റോക്കട്രി: ദ നമ്പി എഫക്റ്റ് ആമസോണ്‍ പ്രൈമില്‍, ഓ.ടി.ടി റിലീസ് പ്രഖ്യാപിച്ചു
മുംബൈ: ഐ.എസ്.ആര്‍.ഓ മുന്‍ ശാസ്ത്രജ്ഞന്‍ നമ്പി നാരായണന്റെ ജീവിതകഥ പറയുന്ന റോക്കട്രി: ദി നമ്പി എഫക്റ്റ് എന്ന ചിത്രത്തിന്റെ എക്സ്‌ക്ലൂസീവ് സ്ട്രീമിംഗ് പ്രീമിയര്‍ പ്രഖ്യാപിച്ചു. ഇന്ത്യയിലെയും 240 രാജ്യങ്ങളിലെയും പ്രദേശങ്ങളിലെ പ്രൈം അംഗങ്ങള്‍ക്ക് 2022 ജൂലൈ 26 മുതല്‍ തെലുങ്ക്, മലയാളം, കന്നഡ ഭാഷകളിലെ ഡബ്ബുകള്‍ക്കൊപ്പം തമിഴിലും ചിത്രം ആസ്വദിക്കാം. ട്രൈ കളര്‍ ഫിലിംസും വര്‍ഗീസ് മൂലന്‍ പിക്ചേഴ്സും നിര്‍മ്മിച്ച ചിത്രത്തില്‍ ആര്‍. മാധവനാണ് നായകനായി എത്തിയത്.
ചിത്രം സംവിധാനം ചെയ്തതും മാധവന്‍ തന്നെയാണ്. സിമ്രാന്‍, രഞ്ജിത് കപൂര്‍ എന്നിവരും പ്രധാനവേഷത്തിലുണ്ടായിരുന്നു. ചിത്രത്തിന്റെ തമിഴ്, മലയാളം പതിപ്പുകളില്‍ സൂര്യയും ഹിന്ദി പതിപ്പില്‍ ഷാരൂഖ് ഖാനും അതിഥി വേഷത്തിലെത്തിയിരുന്നു. ''ഈ കഥയ്ക്ക് ജീവന്‍ പകരാന്‍ കഴിഞ്ഞത് അവിശ്വസനീയമായ ബഹുമതിയാണ്'' എന്ന് ആര്‍. മാധവന്‍ പറഞ്ഞു. ''സിനിമയ്ക്ക് ഇതിനകം ലഭിച്ചിട്ടുള്ള എല്ലാ സ്‌നേഹത്തിനും ഞാന്‍ കടപ്പെട്ടിരിക്കുന്നു. സ്ട്രീമിംഗിനൊപ്പം ഞങ്ങളുടെ സിനിമയ്ക്ക് അടുത്തതായി എന്ത് നാഴികക്കല്ലുകളാണ് താണ്ടേണ്ടത് എന്ന് കാണാന്‍ ഞാന്‍ വളരെ ആവേശത്തിലാണ്. ഈ വേഷം അവതരിപ്പിക്കുന്നതും നമ്പി സാറിന്റെ ഈ അവിശ്വസനീയമായ കഥയ്ക്ക് നേതൃത്വം നല്‍കുന്നതും വളരെ നിര്‍ണായകമായിരുന്നു, കൂടാതെ ആമസോണ്‍ പ്രൈം വീഡിയോയിലൂടെ പ്രചോദിപ്പിക്കാനും പ്രബുദ്ധമാക്കാനും രസിപ്പിക്കാനും ഞങ്ങള്‍ക്ക് കൂടുതല്‍ വീടുകളിലേക്ക് എത്താന്‍ കഴിയുമെന്നതില്‍ എനിക്ക് സന്തോഷമുണ്ട്.'' അദ്ദേഹം കൂട്ടിച്ചേര്‍ത്തു.
നമ്പി നാരായണന്റെ നേട്ടങ്ങള്‍, രാജ്യത്തിന്റെ ബഹിരാകാശ ദൗത്യത്തോടുള്ള അദ്ദേഹത്തിന്റെ അഭിനിവേശം, സമാനതകളില്ലാത്ത സമര്‍പ്പണം, ആത്യന്തികമായി അദ്ദേഹത്തിന്റെ ജീവിതത്തിലെ വ്യക്തിപരവും ഔദ്യോഗികവുമായ തിരിച്ചടിയായി മാറിയ ഏറ്റവും വലിയ ആക്ഷേപം എന്നിവ ഈ സിനിമ വിവരിക്കുന്നു.
Content Highlights: Rocketry the Nambi Effect OTT Release, Rocketry Movie in Amazon Prime, R Madhavan, Nambi Narayanan