LPSTA പ്രതിഷേധം: കേസെടുത്ത് പോലീസ്, വളർമതി ഒന്നാം പ്രതി, കണ്ടാലറിയാവുന്ന 50 പേർക്കെതിരെയും കേസ്
തിരുവനന്തപുരം: സെക്രട്ടറിയേറ്റിന് മുന്നിൽ സമരം നടത്തുന്ന എൽ.പി.എസ്.ടി. റാങ്ക് പട്ടികയിലുള്ള ഉദ്യോഗാർഥികൾക്കെതിരെ പോലീസ് കേസ് രജിസ്റ്റർ ചെയ്തു. സമരത്തിൽ തല മുണ്ഡനം ചെയ്ത് പ്രതിഷേധിച്ച വളർമതിയെ ഒന്നാം പ്രതിയാക്കിയാണ് പോലീസ് കേസെടുത്തത്. കണ്ടാലറിയാവുന്ന 50 പേർക്കെതിരെയും പോലീസ് കേസെടുത്തിട്ടുണ്ട്.
എന്നാൽ, നടത്താത്ത പ്രതിഷേധ പ്രകടനത്തിന്റെ പേരിലാണ് പോലീസ് തങ്ങൾക്കെതിരെ കേസെടുത്തിരിക്കുന്നതെന്ന് ഉദ്യോഗാർഥികൾ ആരോപിക്കുന്നു. സമരപ്പന്തലിൽ രാത്രി ഉറങ്ങിക്കിടന്ന ആളുകളെ വിളിച്ചുണർത്തി പേരും മേൽവിലാസവും ശേഖരിച്ച ശേഷമാണ് പോലീസിന്റെ ഈ നടപടി. ജനാധിപത്യപരമായും സമാധാനപരമായും സമരം ചെയ്തുവന്ന ഉദ്യോഗാർഥികളെ കേസിൽ കുടുക്കുന്ന നീക്കം നീതിനിഷേധമാണെന്ന് വളർമതി പറഞ്ഞു.
പ്രതിപക്ഷത്തിരിക്കുമ്പോൾ സമരങ്ങളെ പിന്തുണയ്ക്കുകയും ഭരണത്തിലെത്തുമ്പോൾ അടിച്ചമർത്താൻ ശ്രമിക്കുകയും ചെയ്യുന്ന ഇരട്ടത്താപ്പാണ് സർക്കാരിന്റേതെന്ന് ഉദ്യോഗാർഥികൾ കുറ്റപ്പെടുത്തി. വിവിധ ജില്ലകളിൽ നിന്നുള്ള ഉദ്യോഗാർഥികൾ തലസ്ഥാനത്തേക്ക് എത്തിയതോടെ സെക്രട്ടറിയേറ്റ് മാർച്ചും പ്രതിഷേധവും കൂടുതൽ ശക്തമായി മാറിയിരിക്കുകയാണ്.
അധ്യാപക-വിദ്യാർഥി അനുപാതം 1:25 ആക്കുക, 60 കുട്ടികൾക്ക് മുകളിലുള്ള സ്കൂളുകളിൽ ഹെഡ്മാസ്റ്റർമാർക്ക് സഹായിയായി എൽ.പി.എസ്.ടി നിയമനം നടത്തുക മുതലായവയാണ് ഉദ്യോഗാർഥികളുടെ പ്രധാന ആവശ്യങ്ങൾ. റാങ്ക് പട്ടികയിൽ ഉൾപ്പെട്ടതിൽ വളരെ കുറച്ച് ആളുകൾക്ക് മാത്രമാണ് നിലവിൽ നിയമനം ലഭിച്ചിട്ടുള്ളത്. എന്നാൽ അധ്യാപക-വിദ്യാർഥി അനുപാതത്തിൽ മാറ്റം വരുത്തുന്നത് എയ്ഡഡ് മേഖലയെ അടക്കം ബാധിക്കുന്ന കാര്യമായതിനാൽ ഉടൻ തീരുമാനമെടുക്കാൻ കഴിയില്ലെന്ന് മന്ത്രി നിയമസഭയിൽ വ്യക്തമാക്കിയിട്ടുണ്ട്. എങ്കിലും ഉന്നയിച്ച ആവശ്യങ്ങൾ പൂർണ്ണമായും അംഗീകരിക്കുന്നതുവരെ സമരം തുടരാനാണ് ഉദ്യോഗാർഥികളുടെ തീരുമാനം.