മായം കണ്ടെത്താൻ 'ഇ-ടങ്', 'ഇ-നോസ്'; തിരുപ്പതി ലഡുവിന്റെ പരിശുദ്ധി ഉറപ്പാക്കാൻ ഫ്രഞ്ച് സാങ്കേതികവിദ്യ

അമരാവതി: തിരുമലയിലെ പ്രസാദത്തിന്റെയും ഭക്തർക്ക് നൽകുന്ന ഭക്ഷണത്തിന്റെയും ഗുണനിലവാരവും സുരക്ഷിതത്വവും ഉറപ്പുവരുത്തുന്നതിനായി ആന്ധ്രാപ്രദേശ് സർക്കാർ അത്യാധുനിക ഫുഡ് ലാബ് സ്ഥാപിക്കുന്നു. ഏകദേശം 25 കോടി രൂപ ചെലവിൽ നിർമ്മിക്കുന്ന ഈ ലാബിൽ പ്രസാദ നിർമ്മാണത്തിന് ഉപയോഗിക്കുന്ന നെയ്യ്, കശുവണ്ടി, ഉണക്കമുന്തിരി, ബദാം, പഞ്ചസാര, ഏലക്ക, മഞ്ഞൾ തുടങ്ങി 60 ഓളം അസംസ്‌കൃത വസ്തുക്കൾ ശാസ്ത്രീയമായി പരിശോധിക്കും. നെയ്യിന്റെ ഗുണനിലവാരത്തിലുണ്ടാകുന്ന നേരിയ മാറ്റങ്ങൾ പോലും തിരിച്ചറിയുന്നതിനായി ഫ്രാൻസിൽ നിന്ന് 3.5 കോടി രൂപ വിലമതിക്കുന്ന 'ഇ-ടങ്', 'ഇ-നോസ്' എന്നീ അത്യാധുനിക യന്ത്രങ്ങൾ എത്തിക്കുന്നു എന്നതാണ് ഈ ലാബിന്റെ പ്രധാന സവിശേഷത.

ലാബിന്റെ നിർമ്മാണ പ്രവർത്തനങ്ങൾ നിലവിൽ 90 ശതമാനവും പൂർത്തിയായിക്കഴിഞ്ഞു, അടുത്ത മാസത്തോടെ പ്രവർത്തനം ആരംഭിക്കാനാണ് സർക്കാർ ലക്ഷ്യമിടുന്നത്. കേന്ദ്ര ഭക്ഷ്യസുരക്ഷാ അതോറിറ്റിയായ എഫ്എസ്എസ്എഐയുമായി 2024 ഒക്ടോബറിൽ ഒപ്പിട്ട കരാർ പ്രകാരം 23 കോടി രൂപയാണ് ഈ പദ്ധതിക്കായി അനുവദിച്ചിരിക്കുന്നത്. തിരുമലയിലെ പുതുക്കിപ്പണിത 12,000 ചതുരശ്ര അടി വിസ്തീർണ്ണമുള്ള കെട്ടിടത്തിലാണ് ഈ സംവിധാനം ഒരുങ്ങുന്നത്. ലാബിലേക്കുള്ള ഉപകരണങ്ങളുടെ ഇൻസ്റ്റാളേഷൻ മെയ് മാസത്തോടെ പൂർത്തിയാകുമെന്നാണ് പ്രതീക്ഷിക്കുന്നത്.

മൈക്രോബയോളജി, കെമിസ്ട്രി, സെൻസറി അനാലിസിസ് എന്നീ വിഭാഗങ്ങളിലായി 50-ഓളം ഉപകരണങ്ങളാണ് ലാബിൽ സജ്ജീകരിക്കുന്നത്. ഭക്ഷണത്തിലെയും വെള്ളത്തിലെയും 200-ലധികം കീടനാശിനികൾ, ഘനലോഹങ്ങൾ, ആന്റിബയോട്ടിക്കുകളുടെ സാന്നിധ്യം എന്നിവ കണ്ടെത്താൻ ഈ സംവിധാനത്തിലൂടെ സാധിക്കും. ആരോഗ്യവകുപ്പിൽ നിന്നും തിരുമല തിരുപ്പതി ദേവസ്ഥാനത്തുനിന്നുമായി തിരഞ്ഞെടുക്കപ്പെട്ട 40 ജീവനക്കാരാണ് ലാബിന്റെ പ്രവർത്തനങ്ങൾ നിയന്ത്രിക്കുക.

പ്രസാദത്തിൽ ചേർക്കുന്ന നെയ്യിന്റെ ഗുണനിലവാരം സംബന്ധിച്ച് മുഖ്യമന്ത്രി ചന്ദ്രബാബു നായിഡു വിമർശനം ഉന്നയിച്ചതോടെ സുപ്രീം കോടതിയുടെ മേൽനോട്ടത്തിൽ സിബിഐയുടെ നേതൃത്വത്തിലുള്ള പ്രത്യേക അന്വേഷണ സംഘം ഈ അഴിമതിയിൽ അന്വേഷണം ആരംഭിച്ചിരുന്നു. 2019 നും 2024 നും ഇടയിൽ തിരുപ്പതിയിൽ ഏകദേശം 250 കോടി രൂപയുടെ മായം കലർന്ന നെയ്യ് ഉപയോഗിച്ചതായി എസ്ഐടി റിപ്പോർട്ടിൽ ചൂണ്ടിക്കാട്ടുന്നു. ഈ സാഹചര്യത്തിൽ പുതിയ ലാബ് പ്രവർത്തനസജ്ജമാകുന്നതോടെ പ്രസാദത്തിന്റെ ഗുണനിലവാരത്തിൽ ഭക്തർക്കുള്ള വിശ്വാസം വീണ്ടെടുക്കാൻ സാധിക്കുമെന്നാണ് സർക്കാർ കരുതുന്നത്.

Content Highlights: Andhra Pradesh launches advanced food lab at Tirumala for prasadam & devotee food quality testing.