പ്രകടനത്തിനിടെ നശിപ്പിച്ചു; സിപിഎമ്മിന്റെ ചെലവിൽത്തന്നെ മുഖ്യമന്ത്രിയുടെ ബോർഡ് പുനഃസ്ഥാപിച്ചു

മരട്(എറണാകുളം): മരടിൽ സി.പി.എം. പ്രവർത്തകർ നശിപ്പിച്ച മുഖ്യമന്ത്രി വി.ഡി. സതീശന്റെ ചിത്രമുള്ള ഫ്‌ലെക്‌സ് ബോർഡ് സി.പി.എമ്മിന്റെ ചെലവിൽത്തന്നെ പുനഃസ്ഥാപിച്ചു. മുഖ്യമന്ത്രി വി.ഡി. സതീശന് അഭിവാദ്യം അർപ്പിച്ച് മരട് കൊട്ടാരം ജങ്ഷനിൽ കോൺഗ്രസ് മണ്ഡലം കമ്മിറ്റി സ്ഥാപിച്ചിരുന്ന ഫ്‌ലെക്‌സ് ബോർഡാണ് സി.പി.എം. പ്രവർത്തകർ നശിപ്പിച്ചത്. പിണറായി വിജയന്റെ വീട്ടിലെ ഇ.ഡി. പരിശോധനയിൽ പ്രതിഷേധിച്ച് മേയ് 27-ന് സി.പി.എം. നടത്തിയ പ്രകടനത്തിനിടെയാണിത് നശിപ്പിച്ചത്.

കുറ്റക്കാർക്കെതിരേ നടപടി ആവശ്യപ്പെട്ട് കോൺഗ്രസ് പന്തംകൊളുത്തി പ്രകടനം നടത്തിയിരുന്നു. മരട് പോലീസിൽ പരാതിയും നൽകി. ലോക്കൽ സെക്രട്ടറി ഉൾപ്പെടെ 10 പേർക്കെതിരേ ജാമ്യമില്ലാ വകുപ്പ് ചുമത്തി മരട് പോലീസ് കേസെടുത്തതോടെ ഇവർ ഒളിവിൽ പോയി. പോലീസ് എടുത്ത വീഡിയോ തെളിവാക്കിയാണ് കേസെടുത്തത്. തുടർന്നു നടന്ന സമവായ ചർച്ചയിലെ ധാരണപ്രകാരമാണ് സി.പി.എമ്മിന്റെ ചെലവിൽ ബോർഡ് പുനഃസ്ഥാപിച്ചതെന്ന് കോൺഗ്രസ് മണ്ഡലം പ്രസിഡന്റ് ജിൻസൺ പീറ്റർ പറഞ്ഞു. സി.പി.എം. പ്രാദേശിക നേതാക്കൾ പണംനൽകി െഫ്‌ളക്‌സ് അടിപ്പിച്ച ശേഷം തൊഴിലാളികളെ നിയോഗിച്ച് പുനഃസ്ഥാപിക്കുകയാണ് ചെയ്തത്.

Content Highlights: CPM workers destroyed a flex board of VD Satheesan in Maradu., The incident occurred during a protest against ED raids on May 27., Maradu police filed non-bailable cases against 10 CPM members., The flex board was reinstated at the expense of the local CPM committee following consensus talks.