ഞങ്ങളുടെ കാലത്ത് വാം-അപ്പ് പതിവില്ലായിരുന്നു; വർഷങ്ങളോളമുള്ള നൃത്തം കാല്പാദങ്ങളിലേൽപ്പിച്ച ആരോഗ്യപ്രശ്‌നങ്ങളെക്കുറിച്ച് ശോഭന
മലയാളത്തിന്റെ പ്രിയനടിയും പ്രശസ്ത ഭരതനാട്യം നർത്തകിയുമായ ശോഭന ആരോഗ്യപ്രശ്‌നങ്ങളെക്കുറിച്ച് അടുത്തിടെ തുറന്നുപറഞ്ഞത് വലിയ ചർച്ചയായിരിക്കുകയാണ്. ദശാബ്ദങ്ങൾ നീണ്ട നൃത്തം കാൽപ്പാദങ്ങളിലെ ഞരമ്പുകളെ ബാധിച്ചതിനെക്കുറിച്ചും, നൃത്തരംഗത്ത് മുൻകാലങ്ങളിൽ പ്രാരംഭ വ്യായാമങ്ങൾക്ക് നൽകിയിരുന്ന കുറഞ്ഞ പ്രാധാന്യത്തെക്കുറിച്ചും അവർ ഇൻസ്റ്റാഗ്രാമിൽ പങ്കുവെച്ച വീഡിയോയിലാണ് വ്യക്തമാക്കിയത്.
എന്റെ രണ്ടു കാലുകളിലും ചില ആരോഗ്യപ്രശ്‌നങ്ങൾ കണ്ടെത്തിയിട്ടുണ്ട്. പാദങ്ങളുടെ വളവിനെ താങ്ങിനിർത്തുന്ന ടെൻഡനുകൾക്ക് (tendon) ബലക്ഷയം സംഭവിച്ചിരിക്കുകയാണ്. അതിനാൽ എപ്പോഴും ശ്രദ്ധ നൽകേണ്ടതുണ്ട്. എങ്കിലും ഇതൊക്കെ സ്വാഭാവികമാണ്. വർഷങ്ങളോളം വേദികളിൽ നൃത്തം ചെയ്തതിന്റെ ഫലമാണിത്. നമ്മുടെ തലമുറയിൽ ഇന്നത്തെ ആർട്ടിസ്റ്റുകൾ ചെയ്യുന്നതുപോലെ വ്യായാമങ്ങളോ മറ്റോ ചെയ്യാറില്ലായിരുന്നു. ആ കഷ്ടപ്പാടുകൾക്കെല്ലാം തക്കതായ മൂല്യം ലഭിച്ചിട്ടുണ്ടെന്നാണ് ഞാൻ വിശ്വസിക്കുന്നത്. ശോഭന പറയുന്നു.
നമ്മുടെ പാദങ്ങളുടെ ആകൃതിയും വളവും നിലനിർത്തുന്നത് അസ്ഥികൾ, ലിഗമെന്റുകൾ, മസിലുകൾ, ടെൻഡനുകൾ എന്നിവയുടെ സങ്കീർണ്ണമായ ഒരു കൂട്ടായ്മയാണ്.
