‘ഏജന്റ്’ പരാജയപ്പെട്ടു, പിന്നാലെ അപകടത്തിൽ ഞരമ്പുകൾ മുറിഞ്ഞു, 2 ശസ്ത്രക്രിയ, മാനസികമായി തകർന്നു-അഖിൽ

തന്റെ കരിയറിലെ വെല്ലുവിളികളെക്കുറിച്ചും ഏറെ നാളത്തെ ഇടവേളയ്ക്ക് ശേഷമുള്ള തിരിച്ചുവരവിനെക്കുറിച്ചും മനസ്സ് തുറന്ന് തെലുങ്ക് നടൻ അഖിൽ അക്കിനേനി. 'ഏജന്റ്' എന്ന ചിത്രത്തിന്റെ പരാജയത്തിന് പിന്നാലെ അപ്രതീക്ഷിതമായി സംഭവിച്ച ഒരു അപകടം തന്നെ സിനിമാരംഗത്തുനിന്ന് കുറച്ചുകാലം മാറ്റിനിർത്തിയെന്ന് അദ്ദേഹം പറഞ്ഞു. മുരളി കിഷോർ അബ്ബുരു സംവിധാനം ചെയ്യുന്ന ലെനിൻ എന്ന ചിത്രത്തിലൂടെ ശക്തമായ തിരിച്ചുവരവിനൊരുങ്ങുകയാണ് താരം ഇപ്പോൾ.

വീട്ടിലെ കുളിമുറിയിലെ നനഞ്ഞ തറയിൽ തെന്നിവീണുണ്ടായ ഒരു അപകടം തന്നെ ശാരീരികമായി തളർത്തിയെന്ന് ഒരു യുട്യൂബ് ചാനലിന് നൽകിയ അഭിമുഖത്തിൽ അഖിൽ അക്കിനേനി പറഞ്ഞു. വീഴ്ചയിൽ ഒരു ഗ്ലാസ് കഷണത്തിന് മുകളിൽ കൈ അമരുകയും ഇടത് കൈയിലെ ഞരമ്പുകൾക്കും പേശികൾക്കും (vein, nerve, and tendon) ഗുരുതരമായ പരിക്കേൽക്കുകയും ചെയ്തു. രണ്ട് ശസ്ത്രക്രിയകളും 48 തുന്നിക്കെട്ടുകളും വേണ്ടിവന്ന ഈ അപകടം മാസങ്ങളോളം തന്നെ വിശ്രമിക്കാൻ നിർബന്ധിതനാക്കിയെന്ന് അഖിൽ പറഞ്ഞു.

"എനിക്ക് മനസ്സിലാകും, ഇതൊരു വലിയ ഇടവേളയാണ്. ഇതിൽ പകുതി എൻ്റെ തെറ്റായിരുന്നു, പകുതി എൻ്റെ കയ്യിലായിരുന്നില്ല. എനിക്ക് 16 മാസത്തെ ചികിത്സ വേണ്ടിവന്ന ഒരു പരിക്ക് സംഭവിച്ചു. എൻ്റെ ഇടതുകൈയിൽ രണ്ട് ശസ്ത്രക്രിയകൾ നടന്നു. ഏജൻ്റ് റിലീസ് ചെയ്ത് 3-4 മാസങ്ങൾക്ക് ശേഷമാണ് എനിക്ക് പരിക്ക് പറ്റിയത്. അതൊരു ആകസ്മിക അപകടമായിരുന്നു. നനഞ്ഞ ബാത്ത്റൂം തറയിൽ തെന്നി വീഴുകയായിരുന്നു, ഒരു ഗ്ലാസ് കഷണത്തിൽ ഞാൻ വീണു. അത് എൻ്റെ ഇടതുകൈയിലെ മോതിര വിരലിലും നടുവിരലിലെ ഞരമ്പുകളെയും സിരകളെയും ടൻഡനുകളെയും മുറിച്ചു. ഇവിടെ 48 തുന്നലുകളുണ്ട്," അദ്ദേഹം വിശദീകരിച്ചു.

ഈ 16 മാസ കാലയളവിൽ താൻ കടുത്ത മാനസിക വിഷമത്തിലൂടെയാണ് കടന്നുപോയതെന്നും 'ഇരുണ്ട ചിന്തകൾ' തന്നെ വേട്ടയാടിയിരുന്നതായും അദ്ദേഹം പറഞ്ഞു. ശാരീരികമായും മാനസികമായും തകർന്നുപോയ ആ എട്ടു മാസക്കാലം തനിക്ക് ഭാരമുയർത്താനോ ജിമ്മിൽ പോകാനോ പോലും സാധിച്ചിരുന്നില്ലെന്ന് അദ്ദേഹം ഓർക്കുന്നു.

"ഈ പരിക്ക് എന്നെ പൂർണ്ണമായും തളർത്തി. ഏകദേശം 7-8 മാസത്തോളം എനിക്ക് ഒരു ഭാരവും ഉയർത്താൻ കഴിഞ്ഞില്ല. പൂർണ്ണമായി സുഖം പ്രാപിക്കാൻ ആകെ 16 മാസമെടുത്തു. മാനസികമായി കരകയറാനും വീണ്ടും ജിമ്മിൽ പോകാനും, ആക്ഷൻ ചെയ്യാനോ മറ്റെന്തെങ്കിലും ചെയ്യാനോ വേണ്ടത്ര ശക്തി നേടാനും എനിക്ക് കഴിഞ്ഞില്ല. ഇതിനോടൊപ്പം എൻ്റെ അവസാന ചിത്രത്തിൻ്റെ ഫലവും ചേർന്നപ്പോൾ, ഞാൻ കടന്നുപോകേണ്ടിയിരുന്ന ഒരു യാത്രയായിരുന്നു അതെന്ന് ഞാൻ കരുതുന്നു. ഇനി ഒരിക്കലും അങ്ങനെ സംഭവിക്കില്ലെന്ന് ഞാൻ നിങ്ങൾക്ക് ഉറപ്പുനൽകാം," അദ്ദേഹം കൂട്ടിച്ചേർത്തു.

എന്നാൽ ആ വേദനയെയും നിരാശയെയും തന്റെ തിരിച്ചുവരവിനുള്ള ഊർജ്ജമാക്കി മാറ്റാനാണ് അഖിൽ ഇപ്പോൾ ശ്രമിക്കുന്നത്. നാഗാർജുനയും സൂര്യദേവര നാഗ വംശിയും ചേർന്ന് നിർമ്മിക്കുന്ന 'ലെനിൻ' ജൂലൈ 10-ന് തിയേറ്ററുകളിലെത്തും. ഭാഗ്യശ്രീ ബോർസെ നായികയാകുന്ന ഈ ബിഗ് ബജറ്റ് ചിത്രത്തിലൂടെ തന്റെ കരിയറിലെ വലിയൊരു വിജയമാണ് അഖിൽ ലക്ഷ്യമിടുന്നത്.

2023-ൽ പുറത്തിറങ്ങിയ 'ഏജന്റ്' ആണ് അഖിൽ നായകനായെത്തി ഒടുവിൽ റിലീസായ ചിത്രം. ബോക്സ് ഓഫീസിൽ വലിയ പരാജയമായിരുന്നു ഈ ചിത്രം. ലോകമെമ്പാടുംനിന്ന് ഏകദേശം 13 കോടി രൂപ മാത്രമാണ് ഈ ചിത്രം നേടിയത്. സിനിമ പ്രതീക്ഷിച്ച രീതിയിൽ വിജയിക്കാത്തതിൽ അഖിൽ അന്ന് ആരാധകരോട് മാപ്പ് ചോദിച്ചിരുന്നു. സിനിമ സ്ക്രീനിൽ വേണ്ട രീതിയിൽ വന്നില്ലെന്നും എന്നാൽ തന്നെ വിശ്വസിക്കുന്നവർക്കായി താൻ കൂടുതൽ കരുത്തോടെ തിരിച്ചുവരുമെന്നും അന്ന് അദ്ദേഹം വാഗ്ദാനം ചെയ്തിരുന്നു.

Content Highlights: Tollywood actor Akhil Akkineni, who is currently gearing up for his massive theatrical comeback with Lenin, has shockingly revealed that a horrific, freak bathroom accident was the real reason behind his long three-year hiatus from the big screen. The actor disclosed that he shattered his left hand on a piece of glass after slipping on a wet floor, which severed his veins, nerves, and tendons, requiring two major surgeries and 48 stitches.