തീ പടർത്തി നോളന്റെ ’അണുബോംബ്’; ഭയപ്പെടുത്തുന്ന ചരിത്രവുമായി ’ഓപ്പൺഹൈമർ’ ട്രെയിലർ

ലോകത്ത് ഏറ്റവുമധികം ആരാധകരുള്ള സംവിധായകരിൽ ഒരാളായ ക്രിസ്റ്റഫർ നോളന്റെ പുതിയ ചിത്രം ’ഓപ്പൺഹൈമറു’ടെ ട്രെയിലർ റിലീസായി. പ്രഖ്യാപനം മുതൽക്കേ സിനിമാ ലോകം ഏറ്റവുമധികം പ്രതീക്ഷ പുലർത്തുന്ന പ്രൊജക്ടുകളിൽ ഒന്നാണ് ‘അണുബോംബിന്റെ പിതാവെ’ന്നറിയപ്പെടുന്ന അമേരിക്കൻ ശാസ്ത്രജ്ഞൻ ജെ. റോബർട്ട് ഓപ്പൺഹൈമറുടെ ജീവിതം പറയുന്ന ഈ ചിത്രം. 2020-ൽ‍ പുറത്തിറങ്ങിയ ടെനെറ്റിനു ശേഷം നോളൻ ഒരുക്കുന്ന ചിത്രം കൂടിയാണ് ’ഓപ്പൺഹൈമർ’.

2005-ലെ പുലിറ്റ്‌സർ സമ്മാനത്തിന് അർഹമായ ‘അമേരിക്കൻ പ്രൊമിത്യൂസ്: ദി ട്രയംഫ് ആൻഡ് ട്രാജഡി ഓഫ് ജെ. റോബർട്ട് ഓപ്പൺഹൈമർ’ എന്ന പുസ്തകത്തെ ആധാരമാക്കിയാണ് ചിത്രം ഒരുക്കുന്നത്. രണ്ടാം ലോകയുദ്ധവും അണുബോംബ് കണ്ടുപിടിച്ചതുമാണ് ചിത്രത്തിന്റെ കഥാപശ്ചാത്തലം.

കിലിയൻ മർഫിയാണ് ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നത്. എമിലി ബ്ലണ്ട്, റോബർട്ട് ഡൗണി ജൂനിയർ, മാറ്റ് ഡാമൺ, ഫ്ലോറൻസ് പഗ്, റാമി മാലെക്ക് തുടങ്ങിയവരും ചിത്രത്തിലുണ്ട്.

വി.എഫ്.എക്സിന്റെ ഉപയോഗം പരമാവധി കുറച്ച്കൊണ്ട് സ്ഫോടനങ്ങൾ ഉൾപ്പടെ യാഥാർഥ്യത്തോടെ അവതരിപ്പിക്കാറുള്ള ക്രിസ്റ്റഫർ നോളന്റെ മറ്റൊരു മാജിക് ആയിരിക്കും ചിത്രമെന്നാണ് മൂന്ന് മിനിറ്റ് ദെെർഘ്യമുള്ള ട്രെയിലർ നൽകുന്ന സൂചന. ഹൊയ്തി വാൻ ഹൊയ്ടെമയാണ് ചിത്രത്തിന്റെ ക്യാമറ കെെകാര്യം ചെയ്തിരിക്കുന്നത്. 2023 ജൂലെെ 21-ന് ചിത്രം തിയേറ്ററുകളിലെത്തും. 

Content Highlights: Christopher Nolan Oppenheimer trailer Cillian Murphy Emily Blunt Matt Damon Robert Downey Jr atomic