ശരീരത്തിന്റെ ഭാരം കൃത്യമായി വിഭജിക്കുക, നടക്കുന്ന സമയത്തോ കുതിക്കുന്ന സമയത്തോ ഉണ്ടാകുന്ന ആഘാതങ്ങൾ താങ്ങുക, കൃത്യമായ ബാലൻസ് നിലനിർത്തുക എന്നിവയാണ് ഈ ഘടനകളുടെ പ്രധാന ചുമതല. പാദത്തിന്റെ ഉൾഭാഗത്തെ താങ്ങിനിർത്തുന്ന 'പോസ്റ്റീരിയർ ടിബിയൽ ടെൻഡൻ' (Posterior Tibial Tendon) പോലുള്ള കോശങ്ങൾക്ക് ബലക്ഷയമോ ആഘാതമോ സംഭവിക്കുമ്പോൾ പാദത്തിന്റെ ഉൾവശത്ത് കടുത്ത വേദനയും വീക്കവും അനുഭവപ്പെടാം. ഇത് കാലക്രമേണ പാദത്തിന്റെ സ്വാഭാവികമായ വളവ് നഷ്ടപ്പെടുന്നതിന് വഴിവെക്കുന്നു. നർത്തകരെ സംബന്ധിച്ചിടത്തോളം, അവരുടെ കാലുകൾ തുടർച്ചയായി കഠിനമായ ആഘാതങ്ങൾക്കും, പെട്ടെന്നുള്ള ചലനങ്ങൾക്കും, മണിക്കൂറുകളോളം നീളുന്ന പരിശീലനങ്ങൾക്കും വിധേയമാകുന്നുണ്ട്. അനുയോജ്യമായ വാം-അപ്പുകൾ ഇല്ലാതെയും, മസിലുകൾക്ക് കൃത്യമായ വിശ്രമം നൽകാതെയും, അനുയോജ്യമല്ലാത്ത തറയിലോ പാദരക്ഷകളിലോ ദീർഘകാലം പരിശീലനം തുടരുന്നത് ഇത്തരം ഞരമ്പ് രോഗങ്ങൾക്ക് കാരണമാകാം.
കായിക താരങ്ങളെയും നർത്തകരെയും സംബന്ധിച്ച് വാം-അപ്പുകൾ ശരീരത്തെ പരിക്കുകളിൽനിന്ന് സംരക്ഷിക്കുന്ന കവചമാണ്.വാം-അപ്പ് ചെയ്യുമ്പോൾ ശരീരത്തിലെ രക്തയോട്ടം വർദ്ധിക്കുകയും പേശികളിലേക്ക് ആവശ്യത്തിന് ഓക്‌സിജൻ എത്തുകയും ചെയ്യുന്നു. സന്ധികളുടെ ചലനശേഷിയും വഴക്കവും വർദ്ധിക്കുന്നതിലൂടെ അപ്രതീക്ഷിതമായ ഉളുക്കുകളും ചതവുകളും ഒഴിവാക്കാം.
കാഫ് (Calf) മസിലുകളെയും പാദത്തിന്റെ പേശികളെയും ശക്തിപ്പെടുത്തുന്ന വ്യായാമങ്ങൾ നർത്തകർക്ക് ഏറെ ഗുണം ചെയ്യും.
പഴയ തലമുറയിലെ കലാകാരന്മാർക്ക് സ്‌പോർട്‌സ് സയൻസിനെക്കുറിച്ചോ സയന്റിഫിക് കണ്ടീഷനിംഗിനെക്കുറിച്ചോ ഇന്നത്തെപ്പോലെ വ്യക്തമായ അറിവുണ്ടായിരുന്നില്ല. എന്നാൽ ഇന്ന് സാങ്കേതികവിദ്യയും വൈദ്യശാസ്ത്രവും വളർന്നതോടെ, കൃത്യമായ മുൻകരുതലുകളിലൂടെ പരിക്കുകളുടെ തോത് വലിയ അളവിൽ കുറയ്ക്കാൻ കലാകാരന്മാർക്ക് സാധിക്കുന്നുണ്ട്.
തുടർച്ചയായ വേദന, വീക്കം, നിൽക്കുമ്പോൾ അല്ലെങ്കിൽ വിരലുകളിൽ ഉയർന്നു നിൽക്കുമ്പോൾ ഉണ്ടാകുന്ന പ്രയാസങ്ങൾ എന്നിവ കണ്ടാൽ ഉടനടി ഒരു ഓർത്തോപീഡിക് വിദഗ്ധനെ കാണേണ്ടതാണ്. തുടക്കത്തിൽ കണ്ടെത്തിയാൽ ഫിസിയോതെറാപ്പി, ആക്റ്റിവിറ്റി മാറ്റങ്ങൾ, പ്രത്യേക ആർച്ച് സപ്പോർട്ട് ഇൻസെർട്ടുകൾ എന്നിവയിലൂടെ ഈ പ്രശ്‌നം പൂർണ്ണമായും പരിഹരിക്കാൻ സാധിക്കും.
Content Highlights: Shobana opens up about health issues affecting her feet due to decades of dancing, highlighting the importance of proper warm-ups and exercises.