കേരള പുരസ്കാരങ്ങള് പ്രഖ്യാപിച്ചു; കേരള ജ്യോതി എം.കെ സാനുവിന്, സഞ്ജുവിന് കേരള ശ്രീ
തിരുവനന്തപുരം: പത്മ പുരസ്കാരങ്ങളുടെ മാതൃകയില്, സംസ്ഥാന സര്ക്കാര് നല്കുന്ന പരമോന്നത പുരസ്കാരമായ കേരള പുരസ്കാരങ്ങള് പ്രഖ്യാപിച്ചു. അധ്യാപകനും എഴുത്തുകാരനുമായ എം.കെ. സാനുവിനാണ് കേരള ജ്യോതി പുരസ്കാരം.
എസ്. സോമനാഥ് (സയന്സ് ആന്ഡ് എഞ്ചിനീയറിങ്), ഭുവനേശ്വരി (കൃഷി) എന്നിവര് കേരള പ്രഭ പുരസ്കാരത്തിനും കലാമണ്ഡലം വിമലാ മേനോന് (കല), ഡോ. ടി.കെ. ജയകുമാര് (ആരോഗ്യം), നാരായണ ഭട്ടതിരി (കലിഗ്രഫി), സഞ്ജു വിശ്വനാഥ് സാംസണ് (കായികം), ഷൈജ ബേബി ( സാമൂഹിക സേവനം, ആശാ വര്ക്കര്), വി.കെ. മാത്യൂസ് (വ്യവസായ- വാണിജ്യം) എന്നിവര് കേരള ശ്രീ പുരസ്കാരത്തിനും അര്ഹരായി.
വിവിധ മേഖലകളിലെ സമഗ്ര സംഭാവനകള് കണക്കിലെടുത്ത് ഒന്നാമത്തെ പരമോന്നത സംസ്ഥാന പുരസ്കാരമായ കേരള ജ്യോതി വര്ഷത്തില് ഒരാള്ക്കും രണ്ടാമത്തെ പരമോന്നത സംസ്ഥാന പുരസ്കാരമായ കേരള പ്രഭ വര്ഷത്തില് രണ്ടുപേര്ക്കും മൂന്നാമത്തെ പരമോന്നത സംസ്ഥാന പുരസ്കാരമായ കേരള ശ്രീ വര്ഷത്തില് അഞ്ചു പേര്ക്കുമാണു നല്കുന്നത്. ഓരോ വിഭാഗത്തിലും കൂടുതലായി പുരസ്കാരങ്ങള് അനുവദിക്കണമെങ്കില് ആകെ പുരസ്കാരങ്ങളുടെ എണ്ണം ഒരു വര്ഷത്തില് പത്തില് അധികരിക്കാന് പാടില്ലെന്ന് നിഷ്കര്ഷിച്ചിട്ടുണ്ട്.
പ്രാഥമിക പരിശോധനാ സമിതി (സെക്രട്ടറിതല സമിതി), ദ്വിതീയ പരിശോധനാ സമിതി, അവാര്ഡ് സമിതി എന്നിങ്ങനെ മൂന്നു തലങ്ങളിലായാണു പുരസ്കാര നിര്ണയം നടന്നത്. ദ്വിതീയ പരിശോധനാ സമിതി സമര്പ്പിച്ച ശുപാര്ശകള് അടൂര് ഗോപാലകൃഷ്ണന്, കെ. ജയകുമാര്, ഡോ. ബി. ഇക്ബാല് എന്നിവരടങ്ങുന്ന അവാര്ഡ് സമിതി പരിശോധിച്ചാണ് കേരള പുരസ്കാരങ്ങള്ക്കായി സര്ക്കാരിനു നാമനിര്ദേശം നല്കിയത്. ആകെ പുരസ്കാരങ്ങളുടെ എണ്ണം പത്തില് അധികരിക്കാന് പാടില്ല എന്ന നിബന്ധന അനുസരിച്ച് ഒന്പത് പുരസ്കാരങ്ങള്ക്കാണ് സമിതി ശുപാര്ശ സമര്പ്പിച്ചത്.
Content Highlights: Kerala Awards announced; M K Sanu honoured with Kerala Jyoti