ബംഗാളിൽ ഗുണ്ടാനിയമം പാസാക്കി സുവേന്ദു അധികാരി സർക്കാർ; വിചാരണകൂടാതെ ഒരു വർഷംവരെ തടവിലിടാം

കൊൽക്കത്ത: പശ്ചിമ ബംഗാളിൽ 'ഗുണ്ടാ നിയമം' പാസാക്കി സുവേന്ദു അധികാരി സർക്കാർ. സംഘടിത കുറ്റകൃത്യങ്ങളും അക്രമങ്ങളും കർശനമായി അടിച്ചമർത്താൻ ലക്ഷ്യമിട്ടുള്ള ‘വെസ്റ്റ് ബംഗാൾ പബ്ലിക് സേഫ്റ്റി ആന്റ് കൺട്രോൾ ഓഫ് ആന്റി സോഷ്യൽ ആക്ടിവിറ്റീസ് ബിൽ -2026’ ആണ് തിങ്കളാഴ്ച നിയമസഭ പാസാക്കിയത്. 176 അംഗങ്ങൾ ബില്ലിനെ അനുകൂലിക്കുകയും 41 പേർ എതിർത്തും വോട്ട് ചെയ്തു.

പൊതുജന സുരക്ഷയ്ക്ക് ഭീഷണിയെന്ന് കണ്ടെത്തുന്ന ഏതൊരാളേയും ഒരു വർഷംവരെ വിചാരണ കൂടാതെ കരുതൽ തടങ്കലിൽ വെക്കാൻ ഈ നിയമം ഭരണകൂടത്തിന് അനുമതി നൽകുന്നു. ജില്ലാ മജിസ്ട്രേറ്റുമാർക്കും പോലീസ് കമ്മിഷണർമാക്കും ഇതിനുള്ള ഉത്തരവ് പുറപ്പെടുവിക്കാം.

പൊതു-സ്വകാര്യ സ്വത്തുക്കൾ നശിപ്പിക്കുന്ന കുറ്റവാളികളുടെ സ്വത്തുക്കൾ കണ്ടുകെട്ടാനും ഇവരിൽനിന്ന് നഷ്ടപരിഹാരം ഈടാക്കാനും നിയമത്തിൽ വ്യവസ്ഥയുണ്ട്.

കുറ്റകൃത്യങ്ങളുടെ വ്യാപ്തി വർധിപ്പിച്ചുകൊണ്ട് കള്ളക്കടത്ത് അനധികൃത മണൽ ഖനനം, വന്യജീവി-വനം കൊള്ള എന്നിവയും സാമൂഹിക വിരുദ്ധ പ്രവർത്തനങ്ങളുടെ പരിധിയിൽ ഉൾപ്പെടുത്തിയിട്ടുണ്ട്. ഇത്തരത്തിൽ കുറ്റകൃത്യത്തിൽ ഏർപ്പെടുന്നയാളെ ജില്ലാ മജിസ്ട്രേറ്റിനോ പോലീസ് കമ്മിഷണർക്കോ ജില്ലയിൽനിന്ന് ഒരു വർഷത്തേക്ക് പുറത്താക്കാനും അധികാരമുണ്ട്.

Content Highlights: Introduction of the West Bengal Public Safety and Control of Anti-Social Activities Bill 2026., Authority for District Magistrates and Police Commissioners to enforce up to one-year preventive detention., Strict measures against property destruction, smuggling, illegal sand mining, and wildlife poaching., Provisions for property seizure and compensation recovery from offenders., Legal power to extern individuals from districts for up to one year.