‘മനുഷ്യമൃഗമായി’ ഞെട്ടിക്കുന്ന ലുക്കിൽ അല്ലു അർജുൻ; അറ്റ്ലീ ചിത്രത്തിന് പേരായി, ഫസ്റ്റ്ലുക്ക് പുറത്ത്

ആരാധകർ കണ്ണിലെണ്ണയൊഴിച്ച് കാത്തിരുന്ന അല്ലു അർജുൻ, അറ്റ്‌ലീ ചിത്രത്തിന്റെ ഒഫീഷ്യൽ പോസ്റ്റർ അദ്ദേഹത്തിന്റെ ജന്മദിനത്തിൽ പുറത്ത്. മൊട്ടത്തലയും ദേഹമാസകലം രോമവും കൂർത്ത നഖങ്ങളും കത്തിമൂർച്ചയുള്ള നോട്ടവുമായുള്ള അല്ലുവിന്റെ ചിത്രമാണ് പോസ്റ്ററിലുള്ളത്. ആരാധകരുടെ ആവേശം വാനോളമുയർത്തിക്കൊണ്ട് എത്തുന്ന ചിത്രത്തിന് 'രാക്ക' എന്നാണ് പേര് നൽകിയിരിക്കുന്നത്. 'പുഷ്പ'യ്ക്ക് ശേഷമുള്ള അല്ലുവിന്റെ വമ്പൻ സിനിമാപ്രപഞ്ചം മനുഷ്യനും മൃഗവും ഒന്നിക്കുന്ന രീതിയിലുള്ളൊരു രൂപമായിരിക്കുമെന്നും ഏവരേയും ഞെട്ടിക്കുന്നതായിരിക്കുമെന്നാണ് പോസ്റ്റർ സൂചന നൽകിയിരിക്കുന്നത്.

സൺ പിക്ചേഴ്സ് വൻ ബജറ്റിൽ നിർമിക്കുന്ന ചിത്രം, കഥ പറച്ചിലിലും സാങ്കേതിക വിദ്യയിലും പുതിയ വിപ്ലവം സൃഷ്ടിക്കാൻ ഒരുങ്ങുന്ന ഒരു ബ്രഹ്‌മാണ്ഡ വിസ്മയമായാണ് വിലയിരുത്തപ്പെടുന്നത്. കൂടുതൽ വിശദീകരണങ്ങളില്ലാതെ പുറത്തുവിട്ട പോസ്റ്റർ ഇതിനോടകം തന്നെ നിരവധി ചർച്ചകൾക്ക് വഴിവെച്ചിട്ടുണ്ട്. പ്രേക്ഷകരുടെ ആകാംക്ഷയും ഭാവനയും ഉണർത്താനാണ് അണിയറപ്രവർത്തകർ ഇപ്പോൾ ലക്ഷ്യമിടുന്നത്. സൺ പിക്ചേഴ്സ്, ഐക്കൺ സ്റ്റാർ അല്ലു അർജുൻ, ബ്ലോക്ക്ബസ്റ്റർ സംവിധായകൻ അറ്റ്ലി എന്നിവർ ഒന്നിക്കുന്ന ചിത്രമെന്ന പ്രത്യേകതയും 'രാക്ക'യ്ക്കുണ്ട്. ആഗോളതലത്തിൽ ശ്രദ്ധിക്കപ്പെടുന്ന രീതിയിലാണ് പ്രൊജക്റ്റ് വിഭാവനം ചെയ്തിരിക്കുന്നത്.

ഇത് വെറുമൊരു സിനിമയല്ലെന്നും വ്യത്യസ്തമായ ഒരു പുതിയ സിനിമാ ലോകത്തിന്റെ തുടക്കമാണ് എന്നാണ് കണക്കുകൂട്ടൽ. സൺ പിക്‌ചേഴ്‌സ് നിർമിക്കുന്ന ചിത്രം ഇന്ത്യൻ സിനിമയിലെ തന്നെ ഏറ്റവും വലിയ ആക്ഷൻ എന്റർടെയ്‌നറുകളിൽ ഒന്നായിരിക്കുമെന്നാണ് റിപ്പോർട്ടുകൾ. ആഗോള തലത്തിൽ വൻവിജയമായ 'പുഷ്പ 2'-ന് ശേഷം അല്ലു അർജുൻ അഭിനയിക്കുന്ന ചിത്രം എന്ന നിലയിലും, 'ജവാൻ' എന്ന മെഗാഹിറ്റിന് ശേഷം അറ്റ്ലീ ഒരുക്കുന്ന സിനിമ എന്ന നിലയിലും പ്രഖ്യാപന സമയം മുതൽക്കേ പ്രൊജക്റ്റ് വലിയ വാർത്താ പ്രാധാന്യം നേടിയിരുന്നു.

'രാജാ റാണി', 'തെരി', 'മെർസൽ', 'ബിഗിൽ' തുടങ്ങിയ സൂപ്പർ ഹിറ്റ് തമിഴ് ചിത്രങ്ങൾക്കും 'ജവാൻ' എന്ന ബ്ലോക്ബസ്റ്റർ ബോളിവുഡ് ചിത്രത്തിനും ശേഷം അറ്റ്‌ലി ഒരുക്കുന്നതാണ് ചിത്രം. ഇന്ത്യയിലെ ഏറ്റവും വിലപിടിപ്പുള്ള സംവിധായകനും നായകനും ഒന്നിക്കുന്ന ചിത്രം സയൻസ് ഫിക്ഷൻ ഗണത്തിൽപെടുന്ന സിനിമയായാണ് ഒരുങ്ങുന്നതെന്നാണ് വിവരം. അറ്റ്‌ലീ ഇതുവരെ ചെയ്തിട്ടുള്ള ജോണറുകളിൽ വ്യത്യസ്തമായെത്തുന്ന ചിത്രത്തിൽ സൂപ്പർഹീറോയായാണ് അല്ലു എത്തുന്നതെന്നുമുള്ള റിപ്പോർട്ടുകളുണ്ട്. അല്ലു അർജുന്റെ 22-ാമത്തെ ചിത്രവും അറ്റ്‌ലീയുടെ ആറാമത്തെ ചിത്രവുമാണിത്. പിആർഒ: ആതിര ദിൽജിത്ത്. 

Content Highlights: Official reveal of Atlee's directorial film title 'RAAKA' featuring Allu Arjun. First look showcases a unique beast-like transformation of Allu Arjun. The project marks the first collaboration between Allu Arjun and director Atlee. Deepika Padukone stars as the female lead in this high-budget production. Production involves top-tier Hollywood VFX studios