സ്വയംപ്രഖ്യാപിത ആള്ദൈവം നിത്യാനന്ദ ജീവത്യാഗംചെയ്തെന്ന് ബന്ധുവിന്റെ വെളിപ്പെടുത്തല്
ചെന്നൈ: സ്വയംപ്രഖ്യാപിത ആള്ദൈവം നിത്യാനന്ദ മരിച്ചെന്ന് അഭ്യൂഹം. സനാതനധര്മം സ്ഥാപിക്കുന്നതിനുവേണ്ടി പോരാടിയ സ്വാമി ജീവത്യാഗംചെയ്തെന്ന് നിത്യാനന്ദയുടെ സഹോദരിയുടെ മകനും അനുയായികൂടിയായ സുന്ദരേശ്വരനും അറിയിച്ചു. നിത്യാനന്ദയുടെ അനുയായികളുമായി നടത്തിയ വീഡിയോ കോണ്ഫറന്സിങ്ങിലാണ് ഇക്കാര്യം അറിയിച്ചത്.
2010-ല് സിനിമാനടിക്കൊപ്പമുള്ള വീഡിയോ പുറത്തുവന്നതുമുതല് വിവാദങ്ങളില് നിറഞ്ഞുനിന്ന നിത്യാനന്ദ 2019-ല് ഇന്ത്യ വിട്ടു. തങ്ങളുടെ മൂന്നുമക്കളെ തട്ടിക്കൊണ്ടുപോയതായി തമിഴ് ദമ്പതിമാര് നല്കിയ പരാതിയില് ഗുജറാത്ത് പോലീസ് അറസ്റ്റിന് നടപടിയാരംഭിച്ചതിനെത്തുടര്ന്നായിരുന്നു രാജ്യംവിട്ടത്.
എക്വഡോറിനുസമീപം ഒരു ദീപില് അനുയായികള്ക്കൊപ്പം കഴിയുന്നെന്നായിരുന്നു വിവരം. പിന്നീട് പലതവണ ഓണ്ലൈന് മുഖേന ആത്മീയപ്രഭാഷണങ്ങള് നടത്തിയിരുന്നു. കൈലാസ എന്നപേരില് രാജ്യം സ്ഥാപിച്ചെന്നും അവകാശപ്പെട്ടു.
നിത്യാനന്ദ മരിച്ചെന്ന് 2022-ല് അഭ്യൂഹം പ്രചരിച്ചിരുന്നെങ്കിലും ആരോഗ്യപ്രശ്നങ്ങള് നേരിടുന്ന താന് ഡോക്ടര്മാരുടെ നിരീക്ഷണത്തിലാണെന്നറിയിച്ച് ഓണ്ലൈനില് പ്രത്യക്ഷപ്പെട്ടു. എന്നാല്, കഴിഞ്ഞകുറച്ചുകാലമായി വീഡിയോ പ്രഭാഷണങ്ങള് പുറത്തുവരുന്നില്ലായിരുന്നു.
Content Highlights: Rumors spread about self-proclaimed godman Nithyananda`s death.