞു.

മഹാനായ ഈസ അൽ കബീറിന്റെ പൈതൃകത്തെ അനുസ്മരിക്കുക എന്നത്, ആധുനിക രാഷ്ട്രത്തിന്റെ അടിത്തറ പാകിയ ആറ് പതിറ്റാണ്ടിലേറെ നീണ്ട നിർണായക കാലഘട്ടത്തെ തിരിഞ്ഞുനോക്കുക കൂടിയാണെന്ന് ഉപപ്രധാനമന്ത്രി പറഞ്ഞു. ആ കാലഘട്ടമാണ് ബഹ്റൈനെ സമഗ്ര വികസനത്തിന്റെ പാതയിലേക്ക് നയിച്ചത്. രാജാവിന്റെ നേതൃത്വത്തിലും, കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ നിർദ്ദേശങ്ങൾക്കനുസരിച്ചും ആ വികസന യാത്ര ഇന്നും തുടരുന്നു. മഹാനായ ഈസ അൽ കബീറിന്റെ പൈതൃകം, രാജ്യത്തിനായുള്ള അദ്ദേഹത്തിന്റെ സംഭാവനകൾ, സ്ഥിരത ശക്തിപ്പെടുത്തുന്നതിലും നിയമപരവും പൗരത്വപരവുമായ സ്ഥാപനങ്ങൾ കെട്ടിപ്പടുക്കുന്നതിലും അദ്ദേഹം വഹിച്ച പങ്ക് എന്നിവയെ മാനിച്ചുകൊണ്ട് രാജാവ് പ്രഖ്യാപിച്ച 'ഈസ അൽ കബീർ വർഷ'ത്തോടനുബന്ധിച്ചാണ് ഈ പ്രദർശനം സംഘടിപ്പിച്ചിരിക്കുന്നത് എന്നത് ഇതിന്റെ പ്രാധാന്യം വർദ്ധിപ്പിക്കുന്നുവെന്ന് ശൈഖ് ഖാലിദ് ബിൻ അബ്ദുള്ള ചൂണ്ടിക്കാട്ടി.

പ്രദർശനം ഒരുക്കുന്നതിനും സംഘടിപ്പിക്കുന്നതിനുമുള്ള 'ബഹ്റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസി'ന്റെയും അതിന്റെ പ്രസിഡന്റിന്റെയും ജീവനക്കാരുടെയും പരിശ്രമങ്ങളെ ഉപപ്രധാനമന്ത്രി അഭിനന്ദിച്ചു. ബഹ്റൈന്റെ ദേശീയ സ്മരണകൾ സംരക്ഷിക്കുന്നതിനും, ചരിത്രപരമായ സ്വത്വം ഉയർത്തിക്കാട്ടുന്നതിനും, പൈതൃകം വരുംതലമുറകളിലേക്ക് കൈമാറുന്നതിനുമുള്ള അവരുടെ പ്രതിബദ്ധതയെ അദ്ദേഹം എടുത്തുപറഞ്ഞു. പ്രദർശന വേദിയിൽ ചുറ്റിനടന്ന ശൈഖ് ഖാലിദ് ബിൻ അബ്ദുള്ള, ചരിത്രപരമായ പുരാവസ്തുക്കൾ, രേഖകൾ, കൈയെഴുത്തുപ്രതികൾ, ആ കാലഘട്ടത്തിലെ സുപ്രധാന സംഭവങ്ങൾ അടയാളപ്പെടുത്തുന്ന ഫോട്ടോകൾ എന്നിവ കണ്ടു. അന്തരിച്ച ഭരണാധികാരിയുടെ ജീവിതത്തിലെയും ഭരണകാലത്തെയും നിർണായക ഘട്ടങ്ങളും, ആ കാലയളവിൽ ബഹ്റൈൻ സാക്ഷ്യം വഹിച്ച പ്രധാന വികസനങ്ങളും ഇവയിൽ ഉൾപ്പെടുന്നു.

ബഹ്റൈൻ നാഷണൽ മ്യൂസിയത്തിലെ സന്ദർശക പുസ്തകത്തിൽ കുറിപ്പെഴുതിയ ഉപപ്രധാനമന്ത്രി, ഈ പ്രദർശനം ഉദ്ഘാടനം ചെയ്യാൻ രാജാവ് തന്നെ ചുമതലപ്പെടുത്തിയതിൽ അഭിമാനം പ്രകടിപ്പിച്ചു. സാംസ്‌കാരികവും ദേശീയവുമായ ദൗത്യം നിറവേറ്റുന്നതിൽ 'ബഹ്റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസി'ന് തുടർന്നും വിജയം നേരുന്നുവെന്നും അദ്ദേഹം ആശംസിച്ചു. ബഹ്റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസ് പ്രസിഡന്റ് ഷെയ്ഖ് ഖലീഫ ബിൻ അഹമ്മദ് ബിൻ അബ്ദുള്ള അൽ ഖലീഫ, ഈ പ്രദർശനത്തിന് നൽകിയ രക്ഷാകർതൃത്വത്തിനും, ബഹ്റൈനിലെ സാംസ്‌കാരിക-പുരാവസ്തു മേഖലകൾക്ക് നൽകിവരുന്ന നിരന്തരമായ പിന്തുണയ്ക്കും രാജാവിനോട് നന്ദിയും അഭിനന്ദനവും അറിയിച്ചു.

Content Highlights: bahrain-isa-al-kabir-exhibition-inaugurated