കങ്കണ വഞ്ചിച്ചു, സിനിമയ്ക്കായി രാഷ്ട്രീയ ബന്ധങ്ങൾ ഉപയോഗിച്ചു; നടിക്കെതിരെ ആരോപണവുമായി ബിജെപി നേതാവ്

ബോളിവുഡ് താരം കങ്കണ റണൗട്ടിനെതിരെ ആരോപണവുമായി ബി.ജെ.പി നേതാവും നടനുമായ മായങ്ക്​ മധൂർ. തന്റെ രാഷ്ട്രീയ ബന്ധങ്ങൾ കങ്കണ ഉപയോ​ഗിച്ചെന്നും ‘തേജസ് ‘ എന്ന ചിത്രത്തില്‍ അഭിനയിപ്പിക്കാമെന്ന് പറഞ്ഞ് വഞ്ചിച്ചെന്നും മായങ്ക്​ പറഞ്ഞു. കങ്കണ പ്രധാന വേഷത്തിലെത്തുന്ന തേജസിന്റെ റിലീസ് തടയുന്നതിനായി കോടിതിയെ സമീപിക്കാൻ ഒരുങ്ങുകയാണ് അദ്ദേഹം. 

‘തേജസ്’ ചിത്രീകരിക്കാൻ എയര്‍ഫോഴ്സ് ബേസില്‍ ഉൾപ്പടെയുള്ള പ്രദേശങ്ങളിൽ അനുമതി ലഭിക്കാതിരുന്നപ്പോൾ കങ്കണയെ സഹായിച്ചത് താനായിരുന്നുവെന്ന് മായങ്ക് പറയുന്നു. ഇതിന് പകരമായി സിനിമയിൽ വേഷം നൽകാമെന്ന് കങ്കണ വാ​ഗ്​ദാനം ചെയ്തിരുന്നെങ്കിലും പാലിച്ചില്ലെന്ന് മായങ്ക് വ്യക്തമാക്കി. ഒരു അഭിമുഖത്തിനിടെയായിരുന്നു മധൂറിന്റെ പ്രതികരണം. 

‘മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍, ഇന്ത്യന്‍ പ്രതിരോധ മന്ത്രി രാജ്നാഥ് സിങ് ഉൾപ്പടെയുള്ള രാഷ്ട്രീയക്കാരുമായി ബന്ധപ്പെടാന്‍ കങ്കണയെ ഞാൻ സഹായിച്ചു. രാജ്നാഥ് സിങ്ങുമായി രണ്ട് മണിക്കൂറാണ് കൂടിക്കാഴ്ച നടത്തിയത്. തേജസിൽ 15 മിനിറ്റുള്ള വേഷമാണ് വാ​ഗ്​ദാനം ചെയ്തത്. പിന്നീട് അത് കുറഞ്ഞുകുറഞ്ഞ് വന്നു. ഒടുവിൽ രണ്ട് മിനിറ്റ് ദെെർഘ്യമുള്ള വേഷത്തിനായി വരാൻ പറഞ്ഞു. താത്പര്യമില്ലെന്ന് ഞാൻ അറിയിച്ചു.

ഞാൻ കോടതിയിൽ പോകാൻ തീരുമാനിച്ചിരിക്കുകയാണ്. എപ്പോഴാണ് കോടതിയെ സമീപിക്കുകയെന്ന് ഞാൻ ഇപ്പോൾ വെളിപ്പെടുത്തുന്നില്ല. സിനിമയുടെ അണിയറക്കാർ അറസ്റ്റ് ചെയ്യപ്പെടണം. നിയമത്തിന് അനുസൃതമായി കാര്യങ്ങൾ മുന്നോട്ട് കൊണ്ടുപോകും. ‘ടിക്കു വെഡ്സ് ഷേരു‘വിൽ അസോസിയേറ്റ് പ്രൊഡ്യൂസർ എന്ന് പേര് വെക്കാമെന്ന് കങ്കണ പറഞ്ഞിരുന്നുവെങ്കിലും പ്രത്യേക നന്ദി മാത്രമാണ് ടെെറ്റിൽ ക്രെഡിറ്റ്സിൽ നൽകിയത്‘, മായങ്ക്​ മധൂർ പറഞ്ഞു. 

എയര്‍ഫോഴ്സ് പൈലറ്റിന്റെ ജീവിത കഥ പറയുന്ന ‘തേജസ്’ ഒക്ടോബര്‍ 20-ന് റിലീസ് ചെയ്യുമെന്നാണ് അണിയറപ്രവർത്തകർ അറിയിച്ചിരിക്കുന്നത്. സർവേഷ് മേവാരയാണ് ചിത്രം സംവിധാനം ചെയ്യുന്നത്. ഇന്ദിരാ ഗാന്ധിയുടെ ജീവിതത്തെ ആസ്പദമാക്കി ഒരുക്കുന്ന  ‘എമര്‍ജന്‍സി ‘യാണ് പുറത്തിറങ്ങാനുള്ള മറ്റൊരു കങ്കണ ചിത്രം. എമർജൻസി സംവിധാനം ചെയ്യുന്നതും കങ്കണ തന്നെയാണ്.

Content Highlights: Actor bjp leader Mayank Madhur threatens legal action against makers of Kangana Ranaut's Tejas