'കൊഞ്ചം ഹെല്പ്പ് പണ്ണുങ്കോ'; 'തലവര'യുടെ സക്സസ് ടീസര് പുറത്ത്, ചിത്രം വിജയകരമായ രണ്ടാം വാരത്തില്
ഷെബിന് ബക്കറും മഹേഷ് നാരായണനും ചേര്ന്ന് നിര്മിച്ച് അഖില് അനില്കുമാറിന്റെ സംവിധാനത്തില് പുറത്തിറങ്ങിയിരിക്കുന്ന അര്ജുന് അശോകന് ചിത്രം 'തലവര' തീയേറ്ററുകള്തോറും മികച്ച അഭിപ്രായം നേടിക്കൊണ്ട് രണ്ടാംവാരം മുന്നേറുമ്പോള് സിനിമയുടെ സക്സസ് ടീസര് പുറത്തിറക്കി അണിയറ പ്രവര്ത്തകര്. പ്രായഭേദമന്യേ പ്രേക്ഷകരില്നിന്ന് നല്ല പ്രതികരണങ്ങളാണ് ചിത്രത്തിന് റിലീസ് ദിനം മുതല് ലഭിച്ചുകൊണ്ടിരിക്കുന്നത്. അര്ജുന് അശോകന്റെ കരിയറില് തന്നെ ഏറെ ചര്ച്ചയായിരിക്കുന്ന വേഷമായിരിക്കുകയാണ് 'തലവര'യിലെ ജ്യോതിഷ് എന്നാണ് പ്രേക്ഷകാഭിപ്രായം. ചിത്രത്തിലെ നായകനും നായികയുമായുള്ള രസകരമായ സംഭാഷണങ്ങളാണ് ടീസറിലുള്ളത്.
പാലക്കാടിന്റെ പശ്ചാത്തലത്തില് തീയേറ്ററുകളില് എത്തിയിരിക്കുന്ന ചിത്രത്തില് വിറ്റിലിഗോ അവസ്ഥയുള്ളൊരു യുവാവിന്റെ ജീവിതവും പ്രണയവും സംഘര്ഷങ്ങളുമൊക്കെയാണ് അവതരിപ്പിച്ചിരിക്കുന്നത്. മലയാളത്തിലെ ഒട്ടേറെ ഹിറ്റ് സിനിമകളുടെ അമരക്കാരായ മഹേഷ് നാരായണനും ഷെബിന് ബക്കറും ചേര്ന്ന് നിര്മിച്ചിരിക്കുന്ന 'തലവര' അഖില് അനില്കുമാറാണ് സംവിധാനംചെയ്തിരിക്കുന്നത്. തികഞ്ഞ കൈയടക്കത്തോടെ ഉള്ളില് തട്ടും വിധമാണ് ചിത്രം അണിയിച്ചൊരുക്കിയിരിക്കുന്നത് എന്നാണ് തീയേറ്ററില്നിന്ന് ലഭിക്കുന്ന റിപ്പോര്ട്ടുകള്. ചിത്രത്തില് 'പാണ്ട' എന്ന കഥാപാത്രമായി അര്ജുന് അശോകനെത്തിയപ്പോള് സന്ധ്യ എന്ന നായിക കഥാപാത്രമായാണ് രേവതി ശര്മ എത്തിയിരിക്കുന്നത്.
അശോകന്, ഷൈജു ശ്രീധര്, അശ്വത് ലാല്, പ്രശാന്ത് മുരളി, അഭിറാം രാധാകൃഷ്ണന്, ദേവദര്ശിനി, അമിത് മോഹന് രാജേശ്വരി, സാം മോഹന്, മനോജ് മോസസ്, സോഹന് സീനുലാല്, മുഹമ്മദ് റാഫി, വിഷ്ണു രെഘു, ശരത് സഭ, ഷെബിന് ബെന്സണ്, ആതിര മറിയം, വിഷ്ണുദാസ്, ഹരീഷ് കുമാര്, സുമ തുടങ്ങി നിരവധി താരങ്ങളാണ് ചിത്രത്തില് ഒരുമിച്ചിരിക്കുന്നത്. അഖില് അനില്കുമാറും അപ്പു അസ്ലമും ചേര്ന്നാണ് തിരക്കഥ. മനോഹരമായ ദൃശ്യങ്ങള് ഒരുക്കിയിരിക്കുന്നത് അനിരുദ്ധ് അനീഷും എഡിറ്റിംഗ് രാഹുല് രാധാകൃഷ്ണനും ഹൃദ്യമായ പാട്ടുകള് ഒരുക്കിയിട്ടുള്ളത് ഇലക്ട്രോണിക് കിളിയുമാണ്. പിആര്ഒ: ആതിര ദില്ജിത്ത്.
Content Highlights: Thalavara movie success teaser