അമൃതം ന്യൂട്രിമിക്‌സിന്റെ ചേരുവകൾ മാറ്റും;പഞ്ചസാര ഒഴിവാക്കി രുചി കൂട്ടും
തിരുവനന്തപുരം: അങ്കണവാടികൾവഴി കുട്ടികൾക്ക് നൽകുന്ന അമൃതം ന്യൂട്രിമിക്‌സിന്റെ ചേരുവകൾ മാറ്റും. പഞ്ചസാര ഒഴിവാക്കി കുട്ടികൾ കഴിക്കാനിഷ്ടപ്പെടുംവിധം രുചി കൂട്ടും. ഇതിനായി കേന്ദ്രതോട്ടവിള ഗവേഷണകേന്ദ്രവുമായി വനിതാശിശുവികസനവകുപ്പ് ചർച്ച നടത്തി. ഒരേ രുചിയിലുള്ള പൊടി കുട്ടികൾ കഴിക്കുന്നില്ലെന്ന പരാതി വ്യാപകമായതോടെയാണിത്.
നിർമാണത്തിലും വിതരണത്തിലും കാലാനുസൃതമായ മാറ്റംവരുത്തണമെന്ന് സംസ്ഥാന ഭക്ഷ്യകമ്മിഷൻ നിർദേശിച്ചിരുന്നു. നിലവിൽ ആറുമാസംമുതൽ മൂന്നുവയസ്സുവരെയുള്ള എല്ലാവർക്കും ഒരേതരത്തിലുള്ള ന്യൂട്രിമിക്‌സ് ആണ് നൽകുന്നത്. ഇതിനുപകരം ആറുമാസംമുതൽ ഒരുവയസ്സുവരെ, ഒന്നുമുതൽ രണ്ടുവയസ്സുവരെ, രണ്ട് വയസ്സിനുമുകളിൽ എന്നിങ്ങനെ വ്യത്യസ്തതരത്തിൽ പോഷകാഹാരം നൽകണം. രണ്ടുമുതൽ മൂന്നുവയസ്സുവരെയുള്ള കുട്ടികൾക്കുള്ള ഉത്പന്നങ്ങളിൽ പഞ്ചസാര പൂർണമായും ഒഴിവാക്കി ശർക്കരപോലുള്ളവ ഉപയോഗിക്കണമെന്നും നിർദേശിക്കുന്നു.
ഗോതമ്പ്, കടലപ്പരിപ്പ്, നിലക്കടല, സോയ ചങ്ക്‌സ്, പഞ്ചസാര എന്നിവയടങ്ങിയ ന്യൂട്രിമിക്‌സ് 33,000-ത്തോളം അങ്കണവാടികൾവഴി നൽകുന്നുണ്ട്. കുടുംബശ്രീമിഷന്റെ നേതൃത്വത്തിൽ 241 കേന്ദ്രങ്ങൾവഴി വർഷം 18 കോടി കിലോഗ്രാമാണ് തയ്യാറാക്കുന്നത്.
എല്ലാ ജില്ലകളിലും പരിശോധനാ ലാബ് വേണം
എഫ്.സി.ഐ.യിൽനിന്നു ലഭിക്കുന്ന ഗോതമ്പിൽ മണ്ണും ഗോതമ്പുചെടിയുടെ അവശിഷ്ടങ്ങളും കണ്ടെത്തിയതായി പരാതിയുണ്ടായിരുന്നു. എഫ്.സി.ഐ. ഉദ്യോഗസ്ഥരുമായി ബന്ധപ്പെട്ട് ഗുണനിലവാരമുള്ള ഗോതമ്പ് ലഭ്യമാക്കാൻ നടപടി സ്വീകരിക്കണമെന്നും ഭക്ഷ്യകമ്മിഷൻ നിർദേശിച്ചു. എല്ലാ അങ്കണവാടികളിലും നിർമാണയൂണിറ്റുകളിലും ശുചിത്വം ഉറപ്പാക്കാനും പരിശോധന നടത്താനും ജീവനക്കാരെ ചുമതലപ്പെടുത്തണം. ഗുണനിലവാരപരിശോധനയ്ക്ക് ഇപ്പോൾ കോഴിക്കോട് മാത്രമാണ് കേന്ദ്രമുള്ളത്. എല്ലാ ജില്ലകളിലും ലാബ് ഏർപ്പെടുത്തിയാൽ വിതരണത്തിനുമുൻപുള്ള മൈക്രോ ടെസ്റ്റ് കാലതാമസമില്ലാതെ പൂർത്തിയാക്കാൻ കഴിയുമെന്ന് കമ്മിഷൻ ചെയർമാൻ ജിനു സക്കറിയ ഉമ്മൻ പറഞ്ഞു.
Content Highlights: Amrutham Nutrimix ingredients and taste are being revamped for better acceptance by children., Sugar will be replaced with healthier alternatives like jaggery for children above two years., Nutritional supplements will be categorized into different age groups from 6 months to 3 years., The Women and Child Development Department discussed the changes with the Central Plantation Crops Research Institute.