'പിശാചിനെപ്പോലെയുള്ള' പൂവ്: തായ്ലാൻഡിൽ വംശനാശഭീഷണി നേരിടുന്ന വിചിത്ര സസ്യത്തെ കണ്ടെത്തി

തായ് ലാൻഡിലെ സസ്യശാസ്ത്രജ്ഞർ ശാസ്ത്രലോകത്തിന് പുതിയ 'ഫെയറി ലാന്റേൺ' (fairy lantern) ഇനത്തിൽപ്പെട്ട ചെടിയെ കണ്ടെത്തി.

തോങ് ഫ ഫൂം നാഷണൽ പാർക്കിലെ (Thong Pha Phum National Park) മലനിരകളിലെ നിത്യഹരിത വനങ്ങളിൽ സർവേ നടത്തുന്നതിനിടയിലാണ് ഏകദേശം 1,000 മീറ്റർ (3,300 അടി) ഉയരത്തിൽ സസ്യശാസ്ത്രജ്ഞർ ഇതുവരെ കണ്ടിട്ടില്ലാത്ത ഈ ചെടിയെ കണ്ടെത്തിയത്. 'തിസ്മിയ ഡെയ്മണ' (Thismia daemona) എന്നാണ് പേരിട്ടിരിക്കുന്നത്. ഈ ചെടിക്ക് ഭയപ്പെടുത്തുന്ന, 'പിശാചിനെപ്പോലെയുള്ള' രൂപമുണ്ട്. അതുകൊണ്ടാണ് ശാസ്ത്രജ്ഞർ ഇതിന് ഈ പേര് തിരഞ്ഞെടുത്തത്.

ഇതിന്റെ പൂവിന് കറുപ്പ് കലർന്ന ട്യൂബ് പോലെയുള്ള ഭാഗവും, അതിന് മുകളിലായി കൊമ്പ് പോലുള്ള കറുത്ത അവയവങ്ങളും, താഴെയായി തിളക്കമുള്ള ചുവപ്പ്-ഓറഞ്ച് നിറത്തിലുള്ള അടിത്തട്ടിലെ ഇതളുകളുമുണ്ട്. സാധാരണയായി ഉണങ്ങിയ ഇലക്കൂട്ടങ്ങൾക്കടിയിൽ ജീവിക്കുകയും വളരെ അപൂർവമായി മാത്രം പൂവിടാൻ മുകളിലേക്ക് വരികയും ചെയ്യുന്നവയാണ് ഈ സസ്യങ്ങൾ.

പൊതുവെ 'ഫെയറി ലാന്റേണുകൾ' എന്ന് വിളിക്കപ്പെടുന്ന തിസ്മിയ (Thismia) ജനുസ്സിലെ മറ്റ് ചെടികളെപ്പോലെ, ഇൗ ചെടിയിലും ക്ലോറോഫിൽ (ഹരിതകം) ഇല്ല, അതായത് ഇതിന് പ്രകാശസംശ്ലേഷണം നടത്താൻ കഴിയില്ല. പകരം, ജീവിതത്തിന്റെ ഭൂരിഭാഗവും ഉണങ്ങിയ ഇലകൾക്കടിയിൽ മറഞ്ഞിരുന്ന് മണ്ണിലെ ഫംഗസുകളിൽ നിന്നാണ് ഇത് ആവശ്യമായ പോഷകങ്ങൾ സ്വീകരിക്കുന്നത്

പാർക്കിലെ ഒരൊറ്റ സ്ഥലത്ത് മാത്രമാണ് ഈ ചെടി കാണപ്പെടുന്നത്. ഏകദേശം അഞ്ച് ഹെക്ടറിൽ താഴെ മാത്രം വരുന്ന പ്രദേശത്ത് 50-ൽ താഴെ മാത്രം ചെടികളാണ് ഉള്ളത്. ഐ.യു.സി.എൻ (IUCN) റെഡ് ലിസ്റ്റ് മാനദണ്ഡങ്ങൾ അനുസരിച്ച്, ഗവേഷകർ ഈ ചെടിയെ അതീവ ഗുരുതരമായ വംശനാശഭീഷണി നേരിടുന്ന സസ്യമായി വർഗീകരിച്ചിട്ടുണ്ട്.

Content Highlights: Botanists discovered a new fairy lantern species named Thismia daemona in Thailand., The plant features a devil-like appearance with black horn-like structures and red-orange petals., It lacks chlorophyll and derives nutrients from soil fungi instead of photosynthesis., Classified as critically endangered with fewer than 50 individual plants remaining in a single location.