ഇൻഡൊനീഷ്യൻ കപ്പൽ അപകടം: ഒരാൾ മരിച്ചു, 102 പേരെ രക്ഷപ്പെടുത്തി; തിരച്ചിൽ തുടരുന്നു

ജക്കാർത്ത: ഇൻഡൊനീഷ്യയിൽ 241 പേരുമായി പോയ യാത്രാക്കപ്പൽ അപകടത്തിൽപെട്ട് ഒരാൾ മരിച്ചു. 102 പേരെ രക്ഷപ്പെടുത്തി. ഇൻഡൊനീഷ്യയിലെ കിഴക്കൻ ജാവയിലെ സുരബായയിൽനിന്ന് ദക്ഷിണ കലിമന്തൻ പ്രവിശ്യയിലെ ബൻജർമാസിനിലേക്ക് പോയ വിർഗോ ട്രാൻസ്‌പോർട്ട് 8 എന്ന കപ്പലുമായുള്ള ബന്ധം ജാവാ കടലിൽ നഷ്ടപ്പെട്ടതോടെയാണ് ഇൻഡൊനീഷ്യൻ അധികൃതർ കടലിൽ വ്യാപകമായ തിരച്ചിൽ ആരംഭിച്ചത്. ഇൻഡൊനീഷ്യൻ നാഷണൽ സെർച്ച് ആൻഡ് റെസ്‌ക്യൂ ഏജൻസിയുടെ നേതൃത്വത്തിൽ തിരച്ചിൽ തുടരുകയാണ്. അതേസമയം, കപ്പലിന് എന്താണ് സംഭവിച്ചതെന്ന കാര്യത്തിൽ ഇനിയും വ്യക്തതയില്ല. 

പ്രാദേശിക സമയം ശനിയാഴ്ച രാവിലെ 10:13-നാണ് കപ്പൽ സുരബായയിൽനിന്ന് യാത്ര തിരിച്ചത്. ഞായറാഴ്ച പുലർച്ചെ രണ്ടോടെയാണ് കപ്പലുമായുള്ള ബന്ധം നഷ്ടപ്പെട്ടതെന്ന് അധികൃതർ അറിയിച്ചു. കപ്പലിന്റെ സ്ഥാനം അവസാനമായി രേഖപ്പെടുത്തിയ സ്ഥലം കേന്ദ്രീകരിച്ചാണ് തിരച്ചിൽ പുരോഗമിക്കുന്നത്.

ബൻജർമാസിനിലെ തുറമുഖത്തുനിന്ന് ഏകദേശം 148 കിലോമീറ്റർ അകലെയാണ് അവസാനമായി കപ്പലിന്റെ സ്ഥാനം രേഖപ്പെടുത്തിയത്. കപ്പൽ മോശം കാലാവസ്ഥ നേരിട്ടതായി യാത്രയ്ക്കിടെ ഓപ്പറേറ്റർ അധികൃതരെ അറിയിച്ചിരുന്നു.  യാത്രക്കാരും ജീവനക്കാരും ഉൾപ്പെടെ 241 പേരാണ് കപ്പലിലുണ്ടായിരുന്നത്.

Content Highlights: An Indonesian passenger ship missing in the Java Sea with 241 people on board triggered a massive rescue operation. The vessel Virgo Transport 8 lost contact while traveling from Surabaya to Banjarmasin in bad weather.