'യുവതി മരിച്ചത് അറിഞ്ഞിട്ടും എന്തിന് തിയേറ്ററിൽ തുടർന്നു'; അല്ലു അർജുനോട് പോലീസ് ചോദിച്ചത്
ഹൈദരാബാദ്: പുഷ്പ 2 പ്രീമിയര് പ്രദര്ശനത്തിനിടെ തിക്കിലും തിരക്കിലും പെട്ട് യുവതി മരിച്ച സംഭവത്തില് തെലുങ്ക് താരം അല്ലു അര്ജുനെ ചോദ്യം ചെയ്ത് ഹൈദരാബാദ് പൊലീസ്. രാവിലെ പതിനൊന്ന് മണിയോടെ ഹൈദരാബാദിലെ ചിക്കഡ്പള്ളി പോലീസ് സ്റ്റേഷനിലാണ് താരം ചോദ്യം ചെയ്യലിനെത്തിയത്. ഡിസിപിയും എസിപിയും നേതൃത്വം നല്കുന്ന സംഘമാണ് ചോദ്യം ചെയ്തത്.ചോദ്യങ്ങള്ക്കൊന്നും അല്ലു അര്ജുന് കൃത്യമായ മറുപടി നല്കിയില്ലെന്നാണ് പോലീസ് വൃത്തങ്ങള് പറയുന്നത്. അതേസമയം പ്രധാനപ്പെട്ട എല്ലാ ചോദ്യങ്ങൾക്കും അല്ലു അർജുൻ വ്യക്തമായ ഉത്തരങ്ങൾ നൽകിയിട്ടുണ്ടെന്ന് നടന്റെ അഭിഭാഷക സംഘം പറയുന്നു
നേരത്തേ പൊലീസ് സംഘം പുറത്തുവിട്ട, സന്ധ്യ തിയറ്ററില് നിന്നുള്ള 10 മിനിറ്റ് വീഡിയോയും ചോദ്യംചെയ്യലിനിടെ അല്ലു അര്ജുന് മുന്നില് പ്രദര്ശിപ്പിച്ചു. അനുമതി നിഷേധിച്ചിട്ടും റോഡ് ഷോയ്ക്കായി എന്തിന് തിയേറ്ററില് പോയി? നിങ്ങളുടെ സ്വകാര്യ സുരക്ഷ സംഘം ജനങ്ങളെ മര്ദ്ദിച്ച വിവരംഅറിഞ്ഞിരുന്നോ? തിക്കും തിരക്കുമുണ്ടായിട്ടും നിങ്ങള് എന്തിന് തിയേറ്ററില് തുടര്ന്നു? യുവതി മരിച്ച വിവരം എപ്പോഴാണ് അറിഞ്ഞത്? അറിഞ്ഞിട്ടും തിയേറ്ററില് തുടരുകയായിരുന്നോ, പരസ്പര വിരുദ്ധ പ്രസ്താവനകളല്ലേ മാധ്യമങ്ങള്ക്ക് മുന്നില് നടത്തിയത് തുടങ്ങിയ ചോദ്യങ്ങളാണ് ചോദിച്ചത് എന്നാണ് വിവരം.
അല്ലു അര്ജുനെ തിയറ്ററില് എത്തിച്ച് തെളിവെടുപ്പ് നടത്തുമെന്നാണ് വിവരം. നടന്റെ സുരക്ഷാ മാനേജര് ആന്റണി ജോണിനെ പൊലീസ് കസ്റ്റഡിയിലെടുത്തു. ആരാധകരെ വടി ഉപയോഗിച്ച് തല്ലിയതിനാണ് നടപടി
ഇതിനിടെ, മരിച്ച സ്ത്രീയുടെ കുടുംബത്തിന് പുഷ്പ 2വിന്റെ നിര്മാതാവ് നവീന് യെര്നേനിയും രവി ശങ്കറും ചേര്ന്ന് 50 ലക്ഷം രൂപയുടെ ചെക്ക് കൈമാറി. തെലങ്കാന മന്ത്രി വെങ്കട് റെഡ്ഡിയുടെ സാന്നിധ്യത്തിലായിരുന്നു ചെക്ക് കൈമാറിയത്. മരിച്ച സ്ത്രീയുടെ ഭര്ത്താവ് ചെക്ക് സ്വീകരിച്ചു. അല്ലു അര്ജുന് നേരത്തേ 25 ലക്ഷം രൂപ സഹായം പ്രഖ്യാപിച്ചിരുന്നു.
അല്ലു അര്ജുനെതിരേ കേസെടുത്തത് സംബന്ധിച്ച് രാഷ്ട്രീയമായി കടുത്ത ഭിന്നത സൃഷ്ടിച്ചിരിക്കുന്നത്. നടനെ വ്യക്തിപരമായി വേട്ടയാടുന്നതിനിടെ മറ്റു പലവിഷയങ്ങളും രേവന്ദ് റെഡ്ഡി സര്ക്കാര് കണ്ടില്ലെന്ന് വെക്കുന്നുവെന്ന് ബിആര്എസ് എം.എല്.എ. ഹരീഷ് റാവു കുറ്റപ്പെടുത്തി. കര്ഷകരുടെ, ന്യൂനപക്ഷക്കാരുടെ ഉള്പ്പെടെയുള്ള പ്രശ്നങ്ങള് ഒരുപാടുണ്ടെന്നും അദ്ദേഹം പറഞ്ഞു. ഇപ്പോഴായിരുന്നു തിരഞ്ഞെടുപ്പ് നടക്കുന്നതെങ്കില് കോണ്ഗ്രസിന് കെട്ടിവെച്ച പണം പോലും നഷ്ടപ്പെടുമായിരുന്നുവെന്ന് അദ്ദേഹം കൂട്ടിച്ചേര്ത്തു. അല്ലു അര്ജുനെതിരേയുള്ളത് ചെറിയ കേസാണെന്ന് ബിജെപി നേതാവ് രഘുനന്ദന് റാവു പറഞ്ഞു. സംസ്ഥാനത്തെ മറ്റു ചെറുകേസുകളെപ്പോലെത്തന്നെ ഉള്ള ഒരു ചെറിയ കേസാണ് അല്ലു അര്ജുന്റേതും. തിക്കിത്തിരക്കില് പോലീസിന്റെയും നടന്റെയും റോള് എന്താണെന്നും അദ്ദേഹം ചോദിച്ചു.
പുഷ്പ -2 റിലീസിനിടെ ഹൈദരാബാദിലെ സന്ധ്യ തീയേറ്ററില് അല്ലു അര്ജുന് സന്ദര്ശിച്ചിരുന്നു. താരം തീയേറ്ററില് എത്തിയപ്പോഴുണ്ടായ തിക്കിലും തിരക്കിലും പെട്ട് രേവതി എന്ന യുവതി മരിക്കുകയും അവരുടെ എട്ടുവയസുള്ള കുട്ടിക്ക് ഗുരുതരമായ പരിക്കേല്ക്കുകയും ചെയ്തു. തുടര്ന്ന് അല്ലു അര്ജുനെ പോലീസ് അറസ്റ്റ് ചെയ്യുകയായിരുന്നു. അന്വേഷണ സംഘത്തോട് പൂര്ണ്ണമായും സഹകരിക്കാമെന്നതിന്റെ അടിസ്ഥാനത്തില് പിന്നീട് താരത്തെ ജാമ്യത്തില് വിട്ടയക്കുകയായിരുന്നു. അല്ലു അര്ജുന്റെ തീയേറ്റര് സന്ദര്ശനത്തിന് പോലീസ് അനുമതി നിഷേധിച്ചിരുന്നുവെന്ന് തെലങ്കാന മുഖ്യമന്ത്രി രേവന്ദ് റെഡ്ഡി നേരത്തെ പറഞ്ഞിരുന്നു.
Content Highlights: 'Pushpa 2' Stampede Case, actor