റഷ്യ-യുക്രൈൻ യുദ്ധം; പുതിനുമായി ചർച്ച നടക്കണം, പക്ഷെ…; വിഷമ വൃത്തത്തിൽ യൂറോപ്യൻ യൂണിയൻ

മോസ്‌കോ: യുക്രൈനിലെ യുദ്ധത്തെക്കുറിച്ച് റഷ്യൻ പ്രസിഡന്റ് വ്‌ളാദിമിർ പുതിനുമായി ഉന്നതതല ചർച്ചകൾക്ക് അനുയോജ്യമായ സാഹചര്യങ്ങളായിട്ടില്ലെന്ന് യൂറോപ്യൻ യൂണിയൻ. റഷ്യയുമായി വീണ്ടും ചർച്ചകൾ നടത്തണമെന്ന് ഫ്രാൻസും ഇറ്റലിയും അടുത്തിടെ അഭ്യർത്ഥിച്ചിരുന്നു. പുതിനുമായി ചർച്ചകൾ നടക്കേണ്ടതുണ്ടെങ്കിലും അദ്ദേഹത്തിന്റെ ഭാഗത്തുനിന്നും അനുകൂലമായ സൂചനകളൊന്നും ലഭിക്കുന്നില്ലെന്ന് യൂറോപ്യൻ യൂണിയൻ  വ്യക്തമാക്കി.

'ഏതെങ്കിലും ഒരു ഘട്ടത്തിൽ പ്രസിഡന്റ് പുതിനുമായി ചർച്ചകൾ ഉണ്ടാകേണ്ടതുണ്ട്. നിർഭാഗ്യവശാൽ, പുതിനിൽനിന്ന് ചർച്ച നടത്തുന്നതിനായുള്ള അനുകൂല സൂചനകളൊന്നും ലഭിക്കുന്നില്ല.' എഎഫ്പിക്ക് നൽകിയ അഭിമുഖത്തിൽ യൂറോപ്യൻ യൂണിയൻ വക്താവ് പൗല പിനോ പറഞ്ഞു.

'യുക്രൈനിൽ സമാധാനം കൊണ്ടുവരാൻ സഹായിക്കുന്ന ചില ചർച്ചകൾ ഏതെങ്കിലും ഘട്ടത്തിൽ ഉണ്ടാകുമെന്നാണ് ഞങ്ങൾ പ്രതീക്ഷിക്കുന്നത്. എന്നാൽ, ഇനിയും അവിടേക്ക് എത്തിയിട്ടില്ല.' അവർ കൂട്ടിച്ചേർത്തു. യൂറോപ്യൻ യൂണിയന് റഷ്യയുമായി ഉന്നതതല സംഭാഷണം പുനഃരാരംഭിക്കാനുള്ള 'സമയം വന്നെത്തിയിരിക്കുന്നു' എന്നും യുക്രൈനെക്കുറിച്ചുള്ള ചർച്ചകൾക്കായി ഒരു പ്രത്യേക പ്രതിനിധിയെ നിയമിക്കാമെന്നും ഇറ്റാലിയൻ പ്രധാനമന്ത്രി ജോർജിയ മെലോണി വെള്ളിയാഴ്ച പറഞ്ഞിരുന്നു.

റഷ്യയുമായി ബന്ധം സ്ഥാപിക്കുന്നതിനുള്ള വഴി വരുന്ന ആഴ്ചകളിൽ തന്നെ യൂറോപ്യൻ യൂണിയൻ കണ്ടെത്തണമെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഡിസംബറിൽ ആവശ്യപ്പെട്ടിരുന്നു. ട്രംപിന്റെ നേതൃത്വത്തിൽ യുദ്ധം അവസാനിപ്പിക്കാനുള്ള അമേരിക്കയുടെ ശ്രമങ്ങളിൽ യൂറോപ്പ് തങ്ങളുടെ സ്വാധീനം വർധിപ്പിക്കാൻ ശ്രമിക്കുന്നതിനിടയിലാണ് രണ്ട് യൂറോപ്യൻ നേതാക്കളിൽനിന്നുള്ള ഈ അഭ്യർത്ഥനകൾ വരുന്നത്.

പുതിനുമായി ട്രംപ് പലതവണ സംസാരിച്ചിട്ടുണ്ട്. അതുപോലെതന്നെ യുഎസ് പ്രതിനിധികൾ റഷ്യൻ പ്രതിനിധികളുമായും ചർച്ചകൾ നടത്തിയിട്ടുണ്ട്. അതേസമയം, അമേരിക്കയുമായി ചേർന്നുകൊണ്ടുതന്നെ, യുക്രൈന് കൂടുതൽ സ്വീകാര്യമായ പുതിയ സമാധാന നിർദ്ദേശം മുന്നോട്ടുവെക്കാനുള്ള ശ്രമത്തിലാണ് യൂറോപ്പും യുക്രൈനും.

യൂറോപ്യൻ യൂണിയൻ പുതിനുമായി നേരിട്ട് സംവദിക്കാൻ നടത്തുന്ന ഏതൊരു ശ്രമത്തിനും കിഴക്കൻ അതിർത്തിയിലെ രാജ്യങ്ങളിൽ നിന്നുള്ള എതിർപ്പ് നേരിടേണ്ടി വരുമെന്നാണ് പ്രതീക്ഷിക്കുന്നത്. റഷ്യയുമായി വീണ്ടും സഹകരിക്കുന്നതിൽ ഇപ്പോഴും ശക്തമായി വിമുഖത കാണിക്കുന്നവരാണ് ഇവർ.

Content Highlights: EU states conditions aren`t right for high-level talks with Putin on Ukraine war, despite calls from France and Italy for renewed dialogue. Learn more.