ഷാ സഭയിൽ സംസാരിച്ചാൽ പ്രതിപക്ഷത്തിന് താങ്ങാനാകില്ലെന്ന് റിജിജു;രാജ്യസഭാധ്യക്ഷന്റേത് നിരീക്ഷണംമാത്രം

ന്യൂഡൽഹി: ആഭ്യന്തരമന്ത്രി സഭയിൽനിന്ന് തുടർച്ചയായി വിട്ടുനിൽക്കുന്നതിലുള്ള പ്രതിപക്ഷ വികാരം അമിത് ഷായെ അറിയിക്കണമെന്ന് വ്യാഴാഴ്ച പാർലമെന്ററികാര്യ മന്ത്രി കിരൺ റിജിജുവിന് രാജ്യസഭാധ്യക്ഷൻ സി.പി. രാധാകൃഷ്ണൻ നിർദേശം നൽകിയെങ്കിലും വെള്ളിയാഴ്ചയും ഷാ എത്തിയില്ല. രാജ്യസഭാധ്യക്ഷൻ നൽകിയത് നിർദേശമല്ലെന്നും അദ്ദേഹത്തിന്റെ നിരീക്ഷണമായിരുന്നുവെന്നും റിജിജു അവകാശപ്പെട്ടു.

അമിത് ഷായെ ശക്തമായി ന്യായീകരിച്ചാണ് ഇരുസഭകളിലും റിജിജു രംഗത്തുവന്നത്. സഭ സുഗമമായി പ്രവർത്തിക്കുമ്പോൾ ഷാ സഭയിൽ എത്തുമെന്നും ആഭ്യന്തരമന്ത്രി സംസാരിച്ചാൽ വാക്കുകൾ പ്രതിപക്ഷത്തിന് താങ്ങാനാകില്ലെന്നും അദ്ദേഹം പറഞ്ഞു. ആഭ്യന്തരമന്ത്രിയെ ഇത്ര ശക്തമായി ന്യായീകരിച്ച് സർക്കാർ രംഗത്തെത്തുന്നത് ആദ്യമായാണ്. ഷാ വരുംദിവസങ്ങളിൽ സഭയിൽ എത്തുമെന്ന സൂചനയും റിജിജു നൽകി.

എഫ്.സി.ആർ.എ. ബിൽ ചർച്ചയ്‌ക്കെടുക്കുന്ന 12-ന് അമിത് ഷാ എത്താനാണ് സാധ്യത. വെള്ളിയാഴ്ച ലോക്സഭാ സ്പീക്കർ ഓം ബിർളയുമായി ഷാ കൂടിക്കാഴ്ച നടത്തിയിരുന്നു.

ആഭ്യന്തരമന്ത്രിയുടെ തുടർച്ചയായ അഭാവത്തിനെതിരേയുള്ള പ്രതിപക്ഷ പ്രതിഷേധത്തിൽ വെള്ളിയാഴ്ചയും ഇരുസഭകളും തടസ്സപ്പെട്ടു. രാജ്യസഭ ചേർന്നപ്പോൾത്തന്നെ പ്രതിഷേധം ആരംഭിച്ചു. പ്രതിപക്ഷത്തിന്റെ വികാരം ആഭ്യന്തരമന്ത്രിയെ അറിയിക്കണമെന്ന് സഭാ അധ്യക്ഷൻ നിർദേശിച്ചിട്ടും ആ വാക്കുകൾക്ക് സർക്കാർ വിലകല്പിക്കുന്നില്ലെന്ന് മല്ലികാർജുൻ ഖാർഗെ കുറ്റപ്പെടുത്തി.

എന്നാൽ, അധ്യക്ഷൻ യാതൊരു നിർദേശവും നൽകിയിട്ടില്ലെന്നും പ്രതിപക്ഷം സഭയെ തെറ്റിദ്ധരിപ്പിക്കുകയാണെന്നും റിജിജു പറഞ്ഞു. അധ്യക്ഷൻ ഒരു നിരീക്ഷണം നടത്തുകയായിരുന്നു. നിർദേശങ്ങളൊന്നും നൽകിയിട്ടില്ല. -റിജിജു പറഞ്ഞു. ഇതെല്ലാം അദ്ദേഹം ലോക്സഭയിലും ആവർത്തിച്ചു.

പ്രതിഷേധം തുടർന്നതോടെ രാജ്യസഭ 12 വരെ നിർത്തിവെച്ചു. പിന്നീട് ചോദ്യോത്തരവേള ആരംഭിച്ചപ്പോൾ അയോധ്യ സംഭാവനക്കൊള്ള വിഷയം ഉന്നയിച്ച് പ്രതിപക്ഷം പ്രതിഷേധിച്ചു. ഇതിനെതിരേ മുദ്രാവാക്യങ്ങളുമായി ബി.ജെ.പി. അംഗങ്ങളുമെത്തി. ഇരുപക്ഷവും പോർവിളി തുടർന്നതോടെ സഭ പിരിയുന്നതായി അധ്യക്ഷൻ പ്രഖ്യാപിച്ചു.

Content Highlights: Kiren Rijiju defends Home Minister Amit Shah's absence in Parliament., Opposition parties continue to protest demanding Shah's presence., Rajya Sabha adjourned until the 12th amid ongoing disruptions., Amit Shah expected to attend the FCRA bill discussion on the 12th.