സമാധാനപ്രതീക്ഷകൾക്ക് തിരിച്ച‌ടി; ആക്രമണം പുനരാരംഭിച്ച് യുഎസും ഇറാനും, ഇറാഖിൽ 20 പേർ കൊല്ലപ്പെട്ടു
കയ്‌റോ: പശ്ചിമേഷ്യയെ സംഘർഷഭരിതമാക്കി ആക്രമണ-പ്രത്യാക്രമണം പുനരാരംഭിച്ച് യു.എസും ഇറാനും. മേഖലയിലെ യു.എസ്. സൈന്യത്തെ ഇറാൻ ലക്ഷ്യമിട്ടെന്നും തിരിച്ചടിക്കാൻ തയ്യാറായി നിൽക്കുകയാണെന്നും യു.എസ്. സെൻട്രൽ കമാൻഡ് (സെന്റ്‌കോം) പറഞ്ഞ് മണിക്കൂറുകൾക്കമാണ് ആക്രമണം.
ബുധനാഴ്ച രാവിലെ ജോർദാനിലെ യു.എസ്. താവളം ലക്ഷ്യമിട്ട് ഇറാൻ ആക്രമണം നടത്തുകയും ഇറാഖിലെ ഇറാൻ അനുകൂല സായുധസംഘങ്ങൾക്കുനേരേ യു.എസും സൗദിയും സംയുക്ത ആക്രമണം നടത്തുകയും ചെയ്തതോടെ മേഖല വീണ്ടും സംഘർഷച്ചൂടിലായിരുന്നു. ഇറാഖിൽ 20 പേരാണ് കൊല്ലപ്പെട്ടത്. പിന്നാലെ ഇറാനിൽ യു.എസ്. ബോംബിട്ടതോടെ മേഖല വീണ്ടും സമ്പൂർണയുദ്ധഭീതിയിലായി.
മിസൈൽ-ഡ്രോൺ കേന്ദ്രങ്ങൾ, തീരദേശ റഡാർ നിരീക്ഷണകേന്ദ്രങ്ങൾ തുടങ്ങി ഇസ്‍ലാമിക് റെവലൂഷണറി ഗാർഡിന്റെ ഡസനോളം കേന്ദ്രങ്ങൾ വ്യാഴാഴ്ച ആക്രമിച്ചെന്ന് സെന്റ്‌കോം പറഞ്ഞു. ഹോർമുസ് കടലിടുക്ക് തീരത്തെ ഖെഷെം ദ്വീപിലുണ്ടായ യു.എസ്. ആക്രമണത്തിൽ മൂന്നുപേർ കൊല്ലപ്പെട്ടു. വ്യാഴാഴ്ചയും ജോർദാനിലേക്ക് ഇറാനിയൻ മിസൈലുകളെത്തി. അഞ്ചെണ്ണം ജോർദാൻ സൈന്യം വെടിവെച്ചിട്ടു. കുവൈത്തിന്റെ വടക്കൻ മേഖലയിൽ ചൈനീസ് കമ്പനിയുടെ സ്ഥാപനത്തിനുനേരേയുണ്ടായ ഇറാൻ ആക്രമണത്തിൽ ഒരാൾ കൊല്ലപ്പെട്ടു. ജോർദാൻ ആക്രമണത്തിനു മറുപടിയായി ഇറാന് കനത്ത പ്രഹരം നൽകുമെന്ന് യു.എസ്. പ്രസിഡന്റ് ഡൊണാൾഡ് ട്രംപ് പറഞ്ഞിരുന്നു.
ജൂൺ 17-ന് ഇടക്കാല വെടിനിർത്തൽക്കരാർ നിലവിൽവന്നെങ്കിലും ഹോർമുസ് കടലിടുക്കിന്റെ നിയന്ത്രണവുമായി ബന്ധപ്പെട്ട തർക്കം സ്ഥിതി വഷളാക്കി. ഹോർമുസിൽ ഇറാൻ കപ്പലാക്രമിച്ചതുമായി ബന്ധപ്പെട്ട് ആഴ്ചകളോളം ഇരുകൂട്ടരും ആക്രമണം തുടർന്നു. പിന്നീട് അമേരിക്ക അയവുവരുത്തി. ഇതോടെ യു.എസിന്റെ ഗൾഫിലെ സഖ്യകക്ഷികളെ തിരിച്ചാക്രമിക്കുന്നത് തങ്ങളും നിർത്തുകയാണെന്ന് ഞായറാഴ്ച ഇറാൻ പ്രഖ്യാപിച്ചു. അതിനുശേഷം മേഖലയിൽ കാര്യമായ ആക്രമണം റിപ്പോർട്ടുചെയ്തിരുന്നില്ല.
മധ്യസ്ഥർ വെടിനിർത്തൽ ചർച്ചകളും പുനരുജ്ജീവിപ്പിച്ചിരുന്നു. സമാധാനശ്രമം മുന്നോട്ടുകൊണ്ടുപോകുന്നതിനാണ് വെടിനിർത്തിയതെന്ന് ട്രംപ് പറഞ്ഞെങ്കിലും അഞ്ചുമാസത്തെ യുദ്ധം യു.എസിന്റെ ആയുധശേഖരത്തിലുണ്ടാക്കിയ കുറവാണ് അവരെ ആക്രമണത്തിൽനിന്ന് പിന്നാക്കംപോകാൻ പ്രേരിപ്പിച്ചതെന്നാണ് റിപ്പോർട്ടുകൾ.
ഈജിപ്ഷ്യൻ തുറമുഖത്ത് കപ്പലുകൾക്ക് ഡ്രോണേറ്റു
ഈജിപ്തിന്റെ മധ്യധരണ്യാഴി തീരത്തെ ഡമിയേറ്റ തുറമുഖത്ത് നങ്കൂരമിട്ട പ്രകൃതികവാതകം കയറ്റിയ രണ്ടുകപ്പലുകൾക്ക് ഡ്രോണേറ്റ് തീപ്പിടിത്തമുണ്ടായി. യു.എസ്., ഗ്രീക്ക് കപ്പലുകളാണ് ആക്രമിക്കപ്പെട്ടത്. ആരും ഉത്തരവാദിത്വമേറ്റെടുത്തിട്ടില്ല. പിന്നിൽ ഇറാനോ അവർ പിന്തുണയ്ക്കുന്ന സായുധസംഘങ്ങളോ ആകാമെന്നാണ് വിലയിരുത്തൽ. യു.എസിന്റെ പ്രധാന സഖ്യകക്ഷിയാണെങ്കിലും ഫെബ്രുവരി 28-ന് യുദ്ധമാരംഭിച്ചശേഷം ഇറാൻ ഇതുവരെ ഈജിപ്തിനെ ലക്ഷ്യമിട്ടിരുന്നില്ല.
Content Highlights: Renewed military escalation between US and Iran forces in 2026., Attacks targeted US bases in Jordan and maritime infrastructure in Egypt., US Central Command confirmed strikes on IRGC missile and radar facilities., Disputes over Hormuz Strait control remain a core driver of the conflict., Previous ceasefire efforts have been overshadowed by ongoing regional hostilities